大約兩年前，嗰陣去interview被奚落，對方質疑我點解成三十幾歲先轉行，又話年紀大學新嘢唔會做得掂，我有駁返佢，問如果覺得唔適合點解要叫我上嚟見，對方咁答：「我都想知呀，嘥晒啲時間，我一陣就出去鬧個HR，佢揀嘅CV真係好有問題。」
你哋公司內部冇溝通咁混亂，咁都要算落我頭上？HR唔係應該一早畀咗我份CV你睇，你睇完話ok，先至叫HR約人上嚟㗎咩？乜原來連咁基本嘅程序都冇，直到入房嗰一刻先睇我份CV㗎？我嬲到未in完就起身走咗。
已經唔係鬧唔鬧爆嗰間公司嘅問題，當時我搵咗幾個月工喇，精神狀況同心態都好攰，搵工搵到懷疑自己嘅能力同存在價值，我有時都會諗：「香港大大小小嘅公司咁多，唔通連一個容納到我嘅地方都冇？」
生活好多壓力，財政亦都有壓力，再累積埋連月以嚟嘅沮喪，成個人已經徹底崩潰，我落到地鐵站冇上車，坐咗喺月台其中一張長凳，諗下諗下就喊到收唔到聲，雖然唔係放工時間，不過月台人流並唔少，雖然有人會望，但冇人會理，期間有個職員問我係咪唔舒服，我話冇事。
情緒一時間好難平伏，過多陣有個人拍我，最初以為又係職員。
「小姐，冇事吖嘛？畀包紙巾你先啦，拎住。」
我抬起頭望咗眼，係一個同我差唔多年紀嘅女人，佢坐落嚟我旁邊。
我：「冇事，我自己有紙巾，唔該晒。」
「唔知你咩原因咁難過，但我以前都試過喺條街喊到收唔到聲，嗰陣時老公話要離婚，然後我阿媽畀人呃錢，走去炒唔知咩外匯，無情情就話欠人幾廿萬，原來福無重至禍不單行呢句嘢係真㗎，最壞嘅情況會一次過出現。」
聽完佢呢番說話，我忽然醒咗，但又唔知應該講咩，結果淨係識回應：「咁你ok嘛？」
「如果唔ok，而家都唔會坐喺你隔籬啦，我28歲結婚之後冇做嘢，老公叫我專心湊仔，有一日突然話要離婚，贍養費又時畀時唔畀，次次都要追，追到仲要特登入少啲，卒之我都係要靠自己出返嚟做嘢，前前後後6年冇打過工，以為做七仔好簡單啦，點知都係手騰腳震。」
我：「你仲要湊住小朋友？」
「係呀，離婚已經夠挫敗，仲要還我阿媽啲債，又唔鬧得佢咁多喎，我出去打工，個仔都係要畀我阿媽幫手湊，一陣佢虐待我個仔點算呀。」
我：「你好堅強。」
「唔係要同你鬥慘，雖然唔知你點解喊，可能你慘過我十倍，但係冇嘢係撐唔過，唔同你講喇，我趕住返工，包紙巾畀你啦！」語畢，呢位女士就起身，急步行入剛駛至嘅地鐵車廂。
慘十倍？我連佢10％都冇，抹咗啲鼻涕同眼淚，我上咗下一班車，抖擻精神返屋企繼續搵工，可能係物極必反，過多一個月左右終於有offer，而家仲做緊。
呢兩年每次覺得有壓力，每次想放棄，都會諗起嗰位安慰我嘅女士，好想親口多謝佢，雖然唔知道佢叫咩名，亦相信冇機會撞得返，但佢當時嘅說話的確令我諗通咗好多。
陌生人，你好嗎？其實每個人都有自己難捱嘅日子，路很長，但天總會亮。