《診所低能奇觀》我冇嗌錯你個名呀

有日我嗌一位女士入醫生房…

『X杏花(非原名,只係近似音)可以入啦』。

女士彈起身,個樣好嬲咁衝埋嚟登記處問我:「你嗌咩呀?」

我:「…可以入房見醫生啦」

佢仍然好嬲:「你頭先嗌我咩名呀?」

我望望電腦上嘅資料:「X杏花唔係你個名咩?」

佢:「你咬字咬正啲啦!你嗌咗X淫娃呀!」

唔係喎,我真係講杏花喎。

我:「我冇咁樣講過呀,你入醫生房先啦,可以入去見醫生㗎啦」

佢仍然企喺度:「我個名俾你咁嗌㗎」

我:「咁我嗌返你X小姐呀,可以入醫生房啦」

佢:「你嗌多我一次」

我:「X小姐」

佢好大聲:「全名呀!」

我:「不如入去睇咗醫生呀,醫生等緊你」

佢:「講呀」

我唔想呀…

我:「我哋唔好喺度拗好冇,你嚟診所都係要睇醫生啫,而家醫生已經等緊你㗎啦,有咩睇完醫生先再講呀,唔好要醫生喺度等咁耐呀」

佢:「講呀,我嗌你嗌多我一次呀」

我已經用盡力逐粒字講出嚟:「X-杏-花」

佢:「我唔睇啦!嚟到俾個咁嘅姑娘嗌我做淫娃」

唔好啦,你入去睇啦,我真心想去醫生寫轉介信俾你去耳鼻喉呀,好嚴重呀!

佢飛快離開診所後,我聽到兩個同事喺度笑…

我表情非常無奈咁望住兩個同事。

其中一個同事話我知:「你CLICK入去望吓佢個紀錄呀」

CLICK咗吉嘅,有登記過資料但係冇任何病歷。

另一個同事:「佢冇一次登記完係會入去睇㗎」

同事們繼續笑…

我喺呢位病人名側邊打粒**先,慎防下次又中伏,不過又好似唔駛,佢個名我應該會記一世…

👉🏻即睇其他診所低能奇觀嘅文章

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: