你哋有冇遇過一啲好臭脾氣嘅同事？正確嚟講，係好臭脾氣但係冇料嘅同事。
以前做報館，有個美術部同事好臭脾氣，簡單嚟講就係唔想做，你pass啲相過去畀佢「退地」，無論係畀1張定係20張，佢都會黑口黑面，因為你阻住佢打機同睇片，不過佢個職責真係「退地」吖嘛，我哋啲相唔畀你畀邊個啫？
同埋佢處理啲相都好正㗎！一係「退地」退唔晒，一係唔知點解cut咗隻手（當時係體育版，好多球員嘅action相），我對於公司要養廢人就冇意見嘅，最慘係有時要part住佢做嘢。
做親嘢都拍枱拍櫈，屌呢樣屌嗰樣，我哋司空見慣㗎喇，有一日佢「退地」又退到球員個頭冇咗一忽，因為當時好趕，我阿頭就行埋去叫佢退多一次：「咁唔掂喎師兄，退到球員個頭起角嘅，好似『大家食』個老細咁款。」
（註：唔知道「大家食」老細個頭點起角的話，不妨用google搵一搵）
我覺得阿頭客氣咗，坦白講個頭退到似海綿寶寶多啲。
當時臭脾氣同事用部手提打緊機，只見佢好唔耐煩咁擺低部電話：「咁麻煩㗎你哋，搵第二個搞啦！」
於是我阿頭同佢阿頭投訴，又因為佢阿頭一直都知咩事，所以就同返呢位臭脾氣下屬講聲，叫佢以後做好本份先，咁咪唔使同其他部門咁多嗌霎。點知臭脾氣同事上晒身，話咁麻煩寧願唔撈，轉頭交埋辭職信，佢阿頭簡直係「欣然接受」，九秒九請埋個新人返嚟，不過臭脾氣同事唔肯教新人，繼續日日擺款，差啲迫到個新人走埋，最後要佢阿頭親自教。
臭脾氣同事原來去咗另一間雜誌社工作，唔夠一個月就唔做（定唔知畀人炒），搵返佢阿頭問仲有冇位？又問個新人掂唔掂？如果新人未過試用期不如請返佢……佢阿頭梗係即時落閘啦！
頭先因為見到海綿寶寶諗返起呢件事，其實每個人都可以有脾氣，但係唔好畀自己嘅脾氣大過自己嘅能力，更何況搵食已經夠艱難啦，同事之間又何必黑口黑面畀氣人受呢？大家都係打份工啫。