我以為去interview大約可以聞到浸味，即係從語氣或者字裡行間會知道對方請唔請你，但原來咁諗係錯既，至少我半年前一次見工經驗就完全feel錯晒。
Interview先見HR，正常發揮，佢亦都叫我等等，即刻安排個manager畀我見埋，入嚟個女人叫做Sophia，傾傾下份工無端端傾我個手袋：「呢個袋我都想買呀，上次去飲嘢見到個女仔孭得幾靚。」
我：「好抵呀呢個袋，我都係去飲嘢見到人哋用得幾靚先至買。」
Sophia：「你都鍾意去飲嘢呀？咁啱啦，呢度好多同事都鍾意happy hour，你劈唔劈㗎？」
我：「劈酒？我麻麻，志在同班朋友飲嘢傾下計。」
Sophia：「幾驚你劈酒呀，我哋都鍾意慢慢飲傾下計，之後叫埋你吖！」
呢啲情況係唔係都答好啦，唔通話唔好呀？何況你講得呢句即係預咗我做同事啦，當日傾完份工傾飲酒，傾完飲酒又傾返份工，臨尾Sophia仲問我去開邊度飲，心諗份工high chance啦！點知過咗成個星期都冇feedback，咁我有Sophia卡片就直接打去follow，佢又叫我上嚟second interview，真係好奇怪，我唔打嚟就唔會安排second in呀？
唔理啦，再上去interview，又唔係見佢㗎喎，見咗另一個叫Hazel嘅女人，個模式同格局同第一次見Sophia一樣，先傾工作，後傾飲嘢，再傾返工作，最後又傾飲嘢，到尾聲Hazel仲話：「介紹個人畀你識吖，你等等。」
我以為介紹將來嘅直屬上司或者老闆畀我識啦，又唔係喎，係另一個叫阿Moon嘅女人，年紀大過Sophia同Hazel，心諗呢條女仲唔係大粒嘢，點知阿Moon入到嚟幾乎隻字不提公事，第一句已經問：「佢哋話你都鍾意落中環飲嘢喎！」
我：「哦，間唔中啫！」
我搞唔清楚呢啲係interview嘅考驗吖，係探口風想知你私生活吖，抑或係想知道我融唔融入到公司，然後Hazel同阿Moon坐低一齊「in」我，講下呢間公司啲嘢，講埋架構，就係冇講幾時返工，最後又係講下中環邊度飲嘢最正。
唔怕話你知，Second in之後落到樓下，我第一時間上網睇多次間公司嘅background係咪做酒呢？係咪food and beverage呢？喂唔係喎，呢間明明係做醫療器材㗎喎，我就係做過呢行先至send CV嚟之嘛，冇錯㗎！點解三句唔埋兩句就問我飲唔飲酒？飲幾多酒？飲開咩酒？去開邊度飲酒？同咩人飲酒？鍾意飲紅酒白酒定啤酒？
Second in第二日我收到阿Moon電話，佢唔係叫我返工呀，佢叫我夜晚出嚟飲酒，ok冇問題，因為直至嗰一刻為止，我都覺得佢哋係想請我，而且係有濃厚興趣嗰隻，咁啱傾又志趣相投都唔搵我做同事？
出到嚟飲嘢，三條女都癲嘅，劈得勁過MK，原來三個都單身，全程講公司是非，講男人經，就係冇話請我，又唔好意思飲緊酒嘅時候問啦，因為後來Hazel飲到嘔，走嗰陣大家都有少少狼狽。
第二日佢哋又叫我出嚟飲酒，今次Sophia帶咗條仔出嚟，有外人喺度我又費事問，隔左個weekend，Sophia又約飲嘢，仲叫我見到佢帶另一條仔出嚟嗰陣唔好篤爆，原來Sophia係散餐女王，如是者飲咗6至7次，終於有一次係得我哋四條女，即刻直接問佢哋：「其實呢，你哋有冇打算請我㗎！」
Sophia：「其實我真係想請你㗎！不過公司有條八婆話走話走一直未遞信，我見你咁啱傾咪彈畀Hazel囉！」
Hazel：「我想請佢呀，老闆hold住吖嘛，話我嗰組嘅budget爆晒，咪介紹畀阿Moon囉！」
阿Moon：「一早話我條team冇位啦，係Hazel同我講有個女仔好啱嘴型，又鍾意飲嘢，死都要叫我見下之嘛，不過你唔好介意喎，真係覺得你啱玩，當識個朋友囉！！」
其實我同佢哋飲咗幾次酒之後已經收到另一個offer，不過佢哋間公司喺行內嘅名氣就大啲，如果有機會都想去做，最後聽到Sophia、Hazel，同埋阿Moon嘅對話就簡直得啖笑。
佢三個都話一有位即刻叫我去做，到時in都唔使in，而家過咗半年喇，我另一份工嘅試用期都過埋，都有keep住同呢三條女做friend嘅，不過就冇應酬得咁密，佢三個都係team head，三個都聲稱好鍾意我，成日約我飲嘢，咁又點吖，最後都冇請我，唯有當舖定條路，將來多個選擇啦！
投稿讀者：Jill