我住屯門，本身有份工約咗今日見，地點係大圍成全工業大廈嗰頭，因為屯馬線通車，我內心都好似噚日電視個毒L一樣：「屯馬開通真的很興奮。」Fit晒啦係咪？如果見得成，直頭覺得呢條線係為我而設，點知今朝黑雨……
黑雨，Office工，約咗10:30 interview，身邊返文職嘅朋友除咗集體屌出聲之外，出咗門口未上車嘅就返屋企，未出門口嘅人就更加睇定啲，就算係出晒門上晒車，咁嘅天氣，都冇得苛求準時返到公司啦！
正路嚟講office就冇得返㗎喇，預咗個interview要改期，但我都想有啲交帶，結果照住上星期嗰間公司打嚟約我見工嘅電話，直接打過去睇下有冇人聽，由9:00打到10:15都冇人聽，心諗正常啦係咪，誰不知個HR 11:00打畀我，問我點解no show？
咁我就解釋返，一來黑雨，以為佢哋office冇人返工，二來真係跟住個電話打過嚟好多次，打極都冇人聽。然後個HR就話，打嚟約見工個來電顯示係唔知咩總機，只可打出，唔可以打入，又話如果黑雨取消interview，佢會一早打嚟通知我，冇通知即係代表冇取消，要如常見工。
個HR仲要寸到：「就算係黑雨，頭先十點幾都轉返紅雨啦！」
我：「但我住屯門喎，轉返紅雨都趕唔切出嚟啦！」
HR：「因為你假設我哋今朝冇人返office吖嘛，咁你仲見唔見？如果係就約你一陣2:30……」
未等佢講完，我已經率先搶答：「梗係唔見啦，黑雨都要返工，我戥你可憐呀！」跟住就直接cut線。
其實我想講粗口㗎，黑雨仲怪責我冇去見工，你話抵唔抵屌？但考慮到佢有我份CV，有晒我啲電話地址，所以費事去到咁盡。
閙還鬧，我內心都有少少失落，始終咁難得先有interview，又有條屯馬線，仲諗住一程過可以返新工，屯門人冇受到屯門公路影響，本身覺得幾幸福，而家又要重新搵過。
我唯有安慰自己，或者呢埸黑雨係嚟得合時，嗰間嘢連黑雨都要員工返工，個HR嘅態度又衰到咁，其實冇咗呢個機會都唔使恨。
屯馬開通真的很興奮？佢通車暫時都唔關我事，而家唔興奮喇。
投稿讀者：天文台幾時執笠
===
🙌🏻 我哋IG出咗新Filter，你save低咗未先？～
https://www.instagram.com/ar/529536555071130