雖然我份工嘅收入好可觀，不過壓力亦都好大，直至兩年前做咗爸爸，成個人先至冇咁繃緊，返屋企望住個女即刻冇晒戾氣，多謝老婆十月懷胎將曉彤帶嚟呢個世界。
我個女曉彤好得意，眼大大，肥嘟嘟，好鍾意笑，佢一直都係屋企裡面嘅開心果，無論做嘢幾咁辛苦都好，睇到個女開開心心，健健康康咁成長，真係乜都抵返晒，我同老婆啲朋友都一樣咁鍾意曉彤，成日叫我哋send個女啲相同埋video畀佢哋睇。
不過有一個人就好唔鍾意我個女，正確嚟講係一班人，嗰個就係我外父，仲有老婆嗰邊嘅親戚。
未結婚嗰陣我已經知外父重男輕女，因為我老婆個細佬係長期唔做嘢唔返工，得閒到日日喺屋企打機瞓晏覺，但外父仍然點我老婆做晒所有嘢，舉個例，閒日上佢屋企食飯，咁我同老婆都要返工，最快最快都六點先走得，我外父係會由下晝開始，不斷call個女要斬料、買啤酒、買煙等等，五點已經不斷催個女買嘢返嚟，唔好忘記佢個仔冇嘢做喺屋企攤屍㗎喎！
不得不佩服我老婆個細佬，佢唔係失業幾年咁簡單，佢係完全冇搵嘢做，但夠膽死話想買樓搬出去自己住，咁你搬你嘅事啦，外父竟然叫我老婆幫個細佬畀首期，仲要我老婆幫手供，咁同直接送層樓畀細佬有咩分別？
外父同佢個仔當時自把自為去睇埋樓，首期講緊幾廿萬，供樓講緊萬幾蚊一個月，我老婆冇佢自己嘅人生㗎？最後梗係拒絕啦，嗰次佢老豆嬲到想脫離父女關係咁滯，黐孖筋！
講起人生，外母生前講過，當年陀住我老婆嗰陣，外父曾經話如果生仔就自己養，生女就賣出去，話有個同鄉想用一萬蚊買個BB，好在我外母堅持唔肯，否則我老婆而家都唔知流落去咩人手上，聽到都覺得荒謬，我外父份人係唔識搞gag㗎，所以生女就賣出去絕對唔係講笑。
外父所有嘢都要我老婆做，家用亦都得我老婆一個畀，但就成日同人講佢個仔好叻好有用，個女就係蝕本貨，真係人唔笑狗都吠，佢個仔畀$0家用仲要問屋企攞錢，我老婆就賺兩萬幾畀成一萬蚊家用，冇個女撐住頭家你攞緊綜援啦！
好坦白講，我不嬲都唔鍾意呢個外父，只係畀面老婆咁孝順先至一直忍住，唔想老婆咁難做，直至今年農曆新年，外父同幾個親戚話要上我哋屋企食飯，我終於情緒失控大爆發。
其實我個女曉彤由出世到而家兩歲，外父同班親戚未停止過催我哋兩公婆生仔，唔係偶爾喎，係次次都提呀！佢哋話生女冇用喎！
因為今年疫情關係，太多人唔方便出去食飯，我同老婆間屋比較大可以容納多啲人，所以外父就帶埋親戚上我度食新年飯，不過佢哋成餐飯係咁重複又重複話曉彤係蝕本貨，話咩得意又點吖，最後咪又係蝕底畀男人，又話女仔唔使讀咁多書，當時我個女坐咗喺度㗎，雖然得兩歲人仔好細個，但你地識唔識尊重？
我愈聽愈扯火，為咗撳住自己所以入廚房洗定啲碗，唔想再聽班人講嘢，點知我外父突然導遊上身，帶啲親戚走去參觀曉彤間房，猛咁指指點點話粉紅色唔好，太多公仔唔好，床單咁女仔唔好，叫我哋換晒佢，改過間房將來生仔用，可能大家會覺得好小事，不過我就忍無可忍，喺廚房衝出嚟大聲喝咗句：「全部同我躝！」
班親戚呆晒問咩事，我話曉彤係我嘅命根，你班人踩夠我個女未？仲有間屋係我賺錢買嘅，唔輪到你哋指指點點！你哋認真又好講笑又好，有咩資格要求我個女間房點樣佈置？
外父見我咁大火氣，仲反問我係咪傻咗，呢個時候冇諗過老婆會出聲：「你哋走啦，走走走！」雖然老婆嘅語氣溫和過我好多，但由於佢未試過咁，所以啲親戚都靜晒然後離開。最好笑係外父睇住啲人著鞋，佢竟然冇離開嘅意圖，好似唔關佢事咁，我再補多句：「你都走呀！」
問心嗰句，喝完班親戚躝屍趌路之後，我都覺得自己over咗，不過老婆安慰我：「你唔需要有罪疚感，我知你係錫我同個女。」冇錯，我係出於愛錫老婆同曉彤，唔好計老婆一直以嚟嘅付出被無視，淨係想問句而家咩年代呀？仲玩重男輕女？
其實我外父仲嬲緊我㗎，出咗聲話以後唔想見到我，冇所謂，我都唔想曉彤大個之後知道公公唔錫佢，句句都話佢冇用、蝕本、遲早畀人呃之類，佢而家兩歲啫，大個咗就會識得聽同埋有感受，我唔想影響個女嘅心智同發展，所以外父可以慢慢嬲，I don’t care！係辛苦老婆仲要每個月返去一次擺低家用啫。
曾經問過自己如果時光倒流，新年飯嗰次會唔會忍一時風平浪靜，但我相信就算重新嚟多次，我一樣會大聲喝佢哋：「躝！」平時做嘢已經夠晒辛苦，仲要聽你班人廢噏同埋踩我個女？自問唔係聖人做唔到。
投稿讀者：曉彤爸爸