你最快嘅辭職紀錄有幾快？未返就turn down offer嗰啲唔計。
有個朋友同我講，佢試過返一份新工，負責教佢而又即將離職嗰位女同事全程黑口黑面，上司走埋嚟問佢教成點，嗰位女同事竟然好似聽唔到咁，完全唔答，然後個上司又話食welcome lunch，個女仔一句「唔去！」就起身走咗。
頭兩三日都係咁，佢覺得好難受，自己又冇做錯嘢，點解教佢個同事態度咁差呢？不過就唔止對佢一個差嘅，個女仔好似嬲晒全公司嘅人。
去到第5日，我朋友總算同另外幾位同事熟咗，咁就順便打探下發生咩事，原來個女仔之前幫公司返大陸做嘢工傷，隻手縫咗幾針，但係上司叫佢唔好報，唔好搞大件事，甚至叫佢繼續返工唔好請假，條女嬲得滯去晒勞工處之後，公司方面先至識驚；另外，個女仔好多嘢幫公司出錢都未claim到，我朋友問係咪針對個女仔？另一位同事話唔係，呢間公司好多嘢都要員工墊支先，claim錢平均搞半年，然後我朋友終於明白點解個女仔當上司同間公司係殺父仇人，總之一星期過後，個女仔終於走得，我朋友亦跟住遞信唔撈，佢哋同一日last day。
我自己最快辭職紀錄係半日，冇原因，當年好細個，喺葵涌返工，做咩position都唔記得喇，只係第一日返工先見到有熟人，係中學隔離班同學，唔熟，但認得，全朝佢都用好奇怪嘅眼神望住我，加上當年我轉工當食飯，覺得唔自在所以lunch孭袋走人。
不過我有個朋友仲快，半個鐘。佢唔知去見咗份咩證券行嘅工，最初明明係請文員，傾好晒先返工，第一日返去嘅朝頭早，有條友自稱高層話文員個位已經full晒，所以position轉咗係投資顧問，即係呃啲阿公阿婆開戶炒賣嗰種，然後我個friend剷完個高層再剷埋個HR就頭也不回咁走。
我以為自己半日已經係一個record，真係一山還有一山高。