有個friend上星期經親戚介紹搵到份工，個僱主問佢可唔可以「試工」兩日，睇下大家啱唔啱先？
我：「好耐冇聽過『試工』呢個詞語（以前做報紙雜誌真係有人要求試工），有冇問過試工ok係咪計返呢兩日嘅錢？如果唔ok呢？呢兩日又出唔出糧？佢招聘廣告又係叫candidate嚟試工呀？」
朋友話：「呢兩日唔計糧呀，不過冇所謂啦！我真係有心做，聽落都唔係太難嘅，普通文職啫，何況又係親戚介紹，唔使計較啦！佢哋冇出招聘廣告㗎。」
你問我就一定唔贊成，個個都免費試工兩日，成個職場秩序肯定不堪設想，呢間試兩日，嗰間試兩日，一個需要工作嘅人咪愈嚟愈窮囉！
Anyway，朋友唔係徵求我意見，佢只係想分享呢件事，所以真係去咗試工，然後個僱主讚佢唔錯，不過頭兩日只係跟啲普通嘢，嚟緊會再教多啲，希望佢試多三日，啱啱好試足一個禮拜。
我朋友覺得個心唔舒服，上星期五臨放工都冇正式講係咪轉正，而佢之前send CV出去又咁啱有份工約interview，約咗星期一見工（即係噚日），佢直接問個僱主：「請問我係咪可以正式受聘？如果唔係，下星期我會去見另一份工。」
僱主反問：「介唔介意試工直至6月10號？到時教晒啲嘢就可以正式開始。」
朋友再反問：「咁由第三日開始直至6月10號係咪會計返人工？」
僱主答：「如果真係適合，6月11號先正式計糧。」
😳😳😳😳😳
聽到呢到，我忍唔住要打斷佢：「你唔即場開佢波嘅？等中秋呀？」
朋友：「親戚介紹，費事咁寸啦！不過最嬲都係同返親戚講嗰陣，佢反而怪我點解唔答應？話咁樣好難交代喎！」
係咪我EQ特別低呢？定係我身邊啲人EQ特別好？唔評論佢開唔開波喇，淨係有一個道理想講，聽得入耳就聽啦～～～你嘅慷慨同埋大方，人人都會鍾意，不過唔係人人都會珍惜。
我都係過來人。