《千萬師奶》下 – 唔可以畀我老公知㗎

或者對好多人嚟講,1,500萬唔算好多,但係對於我嚟講就真係冇乜概念,我同老公有諗過買樓,曾經有間500幾萬想扑鎚,最終左諗右諗都擔心會供得辛苦,而Carina嘅資產絕對可以買到3層,仲要一炮過都冇問題。

至於佢話每日可以用$2,083,慢慢摵足夠摵足20年,我聽完更加頭暈,因為我同老公每日用$200都要計過度過,想盡辦法睇下點樣可以再慳啲,唔好忘記Carina老公仲供緊樓,仲畀緊家用,諗深一層,要佢做嘢似乎真係有啲委屈,當年大家做同事,我仲叫Carina畀心機做,回想都好失禮……

我:「咁究竟你啲錢從何來?」

Carina:「其實係我前夫畀我。」

原來Carina之前結過一次婚,佢現任老公梗係知啦,係我呢個舊同事唔知啫,而佢前夫係做啲投資嘅嘢,聽講喺所屬界別仲有啲名氣,離婚後本身想分一層樓畀Carina,但係條傻婆竟然唔要。

我:「咩樓?幾錢?點解唔要?」

Carina:「大角咀帝柏海灣,畀我做咩啫,成千呎唔通我自己住呀?打掃好辛苦㗎!然後我咪話不如折現囉,我前夫話冇咁多cash,淨係畀咗千幾萬我。」

我:「你係咪有問題呀,成千呎喎!奧海城喎!梗係要層樓啦,而家隨時唔止千幾萬,同埋你當初如果要咗,而家就唔使周圍搵樓租,唔使周圍搵地方hea啦,同而家個老公住又得,租畀人又得,當網吧咁用都得啦!」

Carina:「嗰陣時我連而家個老公都未識,邊會諗到咁長遠呀?何況我真係好憎住大角嘴㗎,如果唔係搭地鐵,有時要行出面,成日見到殯儀館,試過有朋友約我喺大角嘴食嘢,夜晚行返去勁驚囉!而且我唔想再同前夫有咩關係同接觸,勁憎佢,好在我唔鍾意生小朋友咋!」

我:「咁當時點解要離婚嘅?」

Carina:「佢玩女人囉!衰到應一應,可以唔離婚咩?」

聽返Carina講,有次佢直頭捉姦在床咁滯,返到屋企已經見到門口有對女人鞋,行入屋之後佢前夫扮冇嘢,原來個女人匿埋喺廁所。

Carina:「我前夫屋企人都算有頭有面,老爺係政府啲官,佢哋唔想我搞大件事,最初仲阻止我哋離婚添,總之搞下搞下就傾好畀嚿錢我,我前夫賤到要我簽保密協議,所以你唔好講出去呀!」

我:「就係因為有份保密協議,所以連而家個老公都冇講呀?你阿爸阿媽呢?至親都唔講得?」

Carina:「咁又唔關保密協議事,我阿爸就好衰嘅,又爛賭,佢嗰陣知我前夫有錢已經係咁攞著數,所以唔畀得佢哋知我有千幾萬喺戶口,咁我而家個老公就好憎我前夫。」

我:「憎到唔可以畀佢知前夫畀咗千幾萬你?」

Carina:「因為佢一定會覺得前夫想用錢塞住我把口,咁事實上係嘅,其實我前夫結婚冇耐已經唔掂我㗎喇,一早感情轉淡,加埋捉姦捉到應,對前夫都冇晒感情,所以我袋呢千幾萬袋得好開心,我有諗過坦白㗎,但如果講完出嚟大家個心有條刺就唔好啦!」

Carina話前夫本身屋企有錢,加上前夫自己又搵到,所以當時出親去食飯都係高級餐廳,去親旅行都係坐頭等,送親畀佢嘅禮物都係名牌手袋,但佢份人其實唔算太注重物質,淨係鍾意hea,淨係唔想有壓力,其實好多人都係咁,只不過好多人喺現實環境下要搵食,幾唔想郁都要返工啫!

