新同事星期六日覆電郵 獲老細公開讚賞夠勤力

唔知大家喺假期同埋星期六日會唔會覆email呢?本身我就唔會,不過自從請咗一個叫Keith嘅員工之後,我而家連放假都要覆喇,係咪好正呀?壓力仲大咗好多,連老婆都同我詐型。

一句講晒,我對星期六日同埋假期嘅概念好簡單,就係休息同埋陪屋企人,無論職位高低都好,追求理想係需要,不過打工賺錢養家永遠係大原則,工作盡責唔等於要賣埋私人生活同時間。

但係Keith呢位新同事唔知點解有鋪假期覆email嘅癮,最慘係咩呢,係啲email有cc我哋美國Office個鬼佬老細,星期六日走去覆,鬼佬老細咪睇到囉!

香港同美國公司每兩個星期都會開一次視像會議,鬼佬老細直頭喺個meeting度公開讚揚Keith,話呢位新人好勤力,叫其他同事借鏡,咁梗係啦,鬼佬係呢間公司嘅大老細,最好每個同事不眠不休日日做嘢,佢用老細嘅身份同埋角度當然係欣賞,而其實鬼佬老細係畀緊說話我聽,只係其他同事聽唔出。

點解咁講呢,因為有一次Keith喺星期日覆email,而嗰個email係需要follow up,本身呢啲嘢就星期一返工先至做,不過鬼佬老細就直接私下WhatsApp我,問阿Keith喺email入面講緊嘅嘢同埋查問進度,變相我唔可以等到第二日返工先至覆,要即刻答老細同埋即刻做嘢,嗰日我約咗老婆出去shopping,結果要拎埋notebook出去,老婆自己行街,我搵咗間餐廳坐低飲咖啡同埋做嘢,由於份工以前唔係咁,所以老婆就有微言。

其實已經有同事向我反映過,阿Keith星期六日覆email搞到佢哋有啲壓力,我心諗,你哋啲壓力會大得過我?

最麻煩係鬼佬老細直接喺視像會議讚過阿Keith,我作為上司嘅身份,唔通叫阿Keith唔好咁勤力咩,用我把口叫個下屬咁樣係有啲唔恰當,不過真係好想話佢知,大佬呀,你唔好咁痴線啦,搞到個個都好大壓力,做壞晒規矩呀!

有啲嘢開咗先例,以後星期六日唔覆email,老細就會詐型㗎喇,唔好咁笨柒得唔得!將來你拍下屁股轉工,我哋成班留低嘅同事就要繼續「秉承傳統」,放假都要覆嘢。

Keith哥,作為你嘅上司,我叫返你阿哥好唔好?有冇咁重奴性呀?放假可以陪下女,陪下爸爸媽媽,陪下朋友,再唔係得閒睇下書,打下飛機,人生除咗工作仲有好多嘢做㗎!呢度每年人工加幾百㗎咋,唔值得星期六日覆email㗎!再係咁落去老婆同我離婚㗎喇!

投稿:Jim

error: