「性對男人真係咁重要?」─情侶座

我入行之後有冇得罪過客?梗係有啦!

今朝公司電話響:「喂,我想join一對一嗰啲package,你搵個同事幫我吖。」

「請問你係咪Mary?我係康仔呀,之前幫你跟開㗎呢,不過我哋呢排啱啱先開返,未有……」

「我認得你把聲,就係唔想你跟,你叫另一個同事跟啦!」

咩事咁大仇口?因為得罪過佢囉!Mary姐40到尾,佢好憎男人,但又好想識個男人,而Mary姐每次同我講嘢嘅開場白都係:「你哋啲男人呀……」

有幾次dating之後,我循例要問佢感覺如何,佢永遠都係咁答:

「你哋啲男人呀!去完街可唔可以畀啲風度送埋人返屋企呀!呢個男會員唔掂喎!」

「你哋啲男人呀!問佢有冇計劃拍拖幾耐先結婚,佢答我要拍落先知喎,冇plan㗎咩?」

「你哋啲男人呀!咁遲鈍既?我講咗呢套戲想睇啦!佢都唔識主動約我去睇。」

點解咁嘅客都做?最初點知啫!又點解咁嘅客都三番四次介紹佢出去同其他男會員食飯?因為一對一嘅package係包幾次dating囉,好似套票咁,想blacklist都要等佢用晒啲套票先囉。

直到最後一次,我選擇直接還擊,嗰次Mary姐話:「你哋啲男人呀!係咪為咗生仔先搵人拍拖結婚㗎呢?根本就係藉口,根本係想搞嘢,性對男人真係咁重要?」

因為我想斷咗呢個客,所以鼓起勇氣回答:「Mary姐,以小弟嘅愚見同埋經驗,如果唔係因為性,我相信大部分男人會更加鍾意同返男人一齊玩。」

本來嗰次之後,Mary姐已經人間蒸發咗一排,點知佢又再打嚟,仲強調唔要我跟,咁我梗係即刻飛線畀另一位女同事啦,而家我見到嗰個女同事一路拎住個電話一路睥住我……

error: