噚日in咗個好等錢使嘅求職者，首先我公司請倉務員，呢位哥仔見工嗰陣同我講：「你請我啦！我真係好需要呢份工㗎！」
佢態度誠懇，而且好積極，當刻的確有啲加分，不過感動唔夠兩秒，佢已經接住講落去：「我趕住借錢呀！財務公司話一定要有份合約先借到，唔使返工住都得㗎，最緊要有合約，今日簽唔簽到？」
我：「吓！」
畀佢殺個措手不及，好坦白喎！欣賞你，同時都好驚你，即係請咗都未必返啦！你要份合約啫！同埋你咁借法，容乜易之後有人上公司追數㗎！
我：「仲有其他求職者嚟見工，唔會咁快有決定。」打發佢走先！
以為件事完咗，原來未……今日收到呢位哥仔電話，佢直接打嚟公司，心諗你最多追問我請唔請㗎啫！點知佢完全唔緊張份工，say完個hi，講咗自己係邊個之後，第三句就問我：「可唔可以借住幾千蚊嚟呀？5000夠㗎喇！下個月還畀你，你有我資料啦，知我屋企地址，唔會走你，唔該唔該！」
唔使唔該，因為我唔會借。
Interview見過一次，電話就傾過兩次，一次係叫你嚟見工，另外就係今次你打嚟借錢，唔好話5000啦，50都唔借啦！我幫公司請人咋，哥仔你借錢會唔會搵錯對象呀？