同Ian食完welcome lunch，我都對佢有好感，因為呢個小鮮肉好humble，我相信佢喺出面都有幾多朋友，又靚仔又大隻又高又斯文又誠懇，簡直係屈機。
從交談中得知Ian其實唔多鍾意做文職，原來佢之前返過一份full-time，但係唔夠一個月就冇做，嗰份工係健身教練，Ian已經考獲指定課程嘅證書，仲要喺一間大型連鎖健身中心任職。
我：「呢間嘢耐唔耐會有優惠，早排$100一個月，簽一年，我都有join呀，反正近屋企，又多分店。」
Ian：「咁有冇人sell你買堂？」
我：「就係知啲教練乞人憎，通常我係返工前去跑步，朝早7點幾啲教練未返工。」
一齊食lunch嘅Michael都有參與話題：「你唔鍾意sell人，所以就轉工？」
Ian：「可以咁講，其實做健身教練都預咗有銷售成份，見工已經講得好清楚，不過落到場之後親眼睇到佢哋嘅手法…..我真係唔認同，Senior開到聲叫我揀女人埋手，又話年紀越大嘅女人成功率越高，有一刻覺得自己做緊鴨。」
我：「咁個Senior嘅銷售策略都好正路，你咁靚仔。」
Michael：「咁有冇開到單？」
Ian：「冇呀，可能我面皮薄，所以就畀個Senior閙，又覺得班教練對我好排斥，個Senior仲叫我唔敢sell女就sell仔，帶我走去跑步機個area，監生撳停一個男人部機，即刻sell一次畀我睇。」
我：「監生撳停？跑跑下好容易出意外㗎喎！」
Ian：「係呀，我都睇到呆咗，因為個男人戴住耳機聽歌，全程冇理個Senior，然後Senior就撳停人哋，兩個人差啲打交咁滯，當晚我已經覺得接受唔到，第二日即刻辭職。」
唔使驚呀Ian，我哋公司8成係女人，你絕對唔會畀人鬧同埋被排斥，個個錫你都嚟唔切，加上健身教練同呢份文職反差太大，相信Ian喺度做會好開心，結果亦不出所料，試用期、一年、兩年，小鮮肉已經完全融入環境，萬千寵愛在一身，工作上好多方便，人人對佢都好nice，直情enjoy添啦！
Ian好鍾意同我哋食lunch，已經變成固定飯腳，佢話自己條team全女班，唔似得同我同Michael咁暢所欲言，我冇所謂呀，三個人有多啲話題仲好，更何況其他女同事知道我哋同Ian好friend，態度上有好大轉變，就以之前做乜都推三推四嘅Sabina為例：
我：「咦，原來Karen今日放假。」
Sabina：「係呀，好似話帶BB去健康院，你搵佢有事？」
我：「有份嘢要同佢夾船期之嘛，我聽日再搵佢啦！」
Sabina：「唔使咁煩啦，交低畀我同你跟咪得囉！」
我：「唔係咁好嘅，費事麻煩你啦！」
Sabina：「麻咩煩吖，我有嘢麻煩你就真，你咪成日同Ian食lunch嘅，佢真係冇女朋友㗎？我幫其他女同事問㗎咋！」
肯定信你係幫人問啦！
我：「冇喎，我問過佢好多次，佢都話冇女朋友。」
冇耍Sabina，因為太多人托我問過呢條問題，包括冷血阿姐，咁我雖然覺得有冇都唔關佢哋事，不過都好有禮貌逐個回答。
其餘圍繞住Ian嘅問題分別有：佢平時鍾意做乜？鍾意邊個歌星？有冇兄弟姊妹？拍過幾多次拖？鍾意乜嘢類型嘅女仔？會唔會行山？
答得到都會答，但我唔係樣樣都知，最過份嘅一條題目應該係：「Ian係咪基督徒？」
我：「食飯未見過佢祈禱，都未聽過佢話返教會，你係基督徒咩？」
「唔係呀，你知啲基督徒好麻煩㗎嘛，婚前性行為又話唔得。」
救命呀！已經諗緊婚前性行為，不如幫你地個仔改埋名，揀埋讀邊間小學啦好冇？
Ian都知道Office裡面好多女士對佢有興趣，不過就從來冇藉此攞任何著數，Michael提議過有食唔食罪大惡極，但Ian不為所動，幾鬼正直呀！所以咪話佢屈機囉！通常係仙女不食人間煙火之嘛，點估到小鮮肉正值壯年都可以抗拒誘惑，其實公司有幾個女同事係嗒得杯落㗎！
呢兩三年間我見證住公司嘅演變，唔係指業務上，而係講緊同事嘅態度同埋衣著方面，部分男同事比過往積極，可能知道強敵當前，輸外型都唔想輸工作表現，而女同事就唔使多講啦，以前冇化妝嘅而家化晒妝，著衫仲靚咗好多，有本錢嗰班更加三日唔埋兩日著低胸，真係目不暇給，我咪坐享其成搭順風車睇下囉！
曾經聽過一首歌唔記得邊個唱～～～投多一千次胎，唔夠你咁可愛，問下你阿媽煮乜鬼畀你食，願人人望見人人都愛，旺過旺才～～～每次望到Ian就會諗起呢幾句歌詞。
Ian收過女同事無數咁多嘅小禮物，以我所知嘅有小盆栽、保溫壺、手織頸巾、散紙包、健康坐墊，仲有人整過愛心飯盒畀佢，因為某日Ian冇同我哋食lunch，但係ig upload咗個愛心便當仲tag一位女同事，佢話禮貌上要多謝人喎，唉！做靚仔真係多著數，點解阿媽生得我咁醜樣呢！
夕陽無限好，原來已經近黃昏，兩個星期前Ian喺冇先兆下突然辭職，我同Michael當然覺得震撼啦，不過都唔夠一班女同事咁撕心裂肺，個個爭住關心佢點解要走，office嘅氣氛一片愁雲慘霧，我諗裁員都冇咁傷感，聽講HR同個會計阿姐喊添呀，誇張到呢！公司需唔需要安排一次集體心理輔導呀？
認真，我都唔捨得呢個後生仔，撇除佢高大威猛靚仔外型討好，Ian嘅性格真係得人鍾意嘅，由於好多人輪流約佢食farewell飯，我同Michael隔咗好耐先等到同Ian食。
Michael：「佢哋話你要幫屋企人做生意先辭職喎，原來係太子爺，咩生意嚟㗎？」
Ian：「其實都係隨便作個原因啫，阿姐留咗我幾次，我話老豆唔放人，一定要我幫手。」
我：「咁真正原因係咩呀？」
Ian欲言又止，但係我同Michael軟硬兼施，最終佢都肯講真正原因：「因為我男朋友唔鍾意。」
男…朋…友…
老鬼Michael身經百戰都口窒窒：「咦，你……又話……冇拍拖嘅？啱啱識㗎？」
Ian：「我冇話冇拍拖，同事成日問我有冇女朋友，咁我真係冇女朋友吖嘛，不過我有男朋友，拍咗好多年㗎喇。」
我收拾心情強裝鎮定：「哦，咁又係，我成日都問你有冇女朋友，早知轉一轉問你有冇拍拖啦，咁你又真係冇講大話喎，我都覺得奇怪㗎喇，你咁靚仔點會冇拖拍吖。」
Michael：「可能我保守，要少少時間消化。」
Ian：「Are you homophobic？」
忽然爆英文，唔知Michael係接唔到定係唔識解，我唯有衝出嚟擋：「唔係，點會呢，我身邊有朋友都係，而家咩年代呀？仲恐同？不過你有男朋友同辭職有咩關係？你向女同事講咗，佢哋好大反應？」
Ian：「唔係，除咗你哋，我冇特登同任何人講，但上次咪post咗張愛心便當相嘅，我男朋友見到之後好唔開心，其實佢都知我喺office有女同事追，所以近年大家磨擦多咗，算啦，反正自己想抖下，喺份工同我男朋友之間，當然係後者重要好多啦！」
Michael：「放心，我哋唔會同班女講，信我！」
Ian：「其實我唔介意，純粹係大家一直focus我有冇女朋友啫，咁我覺得私事又唔需要解釋太多，同埋我ig有post男朋友嘅相，雖然唔多。」
人哋點睇唔緊要，最緊要自己開心，話時話如果我未結婚兼後生二十年，遇到Ian都隨時會心動，呢個男仔係唔錯㗎！
距離Ian嘅last day越嚟越近，我亦都越嚟越擔心，好驚office啲女同事會打回原形，例如我阿姐，雖然佢間唔中都係會發脾氣，不過比起以前的確少咗，其實人之常情嚟嘅，成日望到靚嘢，心情真係會好啲，所以我好贊成每間公司起碼要請一兩個靚仔靚女看門口，唔打得都睇得吖嘛，希望Ian之後順順利利，同時希望office呢幾年少咗戾氣，可以繼續保持良好氣氛啦！
我同Michael都對Ian嘅真正resign原因守口如瓶，因為好多女同事依然覺得我哋三個好熟，熟到可以幫佢哋喺Ian離職後牽線再續前緣，冇所謂啦，大家嘅生活有啲盼望，始終係一件好事嚟嘅。
（完）