公司新請咗個女同事，稱呼佢做Jennifer啦，我哋估佢有啲嘢屈喺心入面好耐，但等到過咗試用期先敢出聲，明白嘅，因為我當年都有相同疑問。
話說有個男同事叫Aaron，無論公司趕緊咩project，就算係天塌落嚟，人人OT做到八九點都好，Aaron係一定搭正六點走人，一秒鐘都唔會遲，其實準時放工係正常嘅，我哋呢度OT亦唔算頻密，但間唔中梗有啲蘇州屎，總之Aaron係唔需要上身。
除此之外，放工後嘅message同email都冇硬性規定同事要覆，不過Aaron係例牌唔使覆唔使答，即使個job係Aaron負責，老細一樣會叫其他同事幫手follow，如果你唔知真係會以為Aaron係皇親國戚，manager亦唔會出聲，甚至會默默地執Aaron嘅手尾，我初初入嚟做嘅時候已經發覺Aaron好似有特權咁。
Jennifer新入職唔知咁多嘢，有次urgent case明明唔關佢事，但老細都點名叫佢幫Aaron覆，結果Jennifer就按奈不住喺度呻：「點解老細咁驚Aaron，好唔公平喎，佢真係朝9晚6，過咗office hour就咩都唔使理。」
我：「老細唔係驚咗Aaron，係體諒啫，佢住得遠吖嘛！」
Jennifer：「有幾遠呀？我住大西北都係咁啦！」
另一位同事：「大西北小兒科啦！啲人成日話荃灣返柴灣足夠搭飛機去台灣，但比起Aaron都係濕濕碎。」
由於當時有壇嘢真係好急趕，討論到此為止，不過唔知係咪有同事漏咗口風畀老細知Jennifer不滿，第二日老細請大家飲茶嗰陣竟然主動提呢件事，當時Aaron都在場。
老細喺酒樓失驚無神撩起話題：「Jennifer，啱啱過試用期喎，噚晚辛苦你喇，幫Aaron搞掂份報價。」
Jennifer：「哦，冇問題呀！」喺老細面前梗係唔敢詐型啦！
Aaron呢個時候亦搭嘴：「唔好意思呀，麻煩到你。」
Jennifer繼續世界女方式回覆：「唔緊要。」
老細：「好慘㗎！你知唔知佢住邊呀？」
Aaron自己搶答：「我住澄碧邨。」
Jennifer：「澄碧邨？即係邊度？」
澄碧邨就犀利喇，當日我都search過，佢係別墅型屋苑，無敵大海景，座落大嶼山芝麻灣半島，出市區冇車，只可以搭船，正確嚟講係搭兩程船，因為住嗰度嘅人要先坐渡輪去長洲，再喺長洲坐船出香港市區。可能你會話：「唓！長洲啲船好密㗎喎！」啱呀，不過出入澄碧邨嘅船係一至三個鐘頭一班，疏過老細頭頂個地中海。
一路講，Jennifer一路google，佢見到澄碧邨啲相覺得好靚：「嘩，個沙灘正喎，好似去咗峇里島，日日都有度假feel喎！」
Aaron：「當年個地產經紀都係咁樣sell我Daddy，結果佢就傻下傻下買咗，嗰度應該係全香港唯一冇升值嘅屋苑，個價同30年前買係一樣，而且冇餐廳冇超市，買餸要去長洲，個地產經紀話好方便喎！其實點會方便呀？同埋佢哋成日sell個沙灘，話村民可以霸晒成條海岸線，又話行落街就可以釣魚，唉，我都唔識講，父母為呢間屋成日鬧交，話啲親戚唔肯入嚟。」
Jennifer：「唔怪得你要放工即走啦！」
唔走唔掂呀！我哋就算OT兩粒鐘，返到屋企隨時快過放工即走嘅Aaron，住孤島都算喇，澄碧邨仲要出名訊號接收差，係近呢三至四年先可以鋪到光纖寬頻，手提電話網絡都唔算穩定，睇你用咩台啦，不過Aaron話已經好咗好多。
其實住邊都好啦，唔使OT同埋唔使夜晚覆message先係最好，不過有啲工作真係有太多嘢要兼顧，例如我哋就要同外國客不斷接洽，比較難避免，聽講Aaron都考慮過搬出市區，但係皮費真係太重，可能要儲多少少錢先。
如果唔係有個同事住嗰度，我真係唔知香港有個孤島叫澄碧邨，後來搵資料先知嗰個地方本身唔係咁差，可惜管理欠佳，業主之間亦有好多糾紛，連直接往返中環同尖沙咀嘅航線都取消埋，唔止冇餐廳冇超市，據聞連汽水機都冇，仲話有業主曾經$0放租，目的就係要搵住客每月繳交二千幾三千蚊嘅管理費，呢個孤島你會搵到好多前人搬走時留低嘅嘢，包括8、90年代嘅雜誌同埋狗仔骸骨……
當我膚淺唔識貨，度假還度假，平日都係住返市區方便啲，除非唔使做可以日日嘆世界啦！而家Jennifer嘅心理平衡返，有時仲會提Aaron夠鐘快啲收工😂😂