同Team有條友唔知係躁狂症定咩事，成日自言自語不斷爆粗，冇錯，發洩下係人之常情，但問題係我哋成班同事會畀佢嚇親，有時仲會搞到全場靜晒，氣氛極度尷尬。
條友平時係點呢，佢會無啦啦喺個位度講：「On99！」最尾個9字係重音再拉長，初時會望下佢，或者當同事關心下發生咩事，不過條友係唔會望返你，只會繼續用充滿恨意嘅眼神怒睥個mon，唔知以為佢望緊個殺父仇人儲緊小宇宙準備出超必。
同事成班傾緊計，佢又會喺個位大叫：「DLLM！仆街啦！On9！」然後重複幾次，雖然話見慣不怪，但有個人咁激動喺度屌空氣，本身傾緊計嘅同事都會靜晒。
我入嚟做咁耐，聽得佢講最多嘅字就係「On9」，真心，我聽佢講「On9」絕對多過聽佢講「早晨」，好多人話BB仔第一句學識講嘅嘢係「媽媽」或者「爸爸」，但我好肯定佢人生第一句學識講嘅說話係「On9」，可能係細個媽媽幫佢換尿片嘅時候就講緊。
有次超癲，老細同個客食完飯之後上嚟，路過我哋部門嘅時候，呢位同事又對住個mon好重怨氣咁講咗句：「On9！知唔知自己講緊乜呀？識唔識㗎？On9！」佢opening同ending都用On9包實句子，句子結構充滿連貫性。個客同埋老細聽到都呆一呆，氣氛極度尷尬，Department Head睥一睥呢位躁狂同事，不過條友每次屌空氣都係忘我境界，唔會理人，唔會答你嘢。
我哋試過關心佢，但佢不斷講On9 On9 On9嘅時係唔會回應，好似聽唔到其他人同佢講嘢咁。卒之有次我嘗試反客為主，正當佢喺個位度又用超重怨氣tone講On9嘅時候，我喺自己個位跟住講咗句：「係囉，On9㗎！」條友唔知係忘我定係唔想理我，隔咗幾秒又繼續屌mon：「On9！搞清楚先問啦！On9！」
我冇放棄，繼續喺自己位跟住鬧：「係啦，On99食賓周！On9！」
條友終於正視我，企起身望一望過嚟，我又望返佢問咗句：「On9㗎呵？你話係咪On9？」然後唔等佢畀反應，我又望返自己個mon：「Diu，On9！」今次學佢拉長尾音，條友坐返低，半日都冇再講On9，但個樣依然係「好嬲好嬲mode」，又唔知佢嬲邊個。
呢個方式只係止一止，隔幾個鐘佢又會故態復萌屌空氣again，冇㗎，想佢靜嘅時候我咪陪佢癲囉，只要畀佢知你會癲過佢，條友就自動收聲，呢招萬試萬靈。
躁狂同事，其實我好擔心你呀，香港地邊個做嘢唔谷氣吖，個個都好重怨氣，但我希望你用其他方式發洩，下下屌mon唔健康，仲會嚇親其他人，而家份工就話無所謂啫，第日如果轉工，新同事未必接受到你係咁On9 On9㗎！放鬆啲啦！有時全office靜晒聽你講粗口真係好老尷，我哋已經畀其他department問過好多次：「你哋Team嗰位同事好重怨氣喎，發生咩事？」問到我哋都唔識得點答喇，幫幫手，冷靜啲，畀下面啦！
認真，香港係好多壓抑，學當年巴士阿叔話齋，你有壓力，我都有壓力，所以絕對明白佢點解咁重怨氣，最好搵朋友傾下，再唔係同我哋成班同事分享亦得，最緊要唔好自己屈埋屈埋。
投稿讀者：翔