有個罕見姓氏 原來係咁累事:「小姓卞」

唔係靚女,唔係靚仔,唔係皇親國戚,不過公司裡面有位同事仍然掀起一陣話題,所有嘢都源於佢嘅罕見姓氏,要講就要由收到佢份CV嘅時候開始,因為我阿姐第一轉冇叫到佢嚟interview:「唔知佢個姓點讀,古靈精怪!」

呢份CV係我揀出嚟,個candidate姓卞,完全match晒個position嘅要求,但係對方冇英文名,就係姓「卞」+個名「X基」,阿姐話如果打去就咁叫後面兩個字好似懶熟咁,既然唔識讀就唔搵呢個candidate過嚟見工……咁都得?

第一轉幾個candidate都畀個經理ban晒,咁我就奇怪喇,明明姓卞嗰位嘅profile唔錯㗎喎,睇返嚟interview班人嘅資料,竟然唔喺裡面?

我:「阿姐,呢個呢?冇嚟interview嘅?」

阿姐:「唔識讀佢個名呀!你識讀咩?」

我:「卞吖嘛!」

阿姐:「點讀話?」

我:「卞,辯論個辯音。」

阿姐:「古靈精怪,咁你打去啦,橫掂個Manager仲要再見人。」

咩古靈精怪啫?你話一個人著衫古靈精怪我明,因為點樣著係佢嘅選擇,你話一個人行為古靈精怪我都明,日常舉止係個人習慣,但係你點解可以話人哋個姓古靈精怪㗎?名就話可以自己改啫,姓係上一代留落嚟㗎嘛,佢冇得揀㗎喎!

好在撈返起呢粒滄海遺珠,因為佢真係好符合個職位,我同阿姐負責見完第一round,跟住就直接in埋Manager,成個過程半日內一take過搞掂,一早叫佢上嚟就唔使增加人事部嘅工作量啦!

Interview嘅時候都好好笑,我阿姐問人個姓點解咁難讀……唔通人哋回到過去問祖先咩!

卞先生:「係呀,好多人都話唔識讀。」

阿姐:「我差啲就唔叫你上嚟喇,又冇英文名,都唔知你個姓點嗌。」

你自己唔識仲要衝出嚟柒,未見過人唔識字都仲要覺得自己好威同埋理直氣壯。

卞先生:「之前都有人咁講過,曾經有朋友話介紹我去佢間公司做,最後我收唔到電話,問返至知道個HR唔識讀我個姓,索性放棄打嚟。」

你唔好咁啦,好似講到做呢行都唔識字一樣,我識讀呀,我阿姐唔識咋!

阿姐避讀人哋個姓,個Manager就keep住讀錯人哋個姓。

Manager:「啱啱嗰個姓電嘅ok,你叫佢星期一返工吖!」

我:「佢姓卞,辯論個辯音。」

Manager:「辯論個辯點寫?係咪便當個便呀?得啦,你叫佢下星期一返工。」

直至而家已經3個月,我仲耐唔耐聽到個Manager繼續讀「電」,睇嚟要interview嘅唔係一班candidate,而係一班喺度做緊嘅人……

卞先生有時又幾可愛,佢冇用英文名嘅原因,竟然係因為覺得自己嘅英文名好老土。

我:「好過而家人人都叫錯你個名啦,見工嘅時候又有人唔敢打嚟,或者你曾經錯失好多機會㗎,我都估唔到個姓罕有同埋難讀原來會咁累事。」

卞先生:「小學嗰陣老師幫我改做Peter,本身自己都想再改,不過用下用下,身邊好多朋友已經由細叫到大,後來連女朋友都話我個英文名好似好求其咁,仲問係咪細個嘅Miss求其跟英文教科書改,所以對住新識嘅朋友我已經冇透露自己叫Peter,佢哋通常叫我個名阿基。」

咪係囉!你啲friend就話叫你阿基啫,你send CV出去嘅時候,人哋公司同你三九唔識七,唔通一打嚟就嗌:「阿基,收到你份CV喇!」

唔識字係佢哋唔啱,但你知有時啲HR好似我阿姐咁,好鬼死要面㗎,唔識讀又怕畀人笑,自己又唔學又唔查,最終咪決定唔打嚟約interview囉,佢哋以為自己好多CV喺手吖嘛!

點都好啦,改個英文名始終係方便自己,Peter有幾求其啫?Mary我都識兩個,Tom就一個,好似仲有隊老牌組合叫Peter, Paul and Mary,有幾失禮呀?碧咸個英文名其實都叫David㗎咋,稱呼嚟啫!

後來佢終於採納咗我嘅意見,卡片有印英文名,不過印好咗再由Admin派發嘅時候又鬧出笑話,因為卡片上係中英對照。

Admin:「Peter你姓卡呀?」

Manager搭訕:「唔係呀,我最初都讀咗電。」

另一位同事:「我之前讀下。」

終於肯用Peter呢個名嘅Peter:「唔係卡,唔係下,都唔係讀電,小姓卞。」

我公司啲中文水平真係……


情侶座今日都有篇短文
4日3夜禁室培育 「完全唔覺自己去過大阪」
https://hkofficedaily.com/?p=22673

error: