非常奇怪嘅一件事，有人打嚟公司搵Amy，而我不知道誰是Amy？
「我叫Richard，黃X偉，以前喺度返工㗎，有啲嘢想搵Amy傾，Amy Kwan呀！」
我放低電話問其他同事，搞咗一輪先知道Amy係我上手再上手再上手嘅HR，離咗職至少7至8年，如果唔係有個更資深嘅同事記得邊個係Amy Kwan，應該冇人會再提起呢個名。
解釋返Amy Kwan走咗好耐，呢位Richard嘅語氣就顯得有啲失望，跟住同我講：「你係新嘅HR？係咁㗎，我想自首！」
我：「自首？」
「嗰陣時我喺度做，好多時claim車錢都填大個數，另外幫公司買嘢有幾張單都係自己開，嗰啲細嘅電器舖咪手寫單嘅？個數係我叫佢哋寫多啲，呢度加加埋埋都七千幾蚊，如果我齊頭還八千蚊畀公司得唔得呀？」
完全聽唔明佢講乜？但既然講到claim錢開單嘅問題，所以我決定搵會計部個阿姐求助，佢初時都唔記得邊個Richard，我企喺側邊等佢哋電話溝通，不斷聽到會計阿姐講：「過咗去就算啦！我哋冇追究呀！」
「你唔講我唔講……」
「唔係，但你而家要還畀公司都唔知點計……」
「我畀公司戶口號碼你冇用㗎！公司要audit，無啦啦入筆錢最後搞到我㗎咋，每筆in and out都要mark得好清楚……」
會計阿姐明顯每次未講完就被打斷，聽得出嗰位Richard好決心要還錢畀公司，最後有個高層叫我哋駁條線畀佢傾，終於搞掂咗！
聽返高層講，佢對呢位Richard Wong有少少印象，但唔深刻，對方話而家信咗佛，篤信作過嘅惡同埋罪孽係要還，諗起好多年前claim錢做過手腳，晚晚受良心責備，好驚有一日會受到懲罰，所以主動打嚟「自首」，主動畀返錢公司。高層話Richard嘅語氣怪怪哋(講嘢唔多正常），anyway，唔希望花咁多時間同對方糾纏，最終提議Richard將當年拎多咗公司嘅錢捐出去做善事。
雖然我都覺呢位未見過嘅舊同事有啲唔尋常，但如果捐錢可以解開佢嘅心結，咁都係一件好事吖！