「隔籬部門新嚟嘅女同事幾正喎！係咪叫Eliza？有少少肉地，見佢好鍾意笑，都幾靚。」講呢番說話嘅係George，佢似乎對呢個叫Eliza嘅新人好有興趣，lunch time嘅時候滔滔不絕向我同Mathew講呢個女仔，仲話下星期想約對方食飯，問我哋介唔介意？
想徵求我同Mathew同意，係因為我哋三個男仔係固定飯腳，Mathew冇乜所謂，反而我唔係太想，到時George就會扮晒君子好作狀，係男人都明㗎啦，多咗個女仔喺度實會收斂啲，仲要係隔籬部門新女同事，我驚冇乜話題仲尷尬。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
讚咗幾日Eliza，George終於行動，見到個衰仔成日借頭借路襯Eliza斟水就行入pantry，仲好成功咁傾到計，點知原來約食lunch失敗，因為George後來同我哋講返：「佢話呢一兩個星期唔係同自己部門食，就係同佢出面啲朋友食，妖！藉口啦！扮上菜啫！」
George雖然一路喺我同Mathew面前話Eliza扮上菜，但你睇得出個衰仔仲係好冧人哋，九唔搭八走去買禮物送畀Eliza，係C字頭嗰個牌子嘅iPhone case，仲要印咗人哋個名上去，點知Eliza竟然唔收……
George：「特登整個電話殼畀佢都唔要，印咗佢個名㗎嘛，大大隻字Eliza，你叫我而家點算吖，搵返個又係叫Eliza嘅女仔送出去呀？佢應該睇唔起我哋，呢啲女擺到明係釣金龜㗎喇！」
我：「咩睇唔起我哋呀？你送禮物人哋唔收之嘛，關我同Mathew鬼事呀？」
其實據我所知，George把口係話人釣金龜，但依然屢敗屢戰，只係檸檬食多咗，幾個月後George就有啲因愛成恨，次次食lunch都向住我同Mathew講Eliza壞話，而且句句都難聽過粗口，完全展現咗「吃不到的葡萄是酸的」呢個道理。
George：「你睇Eliza嗰啲衣著呢，唔似普通女仔，你哋估佢係咪兼職跑私鐘？個款頭都有啲似。」
Mathew：「你講嘢咪咁難聽啦，因住其他同事聽到呀！」
我：「咪係囉，呢個茶記好多公司人會嚟食㗎，隔牆有耳呀！」
儘管我同Mathew都告誡過George要積口德，但係個衰仔溝唔到女似乎受咗好大打擊，幾乎每次食lunch都會講啲難聽說話侮辱Eliza，呢種係咪心理唔平衡呢？
George：「Eliza呢啲女應該好大食，你睇都知啦！邊條仔娶到佢就慘喇，肯定紅杏出牆！」
George：「見唔見頭先Eliza同公司個鬼佬傾得幾開心呀？哦，原來鍾意食洋腸！」
George：「原來Eliza對腳都幾粗㗎喎！今日見佢著短裙先睇得清楚，呢啲咪係甲組腳囉！」
以上嘅難聽說話都係出自George把口，其實唔止咁少㗎！不過事隔太耐，我都好難一字一句全部記得，因為George幾乎每日lunch都向我同Mathew係咁講，勸又勸過，話又話過，George仲係咁賤，所以我哋對耳一聽到呢啲說話都會免疫，絕對唔會畀反應。
後來有一日，Eliza竟然主動向我同Mathew話一齊食lunch，我都未嚟得切畀反應，Mathew就話冇問題，George知道後仲好興奮，又提議唔好食茶記，話不如去食lunch buffet喎！痴孖根！冷靜啲啦！
結果我哋一行四人都係去咗茶記，一如所料，George喺Eliza面前變返謙謙君子，但意想不到嘅係，啲食物未到嗰陣，Eliza忽然翹住坐佢旁邊嘅Mathew……喂！咩事？
我同George都睇到呆咗，跟住Mathew笑笑口大方承認：「我同Eliza拍緊拖，本身唔想咁高調。」
Eliza：「係呀，因為我叫Mathew陪我食lunch，佢成日話要同你哋食，以後我要分返佢啲時間，最多一三五同我食，我放Mathew二四同你兩個食啦！」
我晴天霹靂係估唔到Mathew收得咁埋，而George晴天霹靂就因為……自己知自己講過啲咩啦！
我：「你兩隻嘢吖！幾時開始㗎？不如結婚派帖先講吖嘛！」都要搞下笑緩和氣氛嘅，我又唔係鍾意Eliza，衝擊純粹係因為估唔到啫，好在從來冇喺Mathew面前講過Eliza壞話，平時我仲有份喝止George抵毀人。
Mathew：「都三個月㗎喇！」
Eliza：「係喎，三個月喇喎，有咩表示？同我去邊度慶祝？」
睇住Mathew同Eliza打情罵俏，係sweet嘅，真心替佢哋高興，不過咪住先，拍咗拖三個月？上個月George先話Eliza好大食，一定會紅杏出牆，兩個星期前George仲講緊Eliza鍾意食洋腸，再計清楚啲，George話Eliza兼職跑私鐘嗰陣，Mathew應該啱啱同Eliza開始……
我睇住George全程飯都好尷尬，冇咩講嘢，笑得好牽強，你唔明㗎喇，唔係溝唔到女嗰種尷尬，係佢一路講緊Eliza壞話而又唔知Mathew係人哋男朋友嗰種……我唔關事都想搵窿捐，George不如直接鑽落去地核啦！
George：「你估Mathew有冇同Eliza講……我之前咁話佢吖嗱？頂！陰我咩？拍拖又唔早講！」噚日George先咁樣問我。
我：「咁同事拍拖唔想公開好合理吖，奉旨要同你報告咩！你唔覺得Eliza嗰次突然一齊食lunch就係一個訊號咩，擺明係要嚇你一跳，即係佢乜都知，一早叫你講嘢唔好咁賤格啦！」
其實George而家同Mathew嘅關係都疏離咗，點解？因為Eliza真係勁憎George囉！Mathew私下同我講咗喇！你話George幾樣衰吖！（完）
【香港職場】下屬喺office影婚紗相兼擺酒 老細：你兩公婆有冇咁鍾意公司呀？
