我哋係英國公司，office勁多鬼，鬼佬鬼婆嗰隻鬼，咁通常請得嚟香港呢班都係senior或者高層㗎喇，亦正正因為咁，佢哋係有housing benefit package，即係公司依據職級畀錢租樓，實報實銷，over budget就自己補貼。
其中一個senior鬼佬租咗個勁大嘅單位，但租金就平到笑，公司都有問過點解咁抵，鬼佬話地產經紀已經講明係凶宅，至於點凶法呢？鬼佬竟然冇問詳情，自言唔驚呢啲嘢，雖然英文譯中文可能有少少誤差，不過大約嘅意思都係平生不作虧心事，夜半敲門也不驚咁啦。
鬼佬已經喺我哋公司做咗幾年㗎喇，以前成日要出trip，有時去上海，有時返英國，不過有3分2時間都喺香港住嘅，亦從來冇聽過佢遇到咩怪事，直至疫情期間冇得飛，公司有一段時間又容許同事work from home，我哋先知道呢間凶宅唔簡單。
話說有一次成班同事開視像會議，包括我在內嘅幾位同事都見到鬼佬後面有個小朋友行過，隔咗陣又見到個小朋友喺鬼佬後面跑嚟跑去，當時大家都不以為然，一來成班同事好認真傾緊嘢，氣氛算嚴肅，二來我哋唔了解鬼佬嘅私人感情生活，雖然知佢未結婚，但唔一定要結咗婚先有小朋友㗎嘛，何況西方人亦比較open呢！
隔咗一個星期公司仍然wfh，又係開視像，今次開到一半我哋都見到鬼佬後面有個女人拖住個小朋友，女人嘅樣睇唔清，因為長長頭髮遮住加上側身行緊去一個方向，但個小朋友就對住鬼佬部電腦，即係我哋個cam嘅視角正面揮手，幾個同事都好有禮貌咁笑住向小朋友打招呼，鬼佬個樣有啲困惑，因為佢見咁多同事無啦啦望鏡頭say hi，唔知我哋hi乜春，有個女同事就同鬼佬講~ ”Your son is so cute.”
”My son so cute？”
鬼佬唔知女同事講乜，回頭一望乜嘢都冇，喺我哋嘅角度，嗰對母子亦步出咗個cam影到嘅範圍之外，大家以為係行開咗啦，點知鬼佬話佢冇son，唔明我哋想表達啲乜，同事就解釋見到佢後面有個女人拖住小朋友，小朋友向我哋揮手，又問個女人係咪佢老婆或者girlfriend，而鬼佬就堅持當時屋內冇其他人，只有佢一個……
聽完鬼佬咁講，我係男人都嚇到起雞皮，所以大家決定傾返公事，其他嘢過兩日返公司先再講，因為有一刻諗過鬼佬係咪收埋老婆仔女唔想公開之類。
喺office攤開嚟傾嗰陣，鬼佬好坦白咁話冇老婆仔女，當時屋企的確得佢一個，不過唔會質疑我哋所講嘅嘢，因為佢已經聽聞過。
原來鬼佬有個香港女朋友，之前間中會去佢屋企過夜，但後來話每次留低瞓都會「畀鬼責」或者有怪事，例如耳邊傳嚟唔知講咩嘅怪聲、房門突然大力嘭埋、冇人嘅廁所聽到廁紙筒滾動嘅聲音、枱面上嘅嘢無故跌落地等等。
佢女友仲話次次過夜都一定「畀鬼責」，由於初期只係一至兩分鐘就回復正常，所以大家都冇特別擺喺心，直至有一次好過份，佢女友話發夢係當時睡房實景，有個小朋友喺熄晒燈嘅環境下竟然發出白光踎喺床邊，咁梗係大驚想拍醒鬼佬啦，不過全身郁唔到，掙扎咗好耐終於驚動鬼佬。
鬼佬話瞓瞓下畀女友嘈醒，因為對方郁嚟郁去又發出「唔…唔…唔」嘅聲音，個感覺係女友好似畀人掩住個口，想大嗌又嗌唔出，佢認為女友係發緊惡夢，結果就拍醒對方，當時已經係凌晨4點，佢女友嚇到半夜都堅持要call車走。
我哋問鬼佬，點解情況咁惡劣都唔搬？冇諗過鬼佬居然反問點解要搬，佢覺得間屋好抵，同一個價錢喺出面根本租唔到咁大，始終公司個allowance係有上限，佢唔想自掏腰包補差價，而家咁樣啱啱好。
其次係，鬼佬女朋友雖然唔再留低過夜，但佢覺得仲好，自己會有更多私人時間，而家女友只會日光日白上嚟，而且100%唔會留睡，佢覺得好happy喎！重點係即使間屋有嘢，我哋同佢女友口中嘅鬼魂根本冇騷擾佢或者嚇佢，仲講笑話鬼魂只係jealous，妒忌同佢接觸嘅人，特別係佢女朋友，所以鬼佬話自己一個喺屋企根本冇怪事或者怪聲，每晚都瞓得好好，次次都一覺瞓天光。
因為鬼佬只知道間屋係凶宅，曾經有人喺屋內離世，但唔知亦唔想知道發生咩事，佢認為冇必要，不過有同事就自己上網查呢個單位，坊間有好多凶宅網，基本上你有地址一定check到，加上嗰次視像會議令每個人都猶有餘悸，知得清楚啲，大家亦安心啲。
Check完之後發現，鬼佬間屋曾經有個租客疑患產前抑鬱，懷孕期間燒炭身亡，一屍兩命。既然鬼佬唔想知，我哋亦無謂特登同佢講，反正佢完全唔驚，仲話呢個世界有神自然有鬼，叫我哋take it easy，係佩服嘅，既然鬼佬先係用家，佢住得開心就OK啦！