我知我廢，門鐘撳到咁「恆」，拍門聲拍到咁大力好似收數咁，真係冇勇氣行出去睇下係人定係鬼，正當我淆晒底諗緊凌晨3點鐘可以打畀邊個求救嘅時候，出面忽然又靜晒，不過我仍然唔敢行出去，同時打畀呃我返夜嘅阿頭，可惜條友冇聽。
無可奈何之下，我打咗畀一個friend定驚，因為佢係夜貓。
我：「喂，好驚呀，我返夜，而家一個人喺office，凌晨3點有人送外賣，又打嚟又撳鐘又拍門。」
Friend：「咁你咪開門囉！」
我：「但係我冇叫外賣喎！」
Friend：「咁你咪同佢講送錯囉！」
我：「屌！囉完未啫！我意思係思疑自己撞鬼呀！」
Friend：「撞鬼咪撞鬼囉，冇嘢㗎，如果係人咪叫佢走囉，係鬼嘅，唔通佢殺死你咩，你死咗咪又係鬼，到時你仲可以殺返佢添，鬥惡之嘛！」
我：「你就講得輕鬆，我唔想死呀！」
Friend：「你有冇見過新聞話有人畀鬼殺死吖，冇吖嘛，咁你驚咩啫，咪阻住我打機啦，抽緊卡呀！」
完全冇人感受到我嘅恐懼，更何況遠水不能救近火，我打算就咁匿喺office到6點鐘收工，但又盤算緊應該搭電梯定係行樓梯，若然真係有鬼，點都係死路一條㗎喎！
戇居居坐喺度超過半粒鐘，似乎真係全面回復平靜，但咁樣落去都唔係辦法，不如唔好理咁多啦，即刻孭袋走，聽日同阿頭講唔再返夜班，三日唔埋兩日畀「人」咁樣嚇，你加幾多錢人工畀我都唔夠睇心理醫生，最多咪搵過另一份工！
諗就兇狠，我都係再觀察多15分鐘，當時已經差唔多凌晨3:50，把心一橫孭袋閃，理得你咁多吖！一鼓作氣行出去打開木門，又係踏半個身出去，睇清楚玻璃門出面冇嘢，安心，撇！
開埋玻璃門，我衝去撳電梯，起碼有閉路電視，有咩事仲可以撳警鐘，但係呢個時候，我左手邊唔知幾時出現一個阿伯，佢手拎住一袋類似外賣嘅嘢，開口就講：「你嘅外賣。」就係呢把冇語氣同埋冇尾音嘅聲喇，我成個人嚇到跳咗一下（真係彈一彈）同埋「嘩」出聲，我想講粗口鬧佢，可惜唔敢，佢再重複：「你嘅外賣。」
我同呢個阿伯相距大約只有5個身位，佢有手有腳有下巴，著住恤衫西褲，形態唔似鬼，但動態似，我望住就覺得心寒，呢個時候電梯到，我一直唔夠膽完全背住佢，入電梯都係擰一半身望住個阿伯有冇撲上嚟，然後我一路撳G Floor一路同佢講：「我冇嗌外賣呀，唔好搞我啦阿伯！」
電梯門閂埋嘅時候個阿伯仍然企喺原地，一而再，再而三重複：「你嘅外賣。」可幸佢冇撲上嚟亦都冇跟埋入電梯，一落到地下我飛奔向保安崗位個實Q，佢雖然瞓緊覺，但好快就畀電梯開門「叮」嗰一聲嘈醒。
我：「有冇放過人上去送外賣呀？」
實Q：「冇喎，咩事？」
我：「有個阿伯無啦啦狂撳門鐘同拍我公司度門，話我叫咗外賣，頭先仲喺公司門口等我行出嚟，唔止一次㗎喇！」
實Q：「阿伯？如果有人送外賣，呢個時間一定要經呢閘入嚟，真係冇喎，要唔要我同你上去睇睇？」
我：「唔使，我唔上去喇，你哋保安有冇阿伯同事巡樓？」
實Q：「呢個時段得我同另一位後生仔，冇阿伯同事，就算替更都係一個阿姐，你唔好嚇我喎先生。」
此地不宜久留，我唔想解釋太多，好快就離開咗大廈。
我冇瞓覺，等到朝頭早打畀阿頭攤牌，一係返正常時間，一係就唔做，不將就。
阿頭：「唔好咁衝動，你今日休息吓先，聽日返朝頭早9點，好似以前咁，到時慢慢傾。」
我：「唔傾喇，人又好鬼又好啦，我真係好驚。」
阿頭：「你係咪唔記得咗一樣嘢呀？」
我：「唔記得咩？」
阿頭：「你啱啱過咗3個月試用期，辭職要一個月通知㗎！」
我：「……」
阿頭：「我唔係要脅你一定要做，聽日返嚟傾咗先啦！」
仆街吖，究竟係唔係一個局嚟㗎，差唔多過試用期就加錢叫我返夜，等我撞到啲污糟嘢騎虎難下，即走要賠一個月，有冇咁多巧合呀？
隔日返到公司，阿頭嘅語氣係溫和嘅，佢話：「你喺電話度話見到個阿伯……」
我：「究竟係人定鬼？你係咪見過？係咪見過先呃我返夜？」
阿頭：「唔好呃呃聲咁難聽，你等我講埋先，其實個阿伯冇惡意㗎！佢有老人痴呆。」
我：「老人痴呆？即係人嚟啦？呢幢大廈啲人？實Q話外人凌晨入嚟要登記，但冇人登記喎！」
阿頭：「個阿伯係我哋好耐之前嘅員工，one life one company嗰啲，一出嚟社會就喺呢度做到退休，我入嚟呢間公司嘅時候，佢已經退咗休好幾年喇，但因為有老人痴呆症，所以成日會無啦啦貢上嚟office話返工，呢度有啲老臣子都識佢㗎，仲會由得佢喺reception對出張梳化坐，其實阿伯冇惡意㗎，次次上嚟都買埋外賣，聽講佢以前成日請班下屬食下午茶，不過佢班下屬都退埋休喇。」
我聽完之後個心定咗少少，人嚟啫人嚟啫，起碼唔係時運低撞鬼。
阿頭繼續：「最初我返工都覺得奇怪㗎，點解成日有個阿伯坐喺門口，後來老細同我講先知咩事，個阿伯叫桂叔，因為一生人大部分時間都喺度打工，連老人痴呆之後都淨係記住喺度搏殺嘅日子。」
我：「咁都真係幾悲哀，生命只有公司同工作。」
阿頭：「唔好亂講嘢，死者為大，尊重。」
我：「咩死者為大？」
阿頭：「桂叔……即係阿伯，兩年幾前過咗身喇，佢老婆特登返嚟公司同我哋講……」
好！想！講！粗！口！但眼前人始終係我上司，而且我又開始起雞皮。
阿頭：「桂叔過咗身之後，佢老婆竟然提議將啲骨灰灑喺公司，話係老公嘅遺願喎，唔好痴線啦，老細reject好合理吖係咪先？以為不了了之啦，點知有一日會計部個Rebecca開OT開到9點，行去廁所嘅時候見到個阿婆喺公司門口灑灰喎，Rebecca唔知咩事㗎嘛，咪叫晒保安上嚟囉，搞到好大鑊呀，原來阿婆將佢桂叔啲骨灰灑喺公司 。」
我：「會唔會癲得滯？咁咪成間office都係骨灰囉！」
阿頭：「有冇聽書㗎？都話阿婆灑喺公司門口，佢都入唔到嚟，仲有，唔好再話人癲啦，死者為大呀！」
唔通係呢個原因，阿伯先會永遠出現喺公司門口，同埋原地不動冇追到入電梯？
我：「其實你知，你都遇過，所以先『水』我代你返夜，係咪？」
阿頭：「唔好講衰嘢啦，總之而家重新返早，夜班嗰度同老細講咗唔需要有人㗎喇，個應用程式都八八九九。」
聽完之後好嬲，不過嗰日我冇辭職，因為唔想賠一個月人工，愈諗條氣愈唔順，加上陰影好大，所以一直默默搵工，終於做多五個月先搵到，結果都係離開呢間公司。
離開咗係咪冇事？可以話係，亦可以話唔係，因為嗰句「外賣到咗，你出嚟門口攞。」嘅聲線同語氣，直到今時今日我都仲記得。
以前我會熄燈瞓，而家要開燈；以前我會就咁擺部電話喺床頭櫃，而家一攤上床就會熄機；以前我經常嗌外賣，而家我一係落街買，一係自己煮，因為唔想有人撳我門鐘話送外賣，坦白講，我覺得自己有創傷後遺症。
不幸中之大幸嘅係，「阿伯」應該只留戀公司，並唔係針對我或者要纏住我，究竟一個人要幾忠心先會想將骨灰灑喺做嘢嘅地方？ 雖然死者為大，但我仍然覺得一個人嘅一生如果最自豪嘅只係工作，其實係幾失敗，呢句並冇不敬，純粹係自己嘅心聲。