啱啱見咗份工，簡直係嘥時間浪費人生，睇求職網完全冇發現有問題，普通公司名，觀塘區，出入口業務，send完CV過咗兩日就收到電話約interview，咁就上去啦。
行入門口感覺已經唔太好，嗰種舊式唔係老土嘅舊，係古靈精怪嘅感覺，大大個魚缸，啲水頗為混濁，reception前面行幾步有盆唔知咩花，擺喺正中間好阻礙出入，個接待處有一排擺設九唔搭八，仙人掌旁邊係招財貓，再旁邊仲有兩座細size嘅水晶。
填完form等見工，唔知係間公司冇HR，定係HR唔得閒見我，總之一嚟就直接同個老闆interview，對方係一個50幾歲咁上下嘅女人，兩隻手都戴住好多嘢，好似《尚氣》裡面嘅梁朝偉，分別係梁朝偉嗰兩揪係鐵環，女老闆嗰兩揪就係蜜蠟手鍊，頸又戴住幾條。
會議室裡面有神枱唔知拜咩，但係都夠奇怪啦，似足電影情節當中嘅舊式差館，坐低之後諗住例牌嗰幾味，唔係自我介紹就係問答環節，點知兩樣都唔係，個女老闆全程同我傾佛偈。
「十五日已前不問汝，十五日已後道將一句來。」
我嚇親，因為聽唔明，又以為自己聽錯：「下？」
「即係見工呢，不問過去，也不問未來，只問今天，人生在世如身處荊棘之中，心不動，人不妄動，不動則不傷。」
我之後查返先寫得出佢講過乜，當時喺現場只能夠答：「Sorry，我唔明。」
「後生仔，能施所施及施物，於三世中無所得。」
做咩啫你？使唔使好似啲古人咁樣，手擺後面再行去窗邊講好唔好？我嚟見工咋，可唔可以講返人話呀？
完全唔知可以畀咩反應，以前去interview無論啲問題幾難答都好，起碼我聽得明，要吹都仲吹到，答得好唔好亦係同對方交流緊，但今次眼前呢位女老闆講佛偈，實在唔知點傾落去，其實呢間公司發生咩事呀？
「你係咪信佛？」
我：「呢方面我冇研究。」終於講返人話喇佢。
「因為你耳珠好厚肉好大，即係反映你有慈悲嘅心腸，你與佛有緣呀。」
坦白講當時我只有一個諗法，就係間公司會唔會做傳銷或者逼人買嘢，sell咩不如直接講啦，蜜蠟手鍊係咪？定係嗰啲開咗光嘅佛具之類呀？
入咗房咁耐，女老闆一眼都冇望過我份履歷，全程亦都冇傾任何同公司或者工作有關嘅嘢，後半part就集中睇我個相，耳珠、鼻、眼眉、人中，全部畀佢一一點評，大部分我都唔記得喇，係對印堂嗰部分有少少印象。
「印堂係主一生榮枯，如果做咗虧心事或者前世失德呢，就會有一條懸針紋，呢條懸針紋上剋父母，下剋妻兒……」
你老味見份工啫，畀你睇相都算，仲要話我剋父母剋妻兒，真係CLS公司。
畀佢困喺房超過半個鐘，由頭到尾冇講份工，最後就咁in完，有冇人話我知發生緊咩事呀？想搵份嘢做啫，畀個正常人我見得唔得？離開嗰陣望下office其他同事，唔知係心理作用定咩，個個都好似痴痴呆呆咁，靜過圖書館，嗱嗱聲走啦，真係好嬲自己send咗CV嚟間咁嘅公司。
勢估唔到第二日個女老闆親自打畀我：「後生仔，聽日返工有冇問題呀？」
我真係直接答：「有呀！」
「有咩問題？你想幾時返吖？」
我：「份工唔啱我。」
「但係你個相幾啱我哋公司喎！同埋你與佛有緣呀！」
我：「我信耶穌㗎！」
「冇關係㗎，欲修於正行，正助二業中，猶傍於助業……」
我將部電話由耳仔邊拎返去面前，對住紅色個收線掣一撳，未聽佢講完就cut線，趕住出門口見另一份工呀，有咩留返佛誕先講啦！