優先考慮嗰啲優先考慮你嘅人

其實係有個keep住contact嘅candidate同我講,早排佢見咗兩份工,A公司呢份係自己搵嘅,B公司嗰份就係agent介紹。

A公司朝早見完,下晝已經出offer,不過佢比較鍾意agent介紹嗰份,原因係B公司大啲,加上又係剛剛interview完,所以就同出咗offer嘅A公司講,希望等埋另一份嘅消息先。

一星期過後都未有消息,佢唯有打畀agent,請對方幫忙跟進B公司嘅結果,另一方面就同A公司交代聲,預咗人哋唔會再等,點知A公司個HR好nice,話真係覺得佢適合,暫時唔會出job ad,始終優先考慮佢,不過都想盡快得到回覆。

Agent嗰邊一直同佢講high chance,叫佢hold住唔好accept A公司嘅offer,等等下已經接近三個星期,無可奈何要再追問agent,先得知B公司突然frozen咗個position(其實我估可能已經請咗人,或者我多疑啦),佢又心急又帶點內疚搵返A公司,人哋話……

「諗住過多兩日就再出job ad請人㗎喇,而家咁就好啦,聽日返工急唔急得滯呀?」

佢答:「唔急呀,多謝你等咗我咁耐。」

好在咋!

我出張圖嘅時候,同事未睇內文,佢問我點解轉行寫感情嘢😂原來唔同嘅人睇到呢句會有唔同解讀,喺生活中,試下優先考慮嗰啲優先考慮你嘅人吖,當年我自薦寄咗啲稿去報館,雖然第一間搵我嘅係細報館,有兩間大報館隔咗兩個星期先contact我,不過諗返轉頭,我又真係冇後悔亦冇揀錯。

另一個同事就話,有時見到啲job ad會打住「優先考慮新移民」,咁咪由得佢哋囉,呢啲工唔係最想請香港人,我都唔會優先考慮佢哋。

error: