Speed dating公司經常會遇到啲擇偶條件離晒地嘅客，有50幾歲阿叔講明要搵26歲以下嘅女仔，亦有阿姐話要小鮮肉，對於呢類客人，我早已經見怪不怪，不過近期遇到一位女士列出幾個同錢有關嘅條件：
「最好佢月入5萬以上，你知啦，買層大少少嘅樓都要過壓力測試嘛！呀……如果佢本身已經有樓仲好，另外有車會加分，平時出街唔使迫公共交通工具。」
「未講完未講完，之前去過另一間speed dating公司，你啲行家介紹個做地盤嘅男人畀我，話做判頭㗎喎，佢搵到錢呀，不過污糟邋遢呢，出嚟食飯見佢成身都係灰塵，我想要著西裝返office，斯斯文文嗰type。」
今次特別想分享，係因為佢嘅要求令我陷入沉思，我月薪冇5萬，又冇車又冇樓，難道就冇資格拍拖或者結婚？
女朋友Kelly聽完之後，就同我分享佢嘅感受：「其實我以前有得揀一定揀搭車，Uber梗係舒服啦，小巴或者巴士都冇問題，最緊要唔使行咁多路，不過自從同你拍咗拖，我竟然鍾意行路。」
「我仲搭得起小巴或者巴士㗎喎！」
Kelly：「早兩日套戲其實有啲悶，但睇完戲我都係想同你慢慢行返屋企，雖然有少少遠，商場返我嗰度要行45分鐘，不過我真係想行耐啲，最好有幾耐得幾耐。記唔記得我哋做咗好多白痴嘢？沿途唱歌之餘，你又考我知唔知邊個係游飈？邊個係李天翔？邊個係王偉樑？話呢啲都係由細睇到大嘅電視台綠葉王，喂！邊夠ram記咁多名呀？後來你google呢幾個藝員張相，我又真係全部認得喎！你個腦究竟裝咩㗎？係咪用嚟記呢啲嘢，所以成日唔記得我講嘅嘢呢？」
我記得嗰一晚，好普通平凡嘅一晚，兩個人睇咗場戲，200蚊，跟住去大快活食飯，好似100蚊鬆啲，total 300蚊，唔係咩奢侈嘅消費，不過大家好開心，行返Kelly屋企條路又真係幾遠，但冇冷場。
Kelly：「我小學已經喺度住㗎喇，以前我會聽住歌喺心裡面哼，冇人喺隔離唔敢唱出聲，冇諗過而家會遇到個男仔陪我行呢條路返屋企，又陪我漫無目的咁喺條街度hea下hea下，好似啲邨童死都要躝街咁，其實都係想見你耐啲啫。我唔識咩大道理，只係想同你講，我哋一齊嗰陣嘅開心同感動，似乎都同金錢無關。」
搵另一半好難完全冇要求，但若然一開始就將所有要求同金錢掛勾，其實呢一段已經唔係愛情，某程度上只係一場交易。你要求個男朋友月薪5萬，返中環，有車有樓，如果對方具備以上條件，我唔相信佢搵女朋友會無任何條件。