公司失方寸 未打針係咪大肚婆都炒得?

以下係呢幾日疫情期間收到嘅網友心聲,因為好多唔係一篇故事,所以就綜合埋一齊登出嚟,當中發現好多公司都方寸大亂,亦有啲趁亂手起刀落,到頭來受罪嘅仍然係打工仔。

第一個case係來自Athena,佢話老細星期五晚send咗張截圖過嚟,內容係新聞話政府刊憲修訂《僱傭條例》,可解僱因為唔打針而無法上班嘅員工,連隨叫佢message所有同事,要統計下邊個打咗針,邊個未打,打咗要有證明,未打就可以即炒,要星期一有晒以上資料。

Athena認為呢種做法不近人情,因為冇打針嘅人唔代表係搞搞震,以佢嘅理解,公司就有一位大肚同事下個月生得,所以過去一年都冇去打針,生完之後亦唔想打住,如果係唔係都炒隨時殺錯良民,不過老細就話唔理咁多,唔打針到時入唔到商場返公司,冇可能畀個大肚同事長期放假,仲話產假前四後六已經好蝕……

Athena表示收到老細呢幅截圖

屋企人有同Athena講過,咁嘅老細不如唔好做,但係Athena覺得呢個唔係問題癥結,就算佢唔做,老細一樣叫另一啲同事去執行指令,完全幫唔到件事,所以最緊要係政府嘅措施同埋指引要清晰,同埋唔好朝令夕改,到時累到打工仔冇咗飯碗之後,你再修改條例就已經冇意思。

第二個case係來自讀者Ka Wing,佢公司要求員工每兩日自行做一次快速檢測,不過就冇任何嘅support,包括快速檢測用品都要職員自費,藥房三十幾蚊嗰啲要同師奶阿嬸搶,又唔知有冇用,正常買到嘅平均70幾蚊一盒,兩日買一次唔係個個員工搞得掂。

第三個case就來自Sarah,都係同快速檢測有關,公司又係要員工自己檢測完證實冇確診先至好返工,check完影支棒send畀Admin就得,有同事話唔想手停口停,所以check一次就算數,同一支棒會多角度拍攝,有時擺喺張枱,有時擺喺梳化,其實來來去去都係同一支……

跟住呢個case係任職保安嘅阿Ling,佢話有個同事之前去檢測,但係相關部門隔咗個幾星期先通知個結果係確診,個同事話畀上頭聽,不過上頭又唔係第一時間公布畀其他保安知道,只係某一日下午靜雞雞叫確診同事收工,而阿Ling同佢係負責同一個更亭,一個早更,一個夜更,所以自己check完冇事都提心吊膽。

阿Ling表示已經有另外幾位保安陸續確診,所以返工心理壓力好大,仲要政府早前話發放畀清潔同保安嘅防疫抗疫基金津貼冇佢哋份,因為唔屬於政府輆下嘅外判公司,即係好似房屋署嗰啲屋邨保安先有份,大家都係做同一樣嘢,一樣係高危,但係待遇就差咁遠,覺得好洩氣。

其實疫情之下好多公司嘅安排都係立立亂,隨便去討論區睇下,都會見到唔少打工仔分享苦況,例如老細要求員工中咗招唔好通報相關部門,以免公司要進行消毒或者閂門唔開得工,又有人確診後被勒令無了期放假,就算已經好返都唔准返工,仲勸喻自己辭職,最多用一封好評嘅reference letter交換,真係日日都有唔同嘅奇怪事。

有好多人更加手停口停,聽到有人上年簽租約開咗健身室,點知唔夠兩個月又撞正第五波要關閉,雖然政府叫業主唔可以追租,但係停頓期間始終做唔到生意,例如健身室呢個case就要自動幫會員延長合約,即使開得返,一樣收少幾個月嘅錢,業主仲講明而家唔追租甚至表面上減少少冇問題,不過之後一定會加租補返條數,所以預期疫情帶嚟嘅影響仲有好多後續。

消費劵都有佢嘅問題存在,冇錯,顧名思義係想市民用嚟買嘢振興經濟,但此舉變相金錢流入商家為主,咁多基層喺疫情期間冇工開,甚至係冇咗份工,坦白講係咪仲有心情去消費呢?會唔會有人更需要cash去應付艱難嘅生活開支呢?

已經有社工表示,有居住喺劏房嘅人因為用唔到消費劵交租,唯有以「折扣價」畀張八達通個業主,用嚟減去租金同水電煤嘅費用……

error: