2018年5月3號，我請咗半日假去interview，記得咁清楚因為5月3號係我生日，而嗰間公司其實係我嘅supplier之一，工作緣故成日同對方接觸，多年嚟關係好好，當時正值自己想轉工，喺求職網站見到佢哋出咗招聘廣告，我第一時間打畀Liam問清楚。
「你公司請人呀？我有興趣呀！」
Liam：「歡迎呀，send你份CV過嚟吖，我直接畀阿頭，今日已經in咗三個人喇，係就快。」
慶幸自己冇乜得罪人，同呢個supplier平時都有兩句。
如是者，我講完之後已經被安排interview，2018年5月3號請咗半日假，見完工早啲返屋企換衫，夜晚再同女朋友出街食飯。
上到去之後，Liam先同我喺conference room傾咗一陣，然後佢就搵阿頭Benson入嚟，interview正式開始。
Benson：「成日喺email見到你個名，第一次見真人。」
「係呀，多謝你畀機會。」
Benson：「你就唔係啦，之前批R5433係都要我哋畀special offer，搞到老細向我同埋Liam詐型呀！」
「哈哈，唔好意思，你知有時各為其主，我嘅立場始終係幫公司拎最好嘅offer，如果將來有機會加入你哋公司，我都一定會盡最大努力，幫公司爭取最好嘅價錢。」
Benson：「明嘅明嘅，大家都係打份工啫，不過想問問你，之前你嘅角色係我哋嘅客，而家對調咗，雖然我知你好熟行情，喺呢行都有一定年資，但驚唔驚會唔習慣？」
「唔會，我有晒心理準備，學你話齋，雖然角色上係唔同，之後工作性質一定有差別，但我自己真係好熟悉個市場，我覺得product knowledge方面係今次轉工嘅強項，至少唔需要用太多時間去適應，至於心態上嘅調節，相信轉任何工作都會遇到。」
呢個時候Liam搭嘴：「Larry份人處事比較成熟同埋圓滑，Benson你記唔記得另一個長期拎R5433嘅客呀？寸到呢！成個大爺咁款。」
內心好感激Liam，佢擺明想喺Benson面前讚我，仲引用另一個西客做對比去托高我
Interview去到尾聲，Benson問：「Larry你同時間有冇見其他工？」
唔知點解，我對呢條問題有少少反感，因為初初出嚟搵嘢做都畀人問過，當年我答冇，對方即刻壓價，有時我會諗，唔通一個人搵工，淨係會send一份CV出去？淨係會見一份工？就等於請人嘅公司一樣，你都唔會淨係見一個求職者啦！
經一事長一智，今次我答：「都有㗎！但我最希望入你哋公司。」
就係咁，我順利完成咗呢次interview，Liam送我出門口嘅時候，我多口問咗句：「你阿頭Benson好似麻麻地滿意我，上次R5433單嘢…真係累你哋畀老細鬧？」
Liam：「妖，你聽佢講啦，我哋老細不嬲唔鬧人，得㗎喇，我幫你講多幾句好說話。」
只係隔咗一日我就收到Liam報喜，佢話公司決定請我，仲話HR等陣會打嚟同我詳細講福利同埋幾時返工等細節，雖然我生日係5月3號，不過真係好鍾意呢份遲來嘅生日禮物。
同佢哋公司個HR傾完電話confirm細節，得悉Benson想我一個月後即刻返工，雖然中間冇時間抖幾日，但總好過要early leave賠錢早走，所以我亦不敢怠慢，打咗封辭職信畀我上司Gordon，再戰戰競競入房搵佢。
「Gordon，唔好意思，阻阻你。」
Gordon見我拎住個信封，未等我開口已經問：「Larry你唔係resign呀？」
「係呀，你明㗎啦，雖然我好唔捨得，不過公司呢幾年嘅人工真係加得好少，我有幾個friend都係呢行，人工同佢哋已經有一段距離，我覺得連埋workload在內……自己應該趁後生試下唔同發展。」
Gordon：「明白嘅，其實有時我都想轉工，今朝先睇過求職網，你哋前幾年仲叫做$500 $500咁加，我直頭係凍薪。」
「凍薪？」
Gordon：「你知我哋老闆咩料啦！你講得啱，唔趁後生出去闖下，再老多幾年想轉都轉唔到，坦白講，你出到去個title應該唔止而家咁。」
一直以嚟咁想走，Gordon作為我上司一定會明白，除咗人工大幅落後之外，我對上仲有兩個老屎忽，佢哋心態已經係養老等退休，畀晒啲嘢我做，而無論你做幾多，又或者做得幾突出都好，始終唔會有機會升職，除非呢兩個老屎忽唔做啦，不過完全冇呢個可能性。
「多謝你明白我，不過估唔到你都會偷偷搵工。」
Gordon：「你知好喇，唔好畀老闆知，我好羨慕你，我要轉工有好大阻力，你知我老婆係英國人，佢一直都想全家搬返Birmingham，佢會叫我唔好搞咁多嘢，轉工不如返英國，再加上我個位又好難搵到同一行。」
「係喎，我哋公司有冇規定唔准轉返同一行？」
Gordon：「合約冇寫，不過就唔係咁好，你轉去我哋competitor？」
「唔係competitor，係supplier，Crown嗰間公司。」
Gordon：「R5433個supplier？好吖，不過你要幫幫手，唔好update LinkedIn嗰啲，費事公司其他同事見到又有說話聽，老闆問起我又難交代。」
「冇問題，我有LinkedIn但從來唔會update。」
Gordon：「過兩日私人請你食飯啦，last day再同佢哋成班食多次。」
一天光晒，最擔心嘅問題一掃而空，嗰年嘅生日真係好難忘，我要開始為自己喺呢間公司倒數，幾個同事同埋嗰兩個老屎忽都有問我之後做乜，但我選擇三緘其口，求其話幫屋企人做生意，以免講多錯多，其實佢哋唔搞事，畀我安安樂樂咁離開已經係恩賜。
幾日之後，我再收到Liam電話：「Larry，你辭咗職未？」
「辭咗啦，準時返工喎，唔使擔心。」
Liam：「唉，你個位hold住咗呀！Benson話要hold住。」
「吓！我遞晒信，同晒我大佬仲有同事講喇喎！」
Liam：「唔好意思呀！我都有同Benson傾，不過佢堅持要hold住個位。」
「唔係啩，咁而家點算呀？工又辭咗，你哋又反口唔請我，我咪變咗失業，乜咁搞法呀！」
Liam：「你可唔可以同你大佬收返封信呀？」
點收返呀？封信上埋人事部㗎喇……
2018年5月，畀我想像中更加難忘，有工變冇工，唔通要厚住面皮同Gordon講留低？公司好似仲未出招聘廣告請人，如果而家開口可能趕得切，但就好樣衰。
收到Liam壞消息當日，Gordon正正係約咗我食farewell lunch。
（未完待續）