就快自己出發去福岡喇，最困擾我嘅問題都依然係－－－自己住酒店，所以我傾向搵bnb，揀啲獨立房間，但共用大廳嗰種，半夜撞鬼都有個伴嘛！不過加埋要交通便利又要好評呢樣嗰樣，set完一大堆嘢就會發覺選擇唔算太多，今次本來揀咗間睇落唔錯，張張相都光光猛猛又四正嘅bnb，正想confirm畀錢之際，喺留言睇到呢段（見圖）。
「體驗不好…毛巾泛黃，被子有血跡，牆上有鼻屎…」
即係咁，毛巾我通常自備，張被有血跡就……都算喇，我諗都係嚟自一個正常女仔，起碼對方未停經先吖，照道理亦已經乾咗好耐，但係牆上有鼻屎就真係頂唔緊，鼻屎喎！牆喎！
咁住嗰啲青年旅店得喇啩，實夠人氣唔使驚啦！我以前都係咁諗……講親身經歷先，有一次喺高雄，我住一間四層高嘅民宿，地下係大廳，最高係天台，二樓for女住客，三樓for男住客，但講乜都冇用，因為冇客。我睇相揀呢間嗰陣，明明好多嚟自唔同國家嘅朋友bbq呀，喺廳彈結他呀，男男女女一齊飲啤酒呀，點知我夜晚返去成棟冇燈，一個人住晒四層！
當晚我靠一個信念去瞓，就係如果有鬼殺咗我，我最多變鬼殺返佢，互殺囉咩事呀！
我朋友直情喺青年旅店中過招，典型幾張上下格床，一間房10個床位嗰種，當晚另外幾張床都冇拉到簾，得一張係拉埋咗，好明顯聽到有人碌嚟碌去，佢執行李都就住怕太嘈，到佢自己搞掂晒去瞓，拉埋簾之後聽到另一張床個住客起身，由上格床爬落地嘅聲，仲有腳步聲，然後開門聲，隔一陣再聽多一次開門聲，腳步聲，上返床嘅聲，咁好正常吖，去廁所啫！
第二日屋主問佢住得舒唔舒服，因為只限女生嗰邊得佢一個入住，畀咗唔夠一百蚊港紙就包房，當時我朋友先至識驚。
住酒店個心理障礙係發夢，曾經有個空姐friend半夜打畀我，佢話夢見自己身處嘅酒店房，咁樣係代表間房有嘢喎！救命呀！我好似都試過喺酒店發夢見返自己喺房瞓覺，有冇人聽過呢種講法呀？
本身想叫你哋分享下旅行同出差鬼故，不過我就快出發去福岡，都係唔搞事喇，反而有騎呢嘢就講出嚟笑下啦，因為我而家笑唔出呀！最好癲過被子有血跡，牆上有鼻屎呢啲啦！