Carina:「初初同而家呢個老公拍拖,有時唔小心講起以前啲嘢,老公都會好大反應,佢覺得前夫係先天環境好先至唔愁錢銀,所以又唔畀我供樓,仲有加咗家用,佢內心應該有啲比較,我唔敢想像佢知道前夫畀咗千幾萬我會有咩反應,咁但係我的確唔使做得咁辛苦都可以好舒服吖嘛!」

得喇!明㗎喇!再聽落去我會葡萄,唔係話仇富或者唔抵得,不過做人有時係好唔公平,有啲人做到隻牛咁,為咗慳幾蚊仍然要左諗右諗,有啲人咩都唔使做,hea下hea下又一日,又完全唔使為錢而煩惱,可能呢啲就叫好醜命生成。

我同老公反覆商量過Carina提議租屋嘅事,本身我老公唔答應,因為擔心同Carina嘅關係如果有咩變化,到時就會騎虎難下,朋友間一牽涉到錢就會變質吖嘛,不過當我講埋Carina戶口嗰千幾萬嘅來歷之後,我老公又認為有得諗。

我老公:「真係唔使交租,咁都冇壞嘅,租約係一年生一年死,慳一年租金都好吖,反正我份工成日OT,返到屋企都8, 9點,實唔會見到佢嘅,慳咗啲錢我哋可以快啲上車。」

我:「但我哋都唔可以大條道理食免費午餐,不如睇下點樣平衡返啦,Carina錢多還錢多,我哋都唔應該咁厚顏無恥。」

如是者,我同老公就接受咗Carina嘅offer,為咗心入面舒服啲,傢私同水電煤由我兩公婆負責,本身想交埋管理費,但由於Carina交租嗰度已經包埋。

Carina個傻婆聽完之後開心到癲咗,有錢嘅人似乎真係冇乜煩惱,咁少事已經歡天喜地。

其實我曾經同Carina講過,既然佢一直扮有工返,點解唔索性話自己公司都有得home office,咁咪可以攞正牌留喺屋企囉!

Carina:「唔得啦,如果大家喺屋企做嘢,我又明顯冇嘢做,淨係掛住煲劇同埋瞓覺,佢一定會懷疑㗎!講開又講,我老公噚日又畀咗4萬蚊我喇,話係公司出bonus喎,我都唔需要,點知老公已經直接入落我銀行。你知唔知呀,呢幾年我堅持要分開報稅咋,如果唔係就會穿煲㗎喇!」

除咗條命生得好,都唔知可以講咩喇,Carina一直以嚟畀我嘅感覺都係傻人有傻福。

我:「其實你老公會唔會捱得好辛苦?始終佢唔似你前夫咁有錢。」

Carina:「我知佢捱得辛苦,不過有種人會覺得有得捱有得做先至開心,係存在感嘅問題,有啲人如果冇嘢做冇嘢忙會周身唔聚財,我老公就係咁,佢話有嘢忙就特別有安全感。」

我:「你就完全相反。」

Carina:「係呀,錢夠用就得,我唔會特登慳,都唔會好揮霍,其實我將前夫送畀我啲手袋都賣鬼晒,一來我麻麻地啲款,二來費事老公見到啦,嗰度賣晒都幾值錢㗎,所以我老公畀嘅家用其實一直都冇用過,如果有一日佢份工有咩事,或者我哋屋企有咩事,我就會拎返出嚟幫手,你估我真係每個月用得晒6萬幾蚊咩,數係咁計啫!我知佢錫我,亦好enjoy佢錫我,其實我都好錫佢㗎!」

Carina租咗呢間屋幾日,佢老公個老細見確診數字又升,真係宣布全公司再次work from home直至另行通知,Carina猛咁話好彩,咁ok啦,佢租得開心,我哋住得開心,大家嘅生活又冇抵觸。

而家Carina逢星期一至五9至6都會上嚟自己hea,一般嚟講佢會6點幾先走,因為要扮喺公司搭車返去,個衰婆仲要lunch例牌叫外賣,煮都唔煮,驚落街會撞到老公喎,懶就懶啦!不過咁又係嘅,佢老公而家都home office,落下街買嘢唔出奇,總之Carina就住得乾手淨腳,我同我老公放工又晏,好似鷹狼傳說咁,大家用同一個空間,不過永遠都見唔到面。

我同老公商量過,如果呢兩年真係儲到錢上車,而Carina嘅情況又冇變,將來可以畀呢個傻婆office hour去我哋屋企hea,算係投桃報李,你對我好雖然只係舉手之勞,但係我都會記住嘅。

error: