上一份工有位舊同事問過我借錢，銀碼唔算細，前後加埋借咗$45,000畀佢，當時我都係得廿幾歲仔，講真積蓄絕對唔多，仲記得本身想用筆錢報讀個課程進修，可惜最終唔夠錢所以放棄咗，數數手指已經係9年前嘅事喇。
我同嗰位舊同事當時幾friend㗎，大家年齡差唔多，又啱嘴型，所以成日一齊食飯，間唔中放工都會去飲杯嘢，某次佢同我講屋企有急事想借$30,000，講到死人塌樓咁滯，雖然我猶豫咗一陣，但最後都借咗，呢位舊同事亦承諾三個月內分期還清。
第一個月佢有如期還$10,000，但第二個月就冇喇，仲話屋企方面嘅急事未處理好，又問我借多$25,000，咁我見佢第一期有還，應該真係有需要，幫人幫到底，咁咪借多次囉，借$30,000，減去還咗$10,000，再借多次$25,000，即係前後借咗$45,000畀呢位舊同事。
原來講個信字嘅諗法太天真喇，佢第二次問我再借嗰$25,000之後，唔夠一個星期就辭咗職，仲要係曠工形式咁走咗去，冇正式同公司講，照道理要賠一個月人工，不過冇人搵到佢，HR仲問我哋可唔可以聯絡到，屋企電話係假嘅，手提電話又cut埋，好似人間蒸發一樣。
其實我連呢位舊同事嘅地址都冇，所以佢失蹤後完全接觸唔到，當時借錢都係諗住一場同事，走得去邊吖，唔通佢連份工都唔要咩，點知……
借錢畀佢嘅唔止我一個，另外有兩三個同事都分別借過錢畀佢，銀碼幾千至萬幾蚊不等，我係大戶，前後借出$45,000，係其他「苦主」嘅總和有多。
除咗嬲之外，我亦因為呢件事而對人失去信任，無論係朋友又好，同事又好，我都覺得自己被動咗，唔敢再同人咁friend，一朝被蛇咬，十年怕草繩，加上我嗰陣冇乜積蓄，呢個教訓要成幾萬蚊咁多，真係非常肉赤。
唔借都借咗，人又消失埋，咁可以點啫？咪以後學精啲同埋帶眼識人囉！勢估唔到呢位舊同事早幾個月無啦啦call我。
「Hello，好在你冇轉電話號碼咋！我係阿Ming，唔好鬧住先，其實我記得爭你錢㗎，$45,000係咪？畀個銀行戶口number嚟吖，即刻過返畀你。」
講真我嚟唔切反應，點會估到有個人爭你錢9年咁耐，會突然出現主動話還錢吖，同埋我內心都會諗係咪另一場騙局，雖然唔知佢有咩陰謀，但始終會提防，呢個人呃過我，好難唔會咁諗。
我：「你突然打嚟，想鬧你都冇準備啦！點呀，咁多年嚟過成點呀？」
「Ok啦！嗰陣時真係有困難，加上自己唔識諗，所以先至不辭而別，而家鬆動咗好多，我一直記得爭你哋錢，你鬧我啦，點鬧都冇問題。」
我：「鬧乜鬼吖，最嬲嘅時候都過咗啦！」
「你畀個銀行戶口號碼我先，過咗畀你再講，唔好意思，其實應該計返息畀你，但我唔識計，唔好介意我就咁還$45,000，銀碼冇錯吖嘛？」
佢又真係清楚記得個銀碼，仲要即刻過咗數畀我，無可否認我降低咗戒心，同埋佢唔會再呃到我啲咩。
佢過完數之後再打返嚟確定我收到，就咁cash過數，唔係支票，冇古怪。
「我想問下你搵唔搵到Leo、家駿，仲有Barry？Leo好似冇用以前個number，家駿長響冇人聽，Barry又係，我check過Barry仲要冇WhