上星期見到「元朗學車 補鐘」個page登咗段WhatsApp對話，內容係教車師傅指出學生嘅不足，勸對方唔好考試之餘，仲話已經退返學費，呢個師傅真心好人。
我有朋友好多年前去學車，臨考試前問師傅有啲咩要注意？個師傅答佢：「注意幾時考第二次。」
結果我朋友唔止考第二次，total考咗7次……都唔pass，對所有香港市民嚟講係好事嚟嘅。
當年我考車好順利，正式揸車就喺加拿大，溫哥華地方大，生活節奏比較慢，係完全唔會覺得自己手車有問題，當地行車線等緊轉燈嗰陣，每架車之間足足會有一架車嘅距離，其實唔止揸車，喺ATM撳錢都一樣，當地人最少會同你保持兩至三個身位，喺香港撳錢就會feel到後面條友碌JJ貼住你C眼，所以我喺ATM好少check結餘，幾乎等於話畀後面條友知你有幾多錢。
後來返到香港就知死喇，以為揸車快過人哋搭的士咩？搵位等位先係最煩，停車場本身又窄，然後喺道路上希望見到車同車之間有一架車嘅距離簡直係妄想，後面個司機唔推你都偷笑，過紅隧更加要鬥智鬥力。
鳴謝當年喺香港坐過我車嘅每一位朋友，你哋係勇士，而所有朋友上車之前我都會問一句：「你自己買咗保險未？」
上年搬入屯門，我開始慎重考慮再買車，但之後喺台灣搵到份工，結果又打消咗念頭，點估到跟住疫情，始終同台灣有緣無份。
如果真係再買車，我會瘋狂補鐘同埋揸多啲，因為雪藏牌同埋Holiday Driver都係馬路炸彈，假設你哋已經買咗保險，到時可以考慮陪我操車😂