上次有段投稿係講office門口有隻棄貓，同事想留，但老細極力反對，點知最後老細比起所有同事更加錫呢隻貓，公司氣氛唔止大大改善，連帶離職率都明顯下降，故事一出又收到其他讀者inbox，原來好人好事喺香港唔止一單。
呢位讀者間公司為配合營造動物友善環境嘅社會大趨勢，鼓勵員工以領養代替購買，雖然呢句說話已經喺香港講咗好多年，但佢哋真係有付諸行動，只要員工領養新動物，即可獲額外兩日嘅領養動物假期，好正？未算呀！
呢間公司仲會向有飼養寵物嘅員工提供每年額外多一日嘅年假，如果員工屋企嘅寵物不幸離世，佢哋會獲得兩日喪假，等同事可以專心咁處理寵物嘅後事，講起呢樣嘢都有少少唏噓，因為曾經聽過打工仔有家人過身，想拎喪假但畀上司留難，所以寵物離世都有喪假真係十分人性化。
每次講起啲福利好好嘅公司都會有人留言叫開名，所以我有問呢位讀者，原來佢間公司叫One Platform，除咗上述一系列嘅動物友善福利措施之外，佢哋仲為同事提供投保寵物保險嘅特別折扣優惠，而為咗鼓勵員工領養，早前更邀請咗保護動物慈善協會（LAP）嘅義工，帶同拉布拉多尋回犬同埋唐狗去到One Platform 辦公室舉行「動物領養日」，希望透過義工分享，加埋員工親身同動物接觸，從而增進對領養動物嘅認識。
上網check過，One Platform環一財富管理商業平台嘅總監胡啟深講過，家有一寵係社會大趨勢，香港有唔少動物被遺棄，所以公司非常鼓勵員工領養浪浪，因為一次領養其實係拯救咗兩個生命，而一系列動物友善福利措施係希望做到帶頭示範作用，只要同事決定領養，將浪浪帶返屋企，公司就願意喺各方面作出支持，等員工嘅健康財富可以一齊擁有。
由於我同事早排領養咗隻狗狗，佢話透過cam見到狗狗全日喺屋企悶悶不樂，但係放工一返到去，狗狗嘅世界就好似重現光明一樣，原來浪浪心目中嘅幸福就係咁簡單，而我同事話嗰種有人等自己門嘅感覺亦都好幸福，冇諗過一次領養其實係包含咗兩個生命嘅喜悅。
我聽完之後都覺得好開心，參考完One Platform嘅做法同埋措施，我終於知道以公司或者老闆嘅身份可以做啲咩去配合喇！領養代替購買係一句口號，但千祈唔好令佢只係流於口號，希望香港多啲有心人可以仿傚，變成更多企業嘅任務。
