最近睇到娛樂新聞，即刻諗起公司曾經發生過一件事，「痴漢」同「痴情」其實只差一線，當時我哋所有人都覺得個女同事好慘，正正經經做嘢啫，咁都遇著個癲嘅，仲差啲連份工都冇埋。
話說有個Sales同事辭職，佢跟開嘅客好自然要分返出嚟，其中一個大客鄔生由阿姐Peggy親自接手，個故事就係由呢個moment展開。Peggy雖然係阿姐，但其實40歲都未夠，單身keep得好好，事業型有種高貴大方嘅味道，好多同事都話佢索，只係做得Sales Team話事人，收入唔會少得去邊，可能呢個原因，咁好條件都冇人敢出手，不過喺公司以外有冇追求者就唔知喇。
接手客戶循例要打聲招呼同client visit，呢位大客鄔生初次見到Peggy嘅時候已經嗒晒糖，有時覺得個天真係好公平，咁有錢無奈又生得咁樣衰，大肚腩地中海著起龍袍唔似太子，劈頭第一句就令人覺得冇內涵：「嘩，Terry個上司原來咁靚，早知唔使Terry跟啦，我個account如果一早交畀你，每年落嘅單最少加到Triple呀！」
此話一出，Peggy都唔知點接落去，當然禮貌上都係笑笑回應兩句大體說話，其實做生意講公事，都係formal啲好，熟咗就話啫，第一次見已經張牙舞爪，唔係人人都會受落。點解我咁清楚啲細節？因為我當年啱啱入嚟呢間公司，以一個新人嘅身份跟Peggy去見客囉，冇一個客好似鄔生咁樣㗎！
開頭都好正常，check返record，鄔生落單的確係比以前Terry時期多咗，但係呢條財大氣粗嘅肥佬亦同時做多咗，每星期送一紥花去Office畀Peggy，亦會失驚無神搵速遞拎禮物上嚟，手袋首飾果籃乜都有，唔使明眼人啦，傻嘅都知你想點。
做落之後我都有自己嘅客要跟，所以Peggy有時都要單獨同鄔生傾生意，次次都係去啲高級餐廳同六星級酒店食肆，有幾次更加包場，財大氣粗果然唔同啲，不過Peggy就同我呻過每次出嚟都畀對方捉住合照，仲話：「先唔計傾公事咁樣唔恰當，就算係朋友，我同啲女性friend出嚟都唔會影幾十張合照，老實講真係好唔自在。」
愈嚟愈多禮物，愈嚟愈假公濟私，Peggy亦都愈嚟愈排斥，後期冇我在場就一定唔出去同鄔生會面，再咁落去我都擔心呢條肥鬼土豪會「色色」，所以永遠都二仔底死跟，鄔生見到我一齊嚟都會黑面，講嘢從來唔會正面望我，眼中只有Peggy，知你咩料啦，冇多個人在場，阿姐容乜易畀你溶咗都冇人知。
不過鄔生嘅胃口真係好大，佢唔係想「色色」咁簡單，直頭想Peggy做女朋友呢下先大想頭，差啲唔記得講，呢條肥鬼土豪都六十幾歲，就算Peggy係中女，佢都做得人老豆，起碼拍埋一齊真係似Daddy先，問題係我阿姐唔需要Sugar Daddy呢！貪錢嘅女人係多，但識得自己搵錢養自己嘅女人都唔少。
眼見次次出嚟都有我做「電燈膽」，鄔生放棄再以公事為名約Peggy，選擇用最直接方法去溝女，就係私人名義約出街，仲有一日幾次WhatsApp Peggy噓寒問暖同搞爛gag，喂呀，唔好咁肉酸啦，唔係死纏爛打就一定得㗎，「痴漢」同「痴情」其實只差一線好唔好？Peggy次次都推卻鄔生嘅私人約會，WhatsApp都係十次先覆一次，仲要係派emoji擺到明敷衍，咁大個人自己識做啦，有錢佬都唔曉睇人眉頭眼額？平時點做生意㗎你？
咁我相信一個有錢佬被請食檸檬嘅機會真係較普通人少，可能係自尊心同面子問題作祟，鄔生溝唔到女就開始動真火喇，直接contact我哋老細，仲畀咗之前同Peggy嘅合照老細睇，藉此混淆視聽想令其他人覺得佢兩個拍緊拖，可惜吖，Peggy張張相都笑得好尷尬同勉強，唔知仲以為背脊畀把槍隊住，老細一睇已經知道咩事。
見鄔生係公司大客，本身想息事寧人啦，點知呢條死肥鬼竟然「行動升級」，失驚無神又同老細講Peggy態度好差，跟嘢跟到甩甩漏漏，利用生意作為綁架，揚言唔炒咗Peggy就會向我哋嘅competitor落單，以後唔使再旨意同佢做生意，男人之中佢都算極品，有冇返屋企攬住媽咪喊呀？同咗訓導主任講未？
難得老細不為所動，仲同我哋講：「呢個鄔生幾搞笑，我公司唔係夜總會，落單唔包溝女㗎喎！」結果老細親自出馬，人就一定唔會炒，個客要抽走啲單都冇辦法，認真講，之後鄔生的確有公報私仇，order比之前少咗7成，但係知道來龍去脈嘅人當然冇怪Peggy啦，只會覺得鄔生肉酸囉，唔止外表，仲有性格為人。
我同Peggy都好佩服老細，但老細就話唔係正唔正義嘅問題，係呢啲咁嘅客keep嚟都冇意思，今次順佢意，將來都唔可以逆對方意，如果將來Peggy辭職唔做，個客一樣留唔住，咁何必要委屈個員工呢？冇咗呢個客，咪將啲時間develop去其他客身上囉！點解要畀人威脅呢？
公司呢幾年疫情咪又係咁run，世界冇話邊個冇咗邊個唔得嘅，但係一個人如果冇品就真係唔要得喇，何況講有錢，永遠一山還有一山高，唔好將生意綑綁埋感情咁低莊啦！