有冇人好似我咁，返工會返到驚？驚唔係因為多嘢做或者有不可能完成的任務，最大原因係日日畀supplier追數。
唔使擔心我冇糧出，公司出糧就好準時，係老細唔知點解有鋪拖街數癮，專拖supplier，搵人做廣告，拖！搵人design，拖！搵promoter，拖！就連訂文具一千幾百都照拖！佢唔係冇錢㗎喎，公司亦都係賺緊錢，但就鍾意死拖爛拖，拖到過晒期，拖到人哋發火先至安樂，我唔明呀，反正要找點解唔早啲找呢？
作為一個打工仔，返工嘅短期意義當然係賺錢啦，但有冇諗過長期嘅意義係建立人脈關係？例如有一日你轉工，啲客同supplier可能會幫到你，又或者有一日自立門戶，累積嘅誠信就係你嘅生意來源，不過喺呢間公司做嘢，誠信不單止唔可以累積，仲會破產。
初初入嚟做唔知咁多，跟合約答應個supplier可以30日找數，結果唔得，跟住60日，又唔得，擾擾攘攘搞咗半年，原來合約係廢嘅！走去追會計部，會計就話一早遞咗上去，不過老細未簽名，咁你唔識追㗎？會計部嘅責任嚟㗎！條會計妹話：「我唔會入去追老細㗎，要追你自己追。」我出埋你份糧好唔好？
得，你唔追我追，因為我唔追，supplier就追我，明明份內事將個job做好晒，做到100分，冇理由衰喺payment方面搞臭自己個朵，結果我入房同老細傾，知唔知條友講咩？
老細：「你第一日出嚟做呀？邊間唔拖㗎？」
我：「但係已經拖咗大半年喇喎，個supplier發晒火。」
老細：「咪由佢發火囉，佢識發火我哋唔識發火呀？」
我：「人哋有提過再唔找數就出律師信。」
老細：「出咩律師信呀？幾萬蚊最多搵小額錢債，咁佢咪排期囉，搞得仲耐，係咪要搞吖，歡迎呀，去到差唔多上庭先找，佢等得仲耐。」
成間公司嘅文化人渣到不得了，老細拖數，會計部配合，仲有啲同事會特登唔聽電話，例如我旁邊嗰位，成個人坐咗喺度，但係電話響到爛都唔接，我問做咩唔聽，佢話之前搵咗個designer整leaflet，最近日日打嚟追支票喎！
我：「今次又拖咗幾耐？」
同事：「一年。」
我：「咪咁仆街啦！銀碼好大㗎？」
同事：「幾千蚊咋。」
我：「咁你都要聽電話，要交代一聲㗎！」
同事：「交代咗幾廿聲啦，我都唔知會計幾時先肯出票，連個期都答唔到designer，之前係咁話追緊，跟住話會計部搞緊，然後話等老細簽，點知一搞就一年，唔知以為張票係博愛歡樂傳萬家嗰啲橫額咁大張嘅支票。」
我：「你聽電話先啦，真係好嘈呀！」
同事：「個designer好激動呀！我唔敢聽。」
我：「其實呢份就係佢嘅糧，如果你份糧畀人拖一年，你激唔激動吖？」
其他同事仲誇張，公司email個footer照道理有每位同事嘅署名、office地址同埋直線，但由於大家都知道呢度有鋪拖數癮，所以好多人會刻意delete直線電話號碼資料，因為已經預視到之後會畀人追數，唔想畀supplier有direct line打嚟。
站於supplier嘅立場，佢哋係唔識我老細同埋會計部嘅人，追數當然追我哋啦，其實好無助㗎！我唯一可以做嘅就係將實情話畀佢哋聽，而且每次都接電話，甚至會留自己手提電話號碼，冇錯，電話一響我真係會驚，不過始終要面對，你打工賺血汗錢，人哋嗰啲就唔係血汗錢呀？
我辭咗職㗎喇，呢度係兩個月通知，呢段日子會盡力追晒自己負責嘅supplier尾數，剛剛就迫咗老細簽一張cheque，因為我話再唔找，人哋會上網唱衰我哋（對方真係咁講），跟住老細就驚喇，另外我都有單job爭個designer 三千幾蚊搞咗8個月，三千幾蚊咋，唔係三千幾萬呀，個designer可能係新人，佢唔敢追，我直頭提佢一定要搞，否則我走咗之後，呢度其他同事真係會避電話，到時想追就更難。（其實我最消極諗過呢單三千幾蚊銀碼唔大，最後追唔到公司就私人畀個designer，始終當時係我搵佢接job）
總之希望經我手嘅所有人，我都可以喺離開前追返佢哋啲數，未來仲要喺呢行打滾，冇理由因為衰老細拖數而影響自己嘅形象同誠信。