第一次見Hailey（化名）係喺九龍城方榮記，佢係我同事Terence嘅女朋友，我都有帶埋另一半出嚟，兩pair人講咗好多次打邊爐㗎喇，約咗幾個月終於成事。
Hailey真係好靚好charm，如果你去過方榮記打邊爐，應該知道環境唔算得上太闊落，一張張圓枱坐滿人仲顯得有啲迫，而且麻甩佬比例多，feel到隔籬枱幾個阿叔係咁望過嚟，好正常嘅，我都忍唔住不斷望啦，好在我女朋友Emily冇發現咋！
Emily：「Terence你女朋友好靚喎！」
Terence：「係呀，我同佢係美女與野獸。」
Hailey向住我女朋友講：「你都好靚呀，我羨慕你咁瘦先真，著衫會好睇好多。」
我：「果然又靚又識講嘢！」
Emily：「我公司早排要拍條宣傳短片，嗰陣叫啲agent搵咗好多model，坦白講吖，你靚過晒佢哋呀！」
Terence：「佢都係兼職model，間中會拍平面廣告。」
Hailey：「呢排少咗啦，一時時咋。」
我：「咁靚女一定會紅，遲啲好多廣告㗎喇，啤啤佢先，預祝你成為廣告女王！」
嗰晚打邊爐打得好開心，我同Terence唔止係同事，私底下亦都好friend，大家成日想兩pair人一齊出嚟玩，因為人多會有多啲選擇，例如食飯可以叫多幾碟餸，行山又冇咁悶，仲提過孖住去旅行租間大嘅bnb會抵啲。
以上嘅活動並冇出現過，因為我嘅祝福最後成真，Hailey愈嚟愈多廣告，喺旅遊雜誌經常見到佢介紹香港美食同埋好去處，報紙嘅產經版見到佢做model幫啲樓盤影相，另外有個大牌子搵咗佢拍廣告，除咗喺電視會見到之外，嗰排嘅地鐵同埋巴士站都有燈箱海報，可能因為識咗Hailey真人先留意多咗，總之覺得曝光率好高。
有一次同女朋友去睇戲，男主角係古天樂同埋吳彥祖，其中一個場口係office，有位女職員講咗一句對白，咦，咁熟口面嘅？
我：「Hailey喎！」
Emily：「係喎！好正呀！可以同吳彥祖一齊拍戲。」
雖然成套戲Hailey得一個鏡頭同埋一句對白，但由於我同女朋友都識得佢，又見過真人一齊食過飯，所以個感覺好得意，好唔真實，但係又替佢高興。
返到公司我同Terence講呢件事，佢話之後可能仲多機會見到Hailey演出，因為佢女朋友簽咗新嘅經理人公司，遲啲會拍劇，已經辭咗份正職，雖然一開始只係飾演閒角，不過作為男朋友點都會支持。
我：「老老實實，有冇擔心佢愈嚟愈紅，跟住會識咗啲公子哥兒先？」
Terence：「擔心得幾多吖，就算佢唔係拍戲，之前返office工都有啲客同埋男同事追佢，不過Hailey咩都會同我講嘅，加上我哋由讀書識到而家，基本上都好了解同埋信任對方。」
我：「咁又係，我哋公司嗰幾條女都可以有咁多狗公啦，講顏值Hailey高佢哋幾班，點會冇人追吖，最緊要你兩個之間有信任。」
Terence：「其實我唔介意食軟飯㗎，最多佢賺錢，我留喺屋企做家務，哈哈！」
真係有機會喎，因為Hailey之後嘅星途好似坐火箭咁，由閒角變成配角，愈嚟愈多演出機會，甚至喺一套微電影裡面做女主角，就喺呢個時候，Terence問我可唔可以夜晚陪佢操車。
我：「雪藏牌係要操返㗎喇！」
Terence：「係囉，泊車搞唔掂呀！唔識用尾入，身邊得你一個有車，幫我操下啦！」
我：「冇問題，大家都住屯門，黃金海岸沙灘嗰邊有個停車場，閒日深夜冇乜人，同你慢慢操囉！好多學神都喺嗰度操㗎！」
Terence：「唔該晒，最多我請食飯，操到咁上下我就買架平平地嘅車。」
我：「記得你之前話揸車好大壓力又好攰，突然又想買車，因為Hailey？」
Terence：「唔…之前同佢出街都係搭地鐵，而家多咗人認得佢，出親街都有人走埋嚟話要合照，仲有啲係咁眼望望，我都分唔清係認得Hailey吖，定係純粹睇女，講真我未慣呀，始終個女朋友畀人係咁望，我坐隔籬都幾唔舒服。」
個人認為Terence當時嘅心態係好複雜，佢真心想Hailey大紅大紫，但同一時間又不斷扭曲自己，Terence唔止一次同我講過，多年前考車牌只為同Hailey去旅行可以自駕遊，而喺香港係極度唔想揸車，一來皮費重，二來覺得呢個地方好多司機都唔友善，自己手車又唔係叻，好驚出路面會係咁畀人問候娘親，但係而家佢為咗同Hailey出街自在啲，又走去做一件本身唔享受嘅事。
喺黃金海岸嗰頭練咗半個月泊街，Terence終於都買咗車喇，最麻煩嘅一環竟然係租車位，因為佢個屋苑嘅停車場full晒，管理處話要排隊輪候，起碼要等一年半載先有得租，結果Terence要喺屋企附近租個爛地停車場位，其實都唔算附近㗎，距離佢屋企有20分鐘步程，試諗下你揸車都係求方便啫，而家日曬雨淋都要20分鐘先攞到車或者泊好行返屋企，某程度上係失去原有意義。
男人嘅角度，養車已經係好大嘅開支同負擔，但原來對比起其他層面，呢啲不過係小數目……
某一日Terence忽然問我：「你女友Emily熟唔熟啲名牌？」
我：「邊有女人唔熟㗎，不過熟又唔等於會買㗎喎！」
Terence：「我明，男人去呢啲名店硬係周身唔聚財，可唔可以搵晚叫你約埋Emily一齊去睇？我想去Hermès買對鞋。」
早兩日Emily想買對幾百蚊嘅Adidas都畀我ban咗，而家你要我條女陪你去Hermès買鞋畀你條女？有冇諗過我係咩感受？
冇問題啦，一世人兩兄弟，我代Emily答應，個死婆有得行名店一定好興奮，最多之後畀少少說話我聽啫，然後我呢個大鄉里做咗廿幾年人先知道，乜Hermès啲鞋咁貴㗎？仲要有錢都唔代表買到？著咗係行得快啲定係有個噴射裝置可以飛㗎？
（未完待續）