有日一位先生嚟到診所。
佢行埋嚟登記處問我：「可唔可以寫證明信呀？」
我：「你要寫啲咩證明信呀？」
佢：「寫我有事做唔到嘢類似咁就得㗎啦」
我：「呢啲可能需要更多評估同檢查，醫生有機會要轉介你去專科度做，未必喺我哋呢度寫到俾你」
佢：「你個醫生唔識寫字㗎？寫張嘢都唔得嘅咩？」
我：「唔係咁嘅意思呀，係因為你需要寫嘅嘢要做更多嘅檢查同評估去證明你已經冇工作能力，所以先要轉介你去專科」
佢：「駛咩檢查㗎，醫生話係就係㗎啦，佢寫咗就係㗎啦」
我：「醫生都有需要去診症確認你真係冇咗工作能力㗎嘛」
佢：「佢隨便寫我喺老人痴呆認知障礙嗰啲要點證明我有呀？我入到去流口水瀨屎瀨尿俾佢睇呀？」
我：「如果你係有呢啲問題，更加需要去專科啦，一係咁我同你登記咗先，你覺得自己有咩唔舒服有咩事都可以再同醫生講，等醫生了解咗你咩事而做唔到嘢先」
佢：「登記可以！我入到去駛唔駛流口水瀨屎瀨尿呀咁？」
整污糟診所要收清潔費啊，你諗你啦～
我：「你照返你平時咁就得㗎啦，唔駛刻意去做㗎，刻意去做就即係唔係真㗎啦，醫生要從你嘅真實病況幫你㗎嘛」
佢：「你係咪CHOK緊我係咪咋病咋死呀？」
你自己鬼拍後尾枕似啲～
我：「冇呀，你俾身分證我登記先啦」
佢企喺度諗咗陣，又還原基本步：「寫張嘢都要CHOK我嘅就唔好啦唔睇啦」
門口嗰邊，請。
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。