你會唔會畀多次機會前度?─情侶座

「你準備好未㗎?真係放得低?」

「準備好啦,都咁多年。」

「咁我哋公司3月再開返嗰陣預埋你join啦!」

我呢位朋友本應3年前就結咗婚,介指都買埋,仲已經進入同居生活,不過佢後來睇男友WhatsApp發現,另一半同個女人有親蜜床照,個女仔仲影咗啲制服相同自摸相畀佢男友睇,其中一個message係:「我唔喺你身邊嘅日子,畀你止止痕,你同女友做都要諗住我個樣呀!你啲精全部都係屬於我㗎!」

然後我個朋友就同佢條仔攤牌、分手、除戒指搬走,當然亦結唔成婚。

不過呢3年裡面,佢呢位前男友好似洗心革面一樣,唔止不斷追返佢同埋對佢好,仲行埋「伯母政策」,因為佢哋拍拖嗰陣,前男友已經見晒佢屋企人。

上年佢媽咪跌親,前男友差唔多日日都車伯母去睇醫生,另外,佢細佬要搵對唔知咩絕版波鞋,前男友又偷偷地去ebay bid返嚟送畀細佬,仲有好多好多例子,總之前男友對佢家人可以話係無微不至,雖然我朋友隱隱晦晦冇同屋企人講當初分手原因,但係估唔估到都好啦,前男友不斷付出,加上本身的確有經濟能力,所以屋企人係好想佢兩個復合。

佢媽咪不下一次咁樣勸過:「有咩事都算啦!浪子回頭金不換,有經濟能力好重要,佢有層樓,第日你嫁咗都唔使愁吖嘛!」

我好認真問過我朋友會唔會感動或者心軟,佢話會,唔止一次,但係每次諗起嗰啲床照、制服相、黑絲相,仲有嗰句:「你同女友做都要諗住我個樣呀!你啲精全部都係屬於我㗎!」我朋友就會覺得好嘔心同埋放唔低。

有人話浪子回頭金不換,亦有人話出軌係一種習慣,我都唔知邊一句係啱,最主要係當事人自己接唔接受到?底線又喺邊度?

最後我問佢係咪成日睇男友WhatsApp?

「Never,只係有一次入場睇戲,佢手機不斷震,我個位都feel到,叫佢睇下咩事,佢face ID unlock咗但唔撳入去,我只係見到啲Whatsapp title係佢爸爸send嚟,我話你覆啦,可能屋企有急事呢,佢一直話唔使理,睇完戲先,夜晚返到屋企又唔見佢check,擔心老人家係咪有咩事,終於我忍唔住趁佢行開咗,用密碼開嚟睇,個密碼係我同佢生日加埋6個字,click入去,佢爸爸個profile picture係全黑,最後一個msg係好掛住你,本能覺得唔對路,拉上去就見到一張齋著黑絲腿張開嘅相,當然仲有我頭先講嗰啲msg。」

其實聽完之後我錯咗一陣重點,如果唔叫「爸爸」,而改個女人嘅名做「媽媽」,當睇到「好掛住你」呢個msg嗰陣,會唔會合情理啲?我朋友當時又會唔會繼續碌返上去睇呢?

PS:最近收多咗好多朋友Inbox,大家都分享咗自己嘅愛情故事,甜酸苦辣都有,我會陸續問下當事人可唔可以匿名分享。

error: