話說我去見工，個Manager見我CV嘅地址係象山邨，即刻笑逐顏開咁話：「我細個都住象山㗎！好耐冇返去喇，嗰陣讀信義，仲記得係下午校，個校長係咪叫賴慶容呀？副校係李莎莉吖嘛！」我答返佢：「信義冇咗好耐喇，已經荒廢咗一段日子，後來變埋過渡性房屋。」
Manager：「我都好似聽講過，真係好可惜，冇晒啲童年回憶，咁中學呢？你中學都係象山嗰頭讀？」因為CV冇打到中學資料，咁我就照直同佢講：「我讀姚連生，嗰頭住都係何傳耀，梁省德、姚連生、呂明才，再唔係就可風或者李炳，細個邊有得話事吖，屋企人同你揀晒啲第一第二志願。」
Manager：「喂，我又係姚連生喎，有冇咁啱呀？估唔到係師弟，知唔知廣發同威利執咗未呀？聽講個街市大翻新，以前讀中學日日去呢兩間食晏。」
我：「咁又唔知喎，其實住象山好少會特登落石圍角，係都直接出荃灣啦，畢咗業冇返去喇！」
Manager：「不過我大你咁多，年代都有少少唔同，你知唔知而家綠陽美心皇宮個位呢，以前係一間戲院，好似叫凱旋，我人生第一套入場睇嘅電影就係嗰度，《法外情》有冇睇過？劉德華葉德嫻，我阿媽帶我去睇㗎，仲記得佢喊到豬頭咁。」
我：「戲院我真係冇咩印象。」
由小學講到中學，再講埋象山石圍角同荃灣區嘅發展，原來仲未完……
Manager：「我中學啱啱開始興四大天王，嗰個年代未有得上網，唔知點解個個咁鍾意上堂抄歌詞，仲有台灣四大天王，你數唔數到係邊四個呀？以前荃豐中心樓下呢，有間舖係租CD㗎？而家梗係唔興啦，可以Spotify聽歌吖嘛！」
你自己都話唔同年代啦！係咪要傾埋廣東歌嘅潮流同演變呀？我哋完全冇傾過份工，佢亦完全冇問過我任何working experience嘅問題，不如簡單啲講，成個interview過程係冇講工作相關嘅事，佢由一入房見到我CV寫住象山開始，已經不斷講緊私事。
Manager：「係呢！你有冇養狗呀？」又點呀？
我：「冇！貓狗都冇養。」咁應該完得啦個話題！
Manager：「我屋企有隻芝娃娃，好過癮㗎！畀你睇下。」
……即係無論我答有冇養狗，最終結果都一樣？然後個Manager「隊」部電話埋嚟畀我睇相，睇完相又睇片，隻芝娃娃飲水嘅video啫，有咩好睇呀？
我內心雖然唔耐煩，但當時都表現得好有興趣，而同佢鳩up嘅過程亦交足戲，有問絕對有答，反應做齊，明白嘅，如果interview可以表現得有親和力啲，大家又啱嘴型，受聘嘅機會的確大增，總好過你同我打官腔，最後草草一句「有消息通知你」就完結吖！
天南地北吹水吹咗幾round，條友仲講埋自己點樣識而家個老婆、喺觀塘考車、哈利波特、細佬做懲教……
突然個Manager成個彈起身，講真有嚇親我，佢終止晒所有話題，望住自己隻錶話：「嘩！5點55分！好啦，今日傾到呢度。」
咁……個interview點呀？不過你知而家啲公司好奇怪㗎嘛，in幾轉之後可以唔請你，求其講幾句又會叫你返工，我又冇理由以一個求職者身份質問佢啫，何況佢喺鳩up嘅過程中好nice，點知佢個心諗咩啫，可能係覺得大家投契，轉個頭畀offer呢！
我就冇戴錶嘅，所以用電話睇時間，呢次interview傾咗超過兩個半鐘，如果連埋嚟到填form、等入房，仲有同HR傾咗幾句嘅時間，前前後後直頭超過3個鐘，正路份工應該穩如泰山啦！雖然呢個interview根本稱唔上係interview……
離開之後我冇即刻離開棟大廈，因為見工時間太長，當中miss咗幾個電話同好多msg，驚行出街太多人，我選擇留喺G/F嘅大堂回覆，當時係6點正，我見到個Manager搭電梯落嚟，仲有幾個相信係佢同事，一行幾人急急腳笑住走，聽唔清楚佢哋講咩，但有「飲嘢」兩個字，哦！趕住去Happy Hour，唔怪得5點55分突然收口，連正常ending都冇做就起身鬆人啦！
呢份工係聖誕之前去in，而家3月喇，音訊全無，而且我見到佢哋keep住出招聘廣告，即係唔請我啦！
Ok，唔請唔緊要，假設我background唔得，你當初點解叫我嚟見呢？咁如果background ok，又點解見工完全冇講份工呢？Interview表現唔好所以落選，其實我會明白，但係冇喎，你講隻狗、講考車、講哈利波特，根本唔關interview事，我真係死得不明不白。
始終覺得當日個Manager係搵我攝時間等收工，好想聽下大家對件事嘅睇法。