「喂，聶生，我係Linda呀，我轉咗工喇，新公司想搵headhunt幫手請人，你哋係咪仲收緊15％？」
坦白講，每日接觸咁多客同埋求職者，除非係近幾個月內發生，又或者你係大大大客，否則真係要少少時間先load得掂，何況我年紀大又唔夠ram呢，未load到邊位Linda之前，唯有答：「哦，係呀？又唔係一律15％嘅，junior post通常係年薪15％，middle level 18％，senior或者再高級啲就20至25％，其實主要視乎佢年薪幾多，不如你畀新公司email我，send個update嘅rate畀你吖。」
我真係一個好假嘅肥仔，不過幾廿個Linda，一時三刻好難記，唯一可以肯定嘅係－－－對方唔係大客，甚至未開過單，因為做得成生意就要填好多form同埋send好多email，又要print呢樣嗰樣交去公司會計部出invoice，照計好難唔記得。
抄低個email之後，仍難掩心中嘅好奇，好在我有自己嘅database，雖然只係一個普通excel表，但就mark低晒細節，用個客英文名同埋姓氏就search到，例如有冇畀過discount？對方請過咩職位？send過邊啲求職者去……我主要用嚟方便自己做嘢。
點知唔search猶自可，一search把幾火，原來呢個客以前係就係搵過我請人，但次次都冇下文，好多時send完CV去又唔畀feedback，紀錄見到我安排過4個求職者去佢舊公司interview，當時全部人都劣評佢，包括填完form等咗接近兩個鐘冇人理、面試時態度不可一世、邊做interview邊打喊露玩whatsapp，最接近嘅一個case就係臨尾壓價，搞到我個求職者嬲爆turn down offer，一張單都冇開過，仲要兩年前，唔怪得對佢個名冇印象啦！
Recall返所有紀錄之後，我決定唔做佢生意。同日下午Linda又打嚟：「喂，仲未收到個rate，可唔可以快啲？新公司好多position，畀老細催我交人。」
我：「唔好意思，未得閒住，盡快叫同事send畀你。」
Sorry！我記性雖然唔好，但完全唔影響我記仇。
#學識點樣尊重求職者先啦