禁咗晚市堂食咁耐，梗係要搵間特別啲嘅餐廳啦！位於旺角T.O.P商場嘅呢間特色新餐廳「No Money So Lonely」就岩晒喇～ 作為打卡熱選Mamaday嘅姊妹店，店面嘅裝修都絕對冇令人失望。以懷舊玩味嘅風格為裝修主調，朋友即刻話間舖隻色好「Gucci」，雖然我唔覺得有Gucci嘅味道，但最重要係每一個角落都係好好嘅打卡位！
「No Money So Lonely」係店內唔難發現佢地有個店名簡寫「NMSL」，連個名都咁有趣，唔知啲食物又會唔會有驚喜呢～ 餐廳菜式主打東南亞fusion，好多菜式都係從來冇見過嘅配搭！
⭐記得抹嘴墨汁卡邦尼配巴馬火腿意粉 $118⭐
好creamy嘅一款墨汁卡邦尼意粉，雖然墨汁味道唔算好濃郁，但意粉麵身夠煙韌有咬口，唔知係唔係自家嘅手工意粉，好有水準！ 另外呢款墨汁卡邦尼係可以轉配烏冬，相信都一樣會同個汁好夾，可以一試。
⭐貧窮是寂寞的拼盤＄96⭐
唔知無敵寂寞啲定係貧窮寂寞啲呢？食呢個拼盤其實一啲都寂寞！拼盤有薯條、冬陰功炸飯波、腐皮扎肉同秋葵蝦，以為係普通煮煮炸炸都唔會有乜特別嫁啦，點知個冬陰功炸飯波竟然有驚喜！ 咬落外脆內軟，而入面舊飯就有好香嘅冬陰功味，一口size唔會太heavy !
⭐冬蔭公大蝦比薩 ＄136⭐
邊估到連pizza都可以做到有東南亞嘅味道～ 寫到明大蝦就真係每一塊pizza都有隻大蝦係上面，啖啖蝦肉都不特止，冬陰功味都做到足，不過只有微微辣嘅程度，想過辣癮嘅話可能下一道菜會更加啱你心水。呢款係薄皮嘅pizza，食完都唔怕太濟，仲可以食埋其他菜式。
⭐辣的心太軟 ＄68⭐
想過辣癮嘅話就一定要試下呢款甜點！無錯，竟然食甜點可以做到咁嘅辣度真係好意外，有辣味之餘，朱古力嘅味道一樣好香。就算唔好甜點嘅朋友都覺得呢款絕對係值得一試。
⭐八角柚子梳打咖啡 ＄46⭐
飲品就特別講下朋友嗌嘅呢杯「八角柚子梳打咖啡」，單單睇個名係好難想像到飲落去係咩味，其實飲咗都好難形容番個味道出嚟。朋友覺得好似飲緊湯水，而我就覺得似凍咗嘅涼茶～ 不過唔好誤會，呢杯絕對唔係難飲，朋友都成杯飲晒，只係一種唔熟識嘅味道。
由於我哋去嘅時候仲係餐廳嘅試業期間，唔知之後正式營業嘅菜單上仲有冇呢幾款菜式選擇，不過我都好肯定會再嚟呢間「No Money So Lonely」食嘢！畢竟願意做創新做呢種嘗試嘅餐廳都唔多，仲要整得好食，係絕對值得支持！
No Money So Lonely
旺角彌敦道700號T.O.P This is Our Place 4樓406-408號舖
聯絡及訂位：59212838 (Whatsapp)
圖文：MayM
版權所有，不得轉載
仲想睇下有咩好嘢食推介，就睇下👉呢到👈啦～