萬事屋呢門事業已經唔係新鮮事，莫講話日本，香港一樣有人做得好好，不過眼前呢位神坂小姐係45歲先入行，而家已經係50代，當年佢喺日本各大討論區開咗個post叫「你有咩煩惱，我幫你解決」，結果成就咗佢人生下半場嘅事業。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
由於最開始係自由定價，所以神坂小姐剛起步嘅時候收入好飄忽，第一隻job就係幫個客人去識女仔，唔知係佢經驗不足，抑或係客人嘅行為同長相太奇怪，雖然單job收到錢，不過以行動嚟講絕對係失敗收場。
「可唔可以講下當時嘅情況？」
神坂：「個客人大約30歲，佢叫咗我去一間露天cafe，我哋兩個坐咗喺度，當客人睇中街上面行過嘅女仔之後，佢就會叫我幫佢上前搭訕，問個女仔拎Line嘅contact。」
「即係佢想識女仔，自己唔敢開口，叫你陪住佢去問人拎Line，企喺旁邊然後由你主動開口？」
神坂：「唔係，佢全程坐喺cafe望住，冇跟埋我出去問人拎Line，然後當我每次同街上面嘅女仔講完之後，對方望向cafe見到我呢個客人，就會拒絕畀任何聯絡。」
「客人係咪唔靚仔？」
神坂：「佢唔靚仔，但最大原因應該係行為太閃縮，人哋唔畀聯絡都好正常，好難想像有個男人坐喺遠處一路睇住，叫另外一個女人去問街上嘅女仔拎聯絡方式，可能客人真係太怕醜。」
「最終有冇成功？又問咗幾多個女仔？」
神坂：「大約問咗7至8個女仔，冇一個成功，當時都已經花咗兩個鐘頭，最後客人主動話放棄。」
「請問呢次任務你收佢幾多錢？一個聯絡都拎唔到，客人有冇怪責你？」
神坂：「呢次只係收咗一萬日圓，客人冇怪責我，不過大家都有啲心灰嘅感覺，因為佢又識唔到女仔，我嘅工作又似乎係失敗收場，幫唔到佢。」
失敗嘅任務唔止一單，仲有收到客人要求去酒店做觀眾睇對方同伴侶做愛。
「果然係特別嘅經歷，咁呢個job收幾多錢？」
神坂：「一萬日圓，兩個鐘，客人係50代男性，佢嘅女朋友就係30代，時間地點定晒，酒店亦book埋，但係我過唔到自己心理關口，思前想後之下，當日都係推咗呢次工作，所以都係失敗告終，由於我冇出去見面同會合，故此亦冇收到對方嘅錢。」
呢個時候我有個在場嘅男同事講咗句：「如果早啲認識你，我可以代你接呢個job，唔收錢。」結果引嚟神坂小姐哈哈大笑。
講親都係失敗任務，有冇成功任務呢？其實係有嘅，而且都係同「色」字有關。
神坂：「有位客人想出席一個AV女優握手會，不過主辦方有規定同埋條件，就係要喺某個指定日期，去指定嘅舖頭買嗰位AV女優一定數量嘅碟，跟住店員會畀張類似入場券嘅発券你，咁之後先可以去握手會。」
「買碟都要請你去買？佢自己去唔得咩？」
神坂：「佢唔係住東京，買碟日期同握手會日期唔同，而且要好早去，因為得50張入場券，派晒就冇，遇著人氣女優搞event嘅話，直頭要喺開舖前喺門口排隊，拎唔到入場券就冇得出席握手會。」
「原來如此……可唔可以問下係邊位AV女優呀？」
神坂：「恋渕ももな。」
Google下先，哦……
其餘成功而又「正常少少」嘅任務，仲包括去婚活（類似Speed Dating）公司做商業間諜。
神坂：「客人係幾個後生仔，佢哋想開一間婚活公司專門針對40代、50代，甚至係60代嘅市場，不過呢幾位客人真係太年輕，所以就僱用我去假裝參加，希望我可以取得整個流程嘅費用同埋安排，用呢啲資料去協助佢哋之後定價，呢次工作我收到嘅錢最多，因為唔止去咗一間，日本都有幾多同類型嘅婚活公司。」
「好多嘅意思係？」
神坂：「前前後後超過20萬日圓，因為我去完仲要幫佢哋整理資料。」
另外，神坂仲幫客人做過排隊黨，但唔係排演唱會飛，而係排一間超人氣嘅二郎系拉麵店，請神坂嘅錢其實足夠食到間舖頭嘅10碗拉麵，可見呢位客人唔係care錢，而係想一嘗人氣店嘅味道，又唔想自己走去排成個鐘，果然夠豪！
神坂稱呼自己呢壇生意係便利屋，不過叫便利屋又好，萬事屋又好，最重要係幫佢賺咗第一桶金，而家便利屋只係神坂嘅freelance，佢正職係打理自己嘅清潔公司，仲謙稱好小型，無法同日本坊間好流行嘅家政婦公司相比。
神坂：「其實做咗便利屋幾年，接得最多嘅job都係幫手清潔，可能係因為我收得平少少，所以我後來就索性開一間小型清潔公司，而家收入都好穩定，便利屋工作就只會閒時先至接。」
清潔公司搵到食就好啦，總好過幫人溝女睇人爆房同埋做商業間諜，希望神坂嘅生意蒸蒸日上。
更多【日本職場】影片：電車維修員工作辛酸 處理跳軌善後 公司飯局被兜巴星
