「Oscar！叫人吖！唔准咁冇禮貌㗎！」老細帶咗佢個仔Oscar返嚟公司，聽講成個暑假都會喺office打躉，呢個讀緊幼稚園嘅小朋友可能怕醜，所以唔肯叫人唔肯望人，淨係掛住玩手上嘅玩具，不過成班同事都圍埋去氹佢。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
Oscar熟悉咗環境之後就「正常返」，開始周圍跑周圍跳，有啲同事都會主動撩老細個仔玩，不過唔包括我🤣因為我自己麻麻地小朋友🙈仲要喺office，最好咪阻住我，淨係想快快脆脆做完嘢收工返屋企。
其中有個同事Stanley臨放工竟然問老細：「我可唔可以帶埋個女返嚟公司呀？佢同Oscar差唔多大，暑假有個伴吖嘛！」唔係啩！Oscar習慣咗之後已經喺office搗亂同大叫，而家仲要加多個？
老細：「梗係可以啦！Welcome㗎！有人陪Oscar玩冇咁悶。」🤦🏻♂️
平心而論，老細容許員工帶埋小朋友返office應該係德政，帶唔帶係個人決定，最緊要有得揀，雖然我冇小朋友，不過都會覺得啲家長喺暑假會好頭痕，始終唔使返學吖嘛。
Stanley：「早知老細帶個仔返office，咁我就唔幫個女報埋啲暑期班啦！」
我：「你唔係因為個女暑假冇人湊先帶返office咩？」
Stanley：「唔係啦！婆婆平時會湊佢，但我想個女同老細個仔玩熟啲吖嘛！」
我：「你又話個女同Oscar差唔多大，即係讀緊幼稚園啦，玩熟啲又點呀？唔通對襯家呀？」
Stanley：「咁梗有幫助嘅，啲小朋友熟，我同老細都close啲啦，又多咗話題，你唔明㗎喇！總之帶佢返office得益肯定多過上咩暑期班。」
我get唔到，明明幫個女報咗暑期班都唔上，明明有婆婆湊又唔要，特登帶個女返公司陪老細個仔？咩玩法？不過可能我唔係家長，又冇小朋友，所以代入唔到啦！
Stanley嘅如意算盤唔知算唔算打得響，因為佢明顯多咗機會同老細傾計，雖然都係圍繞住小朋友嘅話題，但我諗都叫做如願以償啩！不過佢個女就似乎唔多開心，因為Oscar都幾霸道，真係有啲小霸王feel，佢走去搶Stanley個女啲玩具，仲差啲用玩具車打落Stanley囡囡個頭度，好在有人見到及時阻止咋！
總之兩個小朋友就點都玩唔埋，Stanley個女明顯係好驚Oscar，亦都唔鍾意同Oscar玩。
咁樣嘅日子過咗幾日，有次接近放工嘅時候，Stanley個女突然放聲大哭，原來係Oscar成杯橙汁倒瀉落Stanley個女嘅小書包度，咁我都相信係冇心嘅，小朋友倒瀉嘢係家常便飯，不過Oscar見到人哋喊，唔知點解又喊埋一份，正當同事忙於幫佢哋清理現場嗰陣，Stanley竟然老遠衝埋嚟鬧自己個女。
Stanley：「係咪呢！都話咗你唔好咁論盡㗎啦！倒瀉晒喇，仲整到Oscar成手都係，快啲同Oscar道歉！」
老細亦都喺遠處行埋嚟，其實老細係好輕鬆，反而Stanley勁緊張，唔知頭唔知路又再鬧自己個女：「同Oscar講對唔住呀！有冇禮貌㗎你？我平時點教你呀？快啲同人講對唔住！講啦！」
我：「喂，Oscar倒瀉橙汁，唔係你個女倒瀉呀！你迫佢講咩對唔住呀？你又睇唔到咩事，傻㗎你？」
Stanley見到老細愈行愈近，成個人更加緊張：「點會係Oscar？一定係佢，佢平時喺屋企都成日倒瀉嘢㗎！」
老細唔知發生咩事，但係處理得反而更好，老細話：「小朋友係咁㗎啦，唔使咁緊張，同佢哋去洗手先，個書包濕晒喎！入面啲嘢有冇濕呀？快啲抹下先啦！」
Stanley仲係起勢咁怪責自己個女：「你睇下你幾百厭，幾多哥哥姐姐要幫你執手尾！仲搞到Oscar喊！」同一時間，Stanley又向老細道歉，話搞到Oscar喊唔好意思，當時其實佢個女仲喊得犀利過Oscar囉！你不如顧及下自己個女嘅感受先啦！
冇錯，Oscar係老細個仔，但都唔一定啱晒㗎！平時大人返工唔多唔少都要睇人面色委曲求全，你而家仲將呢種行為擺落去小朋友嘅世界？雖然Stanley個女仲好細個，但可能會記得同埋影響成長，如果你為咗迎合同討好老細先日日帶個女返office，咁真係非常自私，仲要未了解咩事就迫個女食死貓，我諗個小朋友跟你返工都唔會開心，甚至係摧毀咗個女嘅暑假。（完）
《日本職場》幫人溝女做間諜 便利屋起家賺第一桶金
https://hkofficedaily.com/?p=24708