喺香港做headhunt嘅時候識咗個日本客，佢叫川淵，後來佢因為結婚而選擇調返去東京總部，期間我哋都有keep住聯絡，直頭做埋朋友，而家我定居東京，所以就因利乘便約佢出嚟食飯，原來有個candidate 6年嚟都冇放棄，一直想川淵先生請佢。
呢個candidate係一位叫momoko嘅香港女仔，當時唔係經我介紹，係川淵先生喺香港分公司出招聘廣告嘅時候搵返嚟，當時佢哋唔係要求candidate日文好好，反而係想請個人識英文同埋協調下香港工作嘅事。
川淵先生話同momoko做interview做咗個幾鐘，唔係因為對方好適合，而係呢個女仔全程都好興奮咁講自己好鍾意動漫，又分享鍾意邊個日本藝人，甚至用手提電話開咗份文件畀川淵先生過目。
「嗰份文件係momoko當年計劃去東京旅遊嘅行程，佢叫我畀意見，真係見到都頭痛。」
我：「咁你約佢上嚟係做interview，的確冇義務幫佢睇東京嘅行程。」
「睇下冇問題，但我見到佢嘅行程好密，一日去三四個景點，咁樣唔係旅行。」
去到尾聲，川淵先生都好似香港嘅見工步驟一樣，循例問下對方有冇乜嘢想問返佢。
「momoko問我，如果入咗嚟做，將來有冇機會被調去日本office工作。」
川淵先生間公司喺日本的確有不同地區嘅office。
我：「當年幫你請人做過research，印象中你公司喺大阪、福岡、広島、長崎、仙台、栃木等等地方都有office，不過東京就最大。」
「係，不過momoko明確表明只想去東京，因為佢話有朋友喺東京，大家都係動漫迷，臨走仲同我再三表明自己好鍾意好鍾意日本，佢話自己同大部分香港人一樣，都會當日本係家鄉。」
川淵先生最後「順利」結束咗個interview，基於習慣同埋一貫嘅做法，佢一開始有將自己嘅卡片遞畀求職者，momoko當然唔例外，結果佢哋之間嘅「緣份」就維持咗足足6年。Sorry，「緣份」唔係指愛情嗰種，而係講momoko 6年嚟都有contact川淵先生，最近一次係3日前，所以今次出嚟食飯佢先會無端端同我提起呢個女仔。
6年前見工失利，並冇削減到momoko想去日本工作嘅決心，佢仲同川淵先生講，咁多年以嚟都keep住send信去日本公司，3年前仲畀佢搏到個去東京見工嘅機會。
我：「其實呢個女仔都幾有毅力。」我想講不到黃河心不死，但唔識日文點講同埋點解釋。
川淵先生：「同意，而且momoko講得一口流利日語，佢keep住會email問我公司有冇工作機會，從文字同文法中睇得出佢嘅日文有下過苦功，有好大進步。」
我：「咁3年前佢去東京見咩工，你公司總部？」
川淵先生：「唔係，係另一間日本公司，佢自己上網搵，喺日本註冊咗個求職網，佢話自己同以前一樣，上到去interview就表達咗好鍾意日本，鍾意日本動漫，鍾意日本文化，鍾意日本天氣，鍾意日本禮儀，鍾意日本嘅一切一切，可惜最後人哋都冇請佢。」
我：「我諗佢犯咗一個錯誤。」
川淵先生：「我就係想講呢樣嘢，其實唔止佢一個，我之前喺香港見過好多求職者，佢哋都係有同一個問題，一直同我講好鍾意日本，好想去日本公司工作，好想嚟日本。」
我：「而佢哋係唔記得咗，無論有幾鍾意日本都好，咁樣係同間公司冇關係，公司唔係想請一個鍾意日本嘅人，而係想請一個幫到手嘅人，鍾意日本只係bonus，你如果幫到公司，其實唔使鍾意日本都得。」
川淵先生：「冇錯！6年前我同momoko做interview，其實仲有個日本同事同我一齊in，momoko走咗之後，個日本同事問我：其實佢鍾意日本關我哋咩事？」
公道講句，唔單單係香港candidate，即使係中國、台灣，甚至係其他國家嘅candidate，in日本公司或者想嚟日本做嘢嘅時候都會犯呢個錯誤，就係充分表達自己對日本呢個國家嘅喜愛，但忘記咗話畀對方聽，你可以為公司帶嚟啲咩？
以前做headhunt唔止一個日本客，另一間日本公司嘅HR曾經同我講，有次出隻招聘廣告請日本語N1程度嘅人，有個candidate上網搵到佢公司direct contact，打上去問唔識日文得唔得，多次重複自己好鍾意日本，想喺工作上多聽多講，將會報名學日文。
從某個角度睇，唔識日文都奮力打去間公司搏一搏嗰位candidate，仲有6年嚟都冇放棄嘅momoko，決心同埋毅力方面係值得嘉許，不過從公司或者企業角度出發，佢哋唔係開善堂，都唔係語言學校或者文化文流部，佢哋唔想知你有幾鍾意日本，只係想請個符合條件同埋幫到公司賺錢嘅人。
日本職場比你想像中現實好多，特別係對華人拋出橄欖枝嘅工作，佢哋looking for你嘅中文可以幫公司開拓呢個語言市場嘅客源，而唔係looking for一個喜愛日本嘅人。
我：「不如你提下momoko啦！」
川淵先生：「提咗喇，我叫momoko下次去日本公司見工，要show多啲自己嘅專長，而唔係展現自己好鍾意動漫同日本文化，佢反問我：點解呀？我好鍾意日本喎！」
希望momoko可以消化到川淵先生嘅說話，祝佢下次見工好運。