《診所低能奇觀》 夾唔到

電話響起~

我:「你好,乜乜診所」

對方係一位女士:「喂?我想請問你識唔識啲嘢呀?」

唔識,我冇腦的,有咩嚟問醫生,醫生係世上最有智慧同學識嘅人。

我:「你有嘢想問可以直接嚟問醫生呀」

佢:「問咩都係呀?」

我:「應診時間我就答到你,今日收八點,八點前嚟到就可以啦」

佢:「八點後呢?」

明天請早。

我:「咁就聽日朝早九點應診,上晝就至到一點鐘嘅」

佢:「咁我都係問你啦」

問你個PAT。

我:「我淨係答到你應診時間咋,其他嘢我答唔到你啊」

佢:「但係你開門嘅時間同我夾唔到喎」

留意返,我同你都係唔夾嘅。

我:「你要問健康方面嘅問題就一定係要嚟問醫生嘅,或者你睇吓有冇其他診所嘅時間方便你啦」

佢:「我問啲嘢咋喎」

我信你至奇。

我:「唔好意思呀小姐,其他嘢我真係答你唔到」

佢:「香港腳可唔可以唔食藥唔睇醫生就搞得掂呀?」

都話咗唔答囉,你直接問都係答唔到你呀,更何況你竟然打嚟診所問可唔可以唔睇醫生?嚟診所唔睇醫生唔食藥嚟做咩呀?贈興呀?

我:「我哋係診所嚟嘅,你有任何唔舒服我都係會建議你嚟睇醫生嘅」

佢:「食多啲腳類嘢補得唔得呀?即係以形補形呀,我上網睇話可以呀」

你會唔會考慮去買埋補其他方面嘅嘢食呀?

我:「呢啲我答你唔到呀,你自己上網睇完嘅嘢問我係冇用嘅,醫生係專業嘅先可以幫到你」

佢:「上網嗰啲可能都好專業喎,可能係醫生自己寫呢」

可能我係世界首富添呀。

我:「總之你有需要就嚟睇醫生啦,我哋今日收八點」

佢:「咪話咗夾唔到囉」

嘟。佢收咗我線。

咪話咗搵間同你夾嘅診所睇醫生囉…


👉🏻即睇其他診所低能奇觀嘅文章

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: