我同阿姐一早已經勢成水火，好多大大小小嘅事累積，有理說不清，總之如非必要都唔會直接講嘢，知佢想炒我好耐㗎喇，不過我喺工作上又冇甩漏或者做錯嘢，想郁我都唔係咁易，鬥長命囉！
好在我份工都係跟下單嗰種，多數由Sales Team畀嘢我跟，如果唔係爆鑊，實際上冇乜文件嘢要同阿姐交接，更加唔需要開會，還ok啦，不過同阿姐交惡嘅狀態已經維持咗一年，你話唔辛苦就假嘅，始終憎一個人都係對自己嘅一種折磨。
好好彩，早排有個headhunt搵我轉工，雖然人工、福利、title都同本身間公司一樣，location又遠咗，但諗深一層，其實轉下環境幾好吖，唔使再對住個乞人憎阿姐，心情都開朗啲，咁咪膽粗粗試下囉！可能我呢啲工作同層次都唔算好高，所以interview一take搞掂，請半日假就夠喇。
當時最擔心反而係reference check呢關，肯定阿姐會唱衰我，好在headhunt同我講，唔會搵我做緊嗰間公司嚟check，正！一天都光晒！走咗先算啦！
反正仲有9日大假未清，我決定扣假早走，返新工前當係有個break，近一年心情從未如此好過。
見工嗰陣已經知道新公司呢條team剛set up，直屬上司都係早我幾日返工，而我呢個position仲有一個空缺，咁咪打畀一個算幾friend嘅舊同事講囉，睇下佢有冇興趣轉埋嚟一齊做吖嘛！
舊同事話冇所謂可以試下，佢仲透露我走咗之後，阿姐成個人開朗晒，破天荒畀錢叫到會慶祝，嘩！咁闊綽呀？睇嚟我呢個眼中釘自己遞信走，阿姐真係極度興奮。
然後我打畀撬我跳槽嗰位headhunt，諗住益佢啦，新公司仲有一個位要請，我同事又話不妨一試，隨時可以幫呢個headhunt賺多份佣，點知佢竟然拒絕：「唔好喇，我另外send咗幾份CV畀你新公司揀。」
我：「點解唔加埋我舊同事份CV落去呢？你多個機會吖嘛！」
Headhunt：「我應承咗你阿姐唔再撬佢啲人㗎！」
我：「邊個阿姐？」
Headhunt：「咪你之前公司個阿姐囉！」
我真係嚇親：「點解關佢事？」
Headhunt：「我係撬你阿姐先㗎，因為呢個新部門初頭咩都未set up，你而家個department head都係早幾日先請到之嘛！不過你阿姐唔肯走，反而介紹你畀我，佢話你做得唔開心喎，叫我無論如何都要搵你過檔，係咁大力推薦你，係喎！佢叫我唔好同你講㗎，你當唔知啦！」
如果殺人唔使填命，我一定隊冧呢個headhunt，點解可以咁口疏，一係你就呃我呃到底，而家講個真相我知，仲叫我扮唔知？
我都奇怪㗎喇，雖然一直有喺JobsDB open自己份CV，但可能唔夠吸引，呢幾年都冇任何headhunt搵上門，突然有人對我感興趣仲積極彈份工過嚟？終於明白咩叫做薑愈老愈辣，我係扣假早走，人工照舊，返工location遠咗，仲要自己辭職，輸晒，真係輸晒！
正當我諗緊好唔好同headhunt講來龍去脈，佢又加多句：「記得唔好同返你阿姐講呀！佢叫我保密㗎！」
我嬲到cut線！
冇啦！輸就係輸，冇嘢好講，唯一安慰係新公司人事冇咁複雜，喺度做嘢都幾開心，你當我真心又好，安慰自己又好，唔樂觀啲都唔知可以點喇。
投稿讀者：Loser