其實我有offer㗎喇，不過新工去到2月中先返，之前send過另一份CV出去又咁啱有回音，咁咪見埋先囉，當多個比較，想轉軚仲嚟得切吖嘛。
去見呢份工嘅時候係晏晝3點幾，唔知啲人係做到攰定係飯氣攻心，個個唔係無厘神氣就係黑口黑面，明明唔識個receptionist，但同佢講約咗interview嗰陣，佢副尊容同表情好似我殺咗佢全家咁，我嚟見工，你嚟返工，唔使咁重戾氣嘅，笑下啦香港人。
我被安排坐喺office裡面其中一個吉位填form，會議室或者房仔都冇？是但啦，見周圍啲人又頹又唔友善，除非人工畀到十萬九千七，否則正常唔會揀呢間公司㗎喇，一場嚟到就見埋先咁囉！
點知原來見工都係我一廂情願，填完張application form冇耐已經聽到後面好嘈，一個有少少年紀嘅男人一路行一路自言自語鬧空氣，經過我身邊嗰陣聽到佢講一句：「見埋啲咁嘅人嘥鳩我時間！」個鳩字唔係我加上去㗎，原汁原味表達啫，因為個男人真係咁樣講。
咁我奇怪就自然會望，只見個男人一支箭行出去reception，推門直接就咁走咗，佢咩事咁嬲呢？去廁所定係落街呢？隔咗陣我身邊又有個著得好formal嘅女仔行過，孭晒袋拎住個file，直覺話我知佢唔係嚟見工就係見客，因為全公司同事都著得好casual，明顯同呢度格格不入。
好快我就有答案喇，因為有第三個人行嚟我身邊，呢個女人首先問我係咪見工，然後就話佢係約我上嚟嗰位HR，再連續講咗三句：「對唔住對唔住對唔住。」跟住直接同我表明，啱啱老細in完人發脾氣走咗，應該唔會再返嚟，所以我填完form可以走先，要另外約時間再見。
謎底已經解開，原來呢度有會議室，不過頭先有另一個人in緊，而衝出門口嗰位就係老細，著得好formal嗰位係求職者，至於喺房發生咗咩事就唔知喇，點都好啦，話人嘥鳩時間再逃離現場，呢個老細嘅EQ同處事作風都唔多掂喎！
一場嚟到填完form冇得in，我仲未嚟得切嬲，個HR又講多幾次sorry，睇得出佢好驚，唔知係驚我發火定係驚老細走咗去唔知點收科，完完全全感受到呢位HR喺惶恐下工作，突然覺得成間office死氣沉沉唔係偶然。
你話我脾氣好又得，話我憐憫個HR又得，咁佢真係道晒歉，同埋當時目睹事發經過，冇人想搞成咁嘅，當然佢可以自己in咗我先啦，不過橫睇掂睇呢位HR都係冇得話事㗎喇，分分鐘轉頭仲要畀老細鬧一大餐，諗返嗰句「見埋啲咁嘅人嘥鳩我時間！」如果冇讀解錯，說話中一樣係怪責緊個HR揀CV冇眼光。
同朋友講返呢件事，佢哋全部話我好慘，上到去填完form都冇得in，但我又唔係咁睇喎，一啲都唔慘，係幸運至啱，好多人去到新公司都需要一段時間先睇清楚真面目，而家我即場見證一幕真人show，唔會take錯offer，可以專心返2月中嗰份工，咁樣唔係仲好咩？