上次講到，經常有種現象係個女仔受咗愛情重傷之後，好快展開一段新戀情，甚至好快就結婚，我公司有唔少case，其中一位同事仲分享咗自己會員嘅經歷，擺酒當晚，個女仔喊得好犀利，嗰種喊係一個女仔唔可以同最愛嘅人結婚而流出嘅眼淚，未睇嘅朋友，可以睇返上一篇文章。
後尾Debbie姐聽返阿老公講，擺完酒當日，酒店有offer間房畀佢哋，散席後，返房逐一多謝班兄弟姊妹，有人仲特登幫手拎婚紗去還，當各人離開，間房得返佢兩公婆獨處，老婆忽然又喊，停落嚟之後第一句係講：「對唔住。」而佢冇特別問原因，只係回返一句：「I love you！」
呢位男會員同Debbie姐講，嗰晚雖然係新婚，但係個心好痛，老婆講完對唔住之後，佢想答唔緊要，不過講唔出口，因為唔係唔緊要，只係佢太愛呢個女人。
之後佢哋去咗希臘度蜜月，聖托里尼島，小白屋，然後再過埋土耳其，呢位男會員話自己其實唔鍾意旅行，不過老婆就相反，見到心愛嘅人快樂，佢都樂此不疲咁去計劃一個又一個行程，每次有假期就去一個又一個國家，日常生活都係同一般情侶或者夫妻一樣，攬攬錫錫，閒時互窒。
日復一日，某次佢兩公婆喺屋企一齊睇電視嘅時候，老婆忽然同佢講：「我覺得我鍾意咗你。」不過半秒都唔夠，老婆應該知自己講錯嘢，好快更正為：「我意思係鍾意你多咗。」老公依然冇斟酌，同結婚當晚一樣，回返一句：「I love you，我都愛你。」
佢哋兩公婆好少鬧交，基本上係冇，根據男方同Debbie姐所講，老婆EQ比較好，老公就IQ好，喺出面做嘢如果有咩唔如意或者煩惱，老婆總係可以氹返老公，令佢平靜落嚟，每晚亦都會等埋老公入房先一齊瞓。
老公一直都覺得，自己應該係老婆未結婚前其中一個觀音兵，唯一唔同嘅可能係，佢比較成熟，而且工作同埋生活亦比較穩定。佢到今時今日仍然唔知道老婆新婚當晚喺酒店房點解喊，亦唔知道喺擺酒當晚，老婆喊得咁犀利係因為感動，抑或係冇嫁畀自己原先嘅一生中最愛，或者當晚老婆嘅一句「對唔住」，佢已經搵到端倪，但從來冇追求過答案。
男方有次約Debbie姐出嚟食飯傾計，曾經講過：「我覺得我老婆好幸福㗎，可以嫁畀一個咁愛佢嘅人，而我都覺得自己好幸福，可以娶到一個我咁鍾意嘅人，其他嘅嘢已經唔再重要，每個人都有過去，世界上冇完美嘅愛情，生活就係柴米油鹽醬醋茶，從一開始我已經同自己講，佢呢一刻唔係最愛我，但將來一定會係。來日方長，對方喺你心入面住耐咗，佔嘅位置同比重亦會愈嚟愈多。」
關於上次有人留言話老婆當初唔係最鍾意老公，會唔會好易出軌，Debbie姐話：「我都有問過呢個問題，但係個男仔答佢，呢個唔關乎愛或者唔愛，而係人格問題，個男仔相信老婆唔會。」
男方仲話，自己都唔係第一次拍拖，當日結婚老婆情緒好波動，可能係出於心裡面有過其他人佔據位置，只知道自己唔係老婆心裡面嘅遺憾，但當大家可以一齊走到終點，到最後亦都係一種幸福。
我問Debbie姐：「咁你覺得佢哋係咪真係幸福？」
「我覺得個女仔肯定冇後悔嫁畀佢，我認為佢哋係幸福。」
你哋覺得呢？