「你覺唔覺Cherry真係好靚？佢返工嗰日咪走嚟自我介紹嘅，嘩～～～好似天使咁，直頭有啲耶穌光喺後面，當時我已經知道係佢喇！我一定要追到呢個女仔！」男同事Frankie講到繪形繪聲，又天使又耶穌光，唔知以為佢係基督徒，其實喺我眼中，佢嘅行為同痴 漢只係一線之差。
前日下午茶叫蛋治熱奶茶，噚日唔知去邊度買macaron拎去Cherry個位，你做咩啫？人哋都冇話要食，頭幾次因為啱啱入嚟做先唔好意思推啫，後來咪接二連三叫你拎走囉！同埋請人食嘢大方啲吖嘛，成team人喺晒度，Frankie次次淨係買畀Cherry，其實會搞到個女仔好尷尬㗎！
不過Frankie成個人已經迷晒，完全係神魂癲倒嗰隻，而且佢追Cherry都追得好出面，迫人食Tea事小，對方嚟咗返工都係一個月鬆啲，Frankie已經送咗兩次花，仲有好多小禮物，朱古力、刻名唇膏、staff card套……懶驚喜咁樣擺喺個女仔枱面，人哋冧你就話啫，唔冧你又經常咁樣做，真係好困擾㗎！
Cherry有男朋友，佢應該係想Frankie死心，後來幾乎日日叫男友嚟接放工，大把人睇到，既然對方有仔就唔該收斂下啦！但係Frankie完全冇放棄，買嘢食同埋送禮行動照舊，我想講呢條友平時做嘢又鳩又hea，如果佢肯將溝女嘅決心同堅持放30%喺工作上就好喇！
人哋溝女關我咩事？我唔係唔抵得呀，因為Frankie係我下屬，佢騷擾Cherry嘅事令我好難做，因為個女仔係隔籬team，人哋同自己阿姐投訴，然後個阿姐又走嚟教我做嘢，要我警告Frankie，原來Cherry覺得好困擾喎！
頂你個肺吖！本身同Cherry個阿姐已經有啲牙齒印，加上九萬幾樣嘢做周身唔得閒，係咪仲要處理同事啲無聊感情問題呀？
別無選擇之下，我唯有捉Frankie入房，希望好好地講到佢明白，收手啦！唔係阻你溝女，但人哋對你零興趣，苦苦糾纏咪仲肉酸，做男仔型啲得唔得？
我：「Frankie，Cherry同佢阿姐投訴你，咁你應該睇清楚啦！你都見到佢阿姐今朝黑晒面搵我，無謂大家難做好唔好？唔係阻止你鍾意佢，但係啲動作唔好咁大，特別係唔好再拎嘢食同禮物過去，幫幫手好唔好？」
Frankie：「佢阿姐加鹽加醋啫，係咪唔抵得咋，我見Cherry次次都笑笑口，佢冇嘢喎！」
我：「人哋笑笑口係因為新嚟，呢啲叫人情世故，唔通講粗口趕你走咩！自己知掟啦！」
Frankie：「明㗎喇，最多我低調啲，不過我唔會放棄㗎！」
我：「唔係管你私人生活同感情事，嗱！理智啲去分析，Cherry有仔，差唔多日日嚟接放工，擺明係想你知難而退，你自己feel唔到咩？」
Frankie：「就係咁先好，如果Cherry冇男友，即係我有好多情敵，所以佢有男友仲好，換言之我嘅對手只得一個！咁就簡單好多喇，我只係需要focus喺佢男友身上，喺樓下撞過啦，不外如是啫，又唔係高，又唔係大隻，仲有喎，日日可以接Cherry放工咁得閒，都唔知係咪無業。」
自從呢次之後，我自己心入面幫Frankie改咗個名，叫「自信仔」，有料喎！拍得住當年嘅娃娃舜。
上星期Cherry辭咗職，原來佢再之前已經遞咗信，試用期內連一個月通知都唔使，而家走埋喇，Frankie變返以前咁，又鳩又hea又廢，你條自信仔就話回復原狀啫，難為Cherry個阿姐係咁畀說話我聽，話我唔識得管人，累到佢要再出Job Ad，呢鋪我真係無辜，喺公司開個愛情信箱，做埋同事嘅感情顧問好唔好？