「最衰老細要我接完放工之後，架車要泊喺佢屋企個停車場啦，如果唔係我朝朝車你返公司，咁你就唔使迫巴士喇！」我老豆講完呢句又真係唔會面紅㗎喎，不如放假嗰陣老細畀埋架車你揸去玩好唔好？
做咗一兩個月，老豆keep住每晚同我講關於老細嘅事，例如鍾意去邊度食lunch、見過啲咩人、老細個老婆係咩樣……其實我冇興趣知呀，佢好似覺得呢啲係情報，會對我喺呢間公司發展有幫助，真心煩！
老豆：「你知唔知我今日車邊個呀？老細個女呀！幾有氣質喎，仲幾好傾，美國讀書返嚟，年紀輕輕就創業。」
我：「唔該你返到屋企唔好再講公司嘢啦！老細個女係點關我咩事呀！」
老豆：「有時唔知啲有錢人點諗，下下住半山，你有車啫，你啲老婆仔女未必有車㗎嘛，老細個老婆都冇車牌，工人姐姐買餸幾唔方便呀！我哋個屋邨正好多，啲嘢又平，想食乜都有，老細嗰度想搵間7仔買包煙都難。」
我：「個個都係煙鏟咩，得你食煙之嘛，你返工唔好食添呀，一陣老細聞到唔鍾意㗎！」
老豆：「梗係冇啦，我返工唔食㗎！放心啦！」
後來有一次，我又聽到個同事講老豆壞話，仲要係我上司……
上司：「老細而家呢個司機真係好唔掂，九唔搭八喺度插嘴，冇啲禮貌，佢以為自己係邊個呀？ 以前球叔絕對唔會咁，如果老細唔喺度，我一定鬧咗佢十世。」
老豆梗係又唔知做埋啲咩奇怪嘢，當晚返到屋企已經好想同佢講，但因為一早約咗男朋友上我度食飯，費事咁失禮，所以我決定等男朋友食完飯走咗先話老豆，無奈我EQ低，忍唔到。
老豆：「我今日又車老細個女，佢人仔細細真係好叻，下星期又唔知去瑞士定邊度同鬼佬傾合作，佢又冇架子喎，對住我呢個司機都係叔叔前叔叔後，由上車同我傾到落車。」
因為上司件事已經谷住度氣，加埋佢又喺食飯嗰陣講公司嘢，嗰個moment等唔切男朋友走，我當場就爆咗，真心想問一句，你哋有冇人曾經覺得自己個老豆好冇出息？你哋由細到大真係一秒都冇出現過呢種諗法？
我：「夠喇，講咗好多次，返到屋企唔好講公司嘢，今日我上司先至話完你好冇禮貌，佢話你一路揸車一路搭嘴，究竟你講咗啲咩咁失禮呀？仲有呀，你成日講到老細個女點叻點叻，你知唔知點解人哋個女可以去外國讀書？點解可以話做生意就做生意？點解可以話飛就飛呀？因為人哋個老豆叻呀！但係你唔叻吖嘛！」
阿媽：「你點可以咁樣話老豆㗎！」
男朋友：「傾下計啫傾下計啫，唔好咁激動，伯母今日煲啲湯好好飲喎，我想要多碗呀！」
我：「你自己慢慢飲飽佢，我唔食喇。」然後我就一支箭衝咗出門口，我想落街唞唞氣。
男朋友追埋出嚟，全程冇出聲，只係默默跟住我，陪住我。
我：「你唔覺得我老豆好冇出息咩？介紹佢入去我公司做司機之嘛，半年未夠已經有幾個同事話佢唔掂，今日連我最憎嗰個上司都話佢冇禮貌，雖然冇人知我哋係父女關係，不過我仲係覺得好瘀呀，好想鬧返個上司轉頭，又唔想畀人知個司機係我老豆。」
男朋友：「仲有啲咩唔開心，一次過爆晒出嚟吖。」男朋友永遠係我最好嘅聆聽者。
我：「細細個去同學仔屋企，佢哋好多都有房，我唔係要求住半山吖，我想要間有門嘅房啫，點解我冇呀？之前仲要話我老細住半山好無謂，咩買嘢唔方便，醒下啦！佢自己冇本事住就話人哋傻，傻咩啫？慘得過人哋有錢請佢做司機！咩去7仔買煙好麻煩，人哋要親自去買煙㗎咩？人人都好似佢咁樣，講咗成世都戒唔到煙咩？仲有呀，佢話老細個女呢樣好嗰樣好，自己知唔知醜㗎？個老豆有錢，梗係樣樣都好啦，唔通好似我咁呀？」
男朋友：「其實你冇講錯呀，你老豆真係冇出息。」
以為男朋友會講啲開解說話或者維護我老豆，點知佢竟然贊同。
男朋友繼續講：「如果你老豆有出息，你就可以去外國讀書；如果你老豆有出息，你唔止可以有屬於自己嘅房，仲可以住大屋睇海景；如果你老豆有出息，你就唔使日日返工都咁大壓力，唔使驚上司捽數，唔使受氣，真㗎！你老豆真係冇出息，你講得冇錯，其實我老豆都冇出息，你記唔記得邊個Kelvin？我成日提起嗰個中學同學呢，佢老豆都冇出息㗎，仲有Mandy，我嗰個新嚟嘅同事呢，佢老豆一樣冇出息，因為呢個世界上有出息嘅老豆本身就係少數，與其話佢哋冇出息，不如話佢哋平凡，世界上平凡嘅人太多，你老豆係，我老豆係，我都係。」
我知道男朋友仲有嘢想同我講，所以我靜止咗聽佢講。
男朋友：「以前我好想去外國留學，但屋企冇錢，當時我已經有你呢種諗法，我老豆唔止冇出息，仲好要面，脾氣又差，好似從來未聽過佢承認自己有錯，我都試過睇唔起我老豆㗎，一個細細個好祟拜嘅男人，原來喺我大個懂事之後，先慢慢發現佢係咁平凡，我想問下你，你爺爺有冇出息，有冇本事？」
我冇回答。
男朋友：「照計爺爺都唔係好有錢係咪？我想像到你老豆就係覺得上一代冇本事，所以會好唔甘心，但係自身條件又唔算好，然後佢好努力咁做嘢，供你讀書，用咗大半世時間終於養大你，好喇，到你出身之後，你突然同老豆講：點解你咁冇出息，咁冇本事，係唔係好好笑？」
聽到呢度，我已經想像到一個循環，因為而家嘅我就係唔甘心，如果將來我有小朋友，一定會努力搵錢，將最好嘅嘢畀晒我仔女，希望佢會成材，但係話唔定有一日，我嘅仔女都會覺得上一代冇本事，累到佢哋捱得咁辛苦，累到佢哋喺殘酷嘅社會裡面被比下去。
男朋友：「所以我講真㗎，你覺得你老豆冇出息係事實，冇大屋畀你住係事實，要你介紹份工畀佢都係事實，問題係佢已經盡咗力去養大你，盡咗力令你成為有出息有本事嘅人，冇本事嘅老豆將佢能力範圍內畀到嘅嘢都畀晒你，咁有本事嘅你又畀咗屋企人啲乜嘢？」
自從嗰一晚之後，我情緒冷靜咗，而我老豆就成個人都靜咗，佢冇再喺屋企講公司嘢，公司裡面亦都少咗人討論呢個司機，因為老豆辭咗職。（未完待續）