「Erica？好貪錢㗎喎，結咗婚？佢老公好有錢㗎？」
聽到舊同事咁樣評價Erica，有時都忍唔住要講兩句：「佢好貪錢咩？點解要聽一面之詞？」
負皮Erica係我舊同事，話佢貪錢嘅人都係我舊同事，Erica以前條仔亦係我舊同事，而呢個貪錢形象，係佢以前條仔分手後周圍同人講嘅，所以嗰個圈子嘅人聽完就先入為主，個個都覺得Erica係嫌棄條仔冇錢，拜金又現實。
我同Erica好耐之前已經傾過呢個問題，佢直認不諱：「係呀，我係嫌棄佢冇錢，仲好討厭佢次次出去食飯都冇打算埋單，連AA制都冇打算，每次侍應拎張單埋嚟嘅時候，佢都係玩緊電話，10次有10次都係咁，直至有一次我忍唔住話已經請咗好多餐，問佢有冇打算請下我食飯，或者唔使請，搵次主動埋下單，最多我畀返自己嗰份，然後佢就發脾氣，話我斤斤計較，最多之後撳返錢界我，但其實一直都冇。」
Erica繼續講：「我仲好憎佢每逢月尾都問我借錢，因為佢拎晒份糧去賭馬，雖然佢借我嘅錢唔算多，每個月一千幾百，加加埋埋總數都係萬幾蚊，不過從來都冇還。」
「我仲睇唔起佢話想轉工，講到我辭職嗰日都未見過佢send一份CV，淨係識日日怨，怨老細唔好、公司唔好、同事唔好、福利唔好，除咗埋怨，佢根本冇任何實際行動。」
「每一次我同佢分享自己工作上嘅開心事，或者一啲有成功感嘅事，佢都會不斷潑我冷水，從來冇認同或者讚美。」
Erica話，某程度上啲人係冇講錯，所以唔使解釋，佢的確係嫌棄以前條仔冇錢，但佢從來唔係想要前男友啲錢，只係好介意呢個人冇上進心冇計劃冇良心，所以先搞到成日冇錢，同時不斷怪責其他人同埋環境令佢冇發圍，長期覺得自己懷才不遇。
我由得Erica繼續發洩，講出嚟或者會令佢釋懷。
「我唔怕同鍾意嘅人一齊捱，每個人都有高低起伏，對於有上進心同埋勤力嘅人，我相信低潮只係一時。我最嫌棄係佢用懷才不遇，甘於平淡呢啲字眼，美化自己嘅無能同埋懶散，因為佢根本冇任何才幹，唔關有冇伯樂事，佢亦唔係平淡，平淡係指搵幾多食幾多，佢係搵幾多，賭幾多，然後大安旨意月尾問我借錢。」
我：「咁你最初又同佢拍拖？」
「最初？最初佢講到自己有好多計劃，有好多理想，有時真係相處耐咗先會發現，有種人嘅理想永遠流於空談。」
其實Erica而家個老公都係冇車冇樓，不過佢話：「起碼有上進心，誠實，唔會認屎認屁。」
我做咗Dating Consultant一段日子，從來冇見過有研究或者數據去證明，搵唔到錢嘅人，係會比搵到錢嘅人更加真心同埋更有品，兩樣嘢完全唔掛勾，反而見過好多人經常覺得自己懷才不遇，睇見其他男人成功，就話人哋符碌、靠屋企、死好命，睇見其他女人搵到錢，就話人做雞、靠個樣、畀人包，呢種人用咗大部分時間去埋怨同埋嘲笑別人，但好少花時間去計劃同埋改善自己。