同事話係佢朋友嘅故事喎，佢咁講我咁聽啦！事緣同事個friend叫做松本，由於太宅識唔到女仔，34歲仲未拍過拖，所以兩年前就開始沉迷於「出租女友」嘅世界裡面，繼而結識咗一位叫佐々木嘅24歲女仔。
首先解釋清楚，日本呢種「出租女友」嘅定義並唔係援交或者「爸爸活」，簡單嚟講係嚴禁提供性服務，完完全全真係同你拍拖，全部活動要喺公眾地方進行，保障個女仔嘅安全，唱K都要另外同「出租女友」公司講定，因為K房嘅環境係一男一女共處一室。
同事個朋友松本咁樣租女友要幾多錢呢？好簡單，一切以時間做依歸，總之就係5,000円 / 時間，大約HK$280 左右啦！自從第一次「遇到」佐々木小姐之後，松本就一直都指名要呢個女仔，平均一星期出嚟一次，每次會「拍拖」兩至三個鐘，換言之每星期用15,000円，一個月就係60,000円。
每個月使三千幾蚊港紙，換到放假有女朋友陪出街，抵唔抵就見仁見智，但松本就覺得物有所值，仲成日話：「自從畢業後就好難搵到朋友，工作同生活又有好多掙扎，可以同佐々木小姐盡情傾訴同抱怨，覺得好幸福。」
由於同事部電話裡面有佐々木張相，佢話係松本之前send畀佢……哦，佢咁講我咁聽啦，拎嚟睇下先。
佐々木係典型日本女仔樣，斯文，笑得好甜，張相係著住條長裙，仲戴住頂草帽同著學生嗰種皮鞋，你話佢讀緊書我都信。
松本已經深深被佐々木吸引，兩個人拍拖嘅節目以行街食飯為主，有時仲會坐喺公園傾計，成件事好青春，聽講喺餐廳食嘢嘅時候，佐々木更加會主動餵松本，嘩！咁真係好難怪個男仔沉晒船。
有次松本嘅媽媽追問個仔有冇拍拖，點解三十幾歲仲未成家立室，咁松本同佐々木出街嘅時候又有影相，所以就send咗張合照畀媽媽睇，老人家見到梗係開心啦，不斷催促要約出嚟食飯見面，起初松本都唔敢同佐々木提起，但係家人實在畀咗佢好大壓力，結果松本就鼓起勇氣問：「下次出去，可唔可以同佢媽媽食飯？」
好可惜，佐々木嘅答覆係：「唔可以。」
拒絕唔係因為推job，而係佐々木要離開東京喇，因為私人理由，佐々木要返去自己嘅家鄉德島。
松本好愕然，因為知道嚟緊唔可以再租佐々木出街，心諗呢兩年大家已經咁熟喇，不如大膽示愛啦，如果對方真係成為自己嘅另一半，咁就唔使再以「出租女友」嘅名義約會啦，何況今次唔表白，隨時唔知仲有冇機會見。
結果松本膽粗粗問佐々木攞私人contact，可惜……
佐々木：「對唔住，公司唔允許，真係好對唔住。」
松本一而再表明希望對方成為真正嘅女朋友，不過都係換嚟：「對唔住，公司唔允許，真係好對唔住。」
出租女友同客人聯絡只可以透過公司，唔可以交換私人contact，松本覺得大家「相處」咗兩年，期間都有講各自嘅私事，就算對方拒愛，都可以做個朋友啩！不過佐々木就當佢係一個「熟客」，只談工作，不談感情。
最後松本降低要求，唔需要佐々木做佢真正嘅女朋友，甚至唔需要做朋友，亦唔需要交換私人contact，只係希望佢可以出多嚟一次，幫手見下佢媽媽，大家坐低食餐飯，當然係計錢啦！無奈佐々木以趕住返德島為由再度拒絕，呢次真係德島，得唔到，唔係靠彩數。
同事話松本因為咁而好傷心，以為大家兩年間唔多唔少已經建立一份感情，原來一切只係建基於工作上嘅交易，唯有同媽媽講已經分咗手，從此亦再冇光顧「出租女友」公司，因為所有嘢都只係虛幻，只能夠換嚟短時間嘅心靈慰藉。
同事：「你覺唔覺得個女仔好無情？」
我：「唔係喎，我覺得佐々木好專業喎！其實日本都好流行神秘顧客，打開呢度嘅求職網會發現成日請Mystery Customer，話唔定出租女友公司都會聘請，如果發現有員工犯規，隨時當違約要賠錢，各有各顧慮同立場啦！」
5,000円 / 時間……不如正正經經識女仔好過啦，講錢就唔係嗰回事嚟㗎喇。