公司唔係全男班，但我哋個department係，所以成班麻甩仔麻甩佬唔多唔少都會講粗口，其實好正常吖，公司大把女同事都講粗口啦，點知早排請咗個女仔，阿頭就開始叫大家唔准爆粗喇，原因係呢位新嚟嘅女同事投訴喎！嘩！咁你不如叫我哋唔好呼吸。
首先點解要請個女仔呢，係因為上一手個男仔跟到啲單亂晒，阿頭話女仔細心啲，咁佢interview嘅時候又冇性別歧視既，我見到有男仔嚟in，可惜幾個都唔啱心水，輾轉間就請咗個女仔返嚟喇。
新女同事返工嘅第二日，阿頭就同我哋圍內幾個男同事講：「喂，你哋唔好講粗口喇。」
「聽講你爆粗先係最勁喎，冇一句唔係粗口。」
阿頭：「我知，我會改㗎喇！」
「你為咗討好個新女同事由老粗變紳士呀？值唔值得呀？你有老婆㗎喎！」
阿頭：「唔係呀，個新女同事向我投訴你哋講粗口呀！你估我想㗎咩？」
「我哋爆粗又唔係鬧佢，收咗線鬧下啲客，同事間傾計難免都有啲粗口啦，唔通知乎者也咁呀？」
阿頭：「佢話你哋好粗俗，覺得被冒犯呀，我即刻諗起《低俗喜劇》裡面薛凱琪告杜汶澤性騷擾一幕，啲竹昇妹真係好麻煩㗎！」
「竹昇？佢邊度竹昇呀？喜瑪拉雅星呀？」
阿頭：「咁人哋真係美國畢業返嚟㗎嘛，總之你哋講少啲啦，一陣佢去平機會定唔知啲咩機構告嚟告去就唔好啦！」
妖！啲竹昇妹真係好麻煩！
唔係話要刻意挑釁個新女同事呀，我今年就31歲，幾個同事分別28, 33, 35, 36，阿頭自己就45，唔計剛剛出生同埋讀幼稚園小學，相信呢個部門嘅男人講粗口大大話話都講咗十幾廿年，真係可以即刻嗌停咩？戒煙都要時間啦，何況戒粗口，而且我哋唔算過份，間唔中一句起兩句止咋喎！
正所謂束縛愈大，反抗愈大，另一位男同事即刻話自己唔會妥協，原因係老婆都未管佢講粗口，而家竟然因為個入咗嚟做一日嘅新人而唔准爆粗？
「信埋主耶穌好唔好？今個禮拜一齊去派飯，再一齊去同公公婆婆玩好唔好呀？戇居！」
阿頭：「你又唔使信埋主耶穌咁激動既，有時啲竹昇妹好凶狠㗎，話告你就真係告你，我為你好咋！轉下諗法啦，唔講粗口我哋會唔會健康啲呀？工作環境講粗口始終唔健康既。」
「我健你老…….」下刪幾廿個粗口。
因為新女同事投訴，我哋部門盡量避得就避，所以成日會聽到大家緊急煞停，例如：「仆……」、「你含……」、「今次瀨……」當然仲有呢句：「呀唔係，屌……」總之好唔過癮好唔習慣啦，好似開大開到一半先發現冇廁紙，唯有放棄唔屙著返褲走一樣。
「咁叫人食屎得喇啩！」
阿頭：「最好唔好啦！你咩事叫人食屎先？」
「喂，Sales Team個Edmond自己漏咗入單，而家叫我排佢先，咁都唔可以叫佢食屎？」
阿頭：「你試下同佢講，下次唔好喇，總之漏咗就唔可以排先，咁樣得唔得呀？」
「我驚Edmond以為我變咗性喎！」
正當大家都好不滿嘅時候，問題自己解決咗，因為呢位新女同事返工唔夠一個禮拜就向阿頭表示要辭職，佢話接受唔到工作環境太多粗言穢語，覺得份工唔適合喎！阿頭留都冇留，一口就答應，仲懶係客客氣氣咁話會follow up佢呢幾日嘅人工。
唔係想針對呢位唔講粗口嘅女同事，我都明白要個女仔聽住身邊嘅男同事係咁爆粗，真係會唔舒服同唔習慣，但自問我哋唔算狂爆粗，而且職場上都好難避免，唯有祝佢之後搵到份工係完全聽唔到粗口啦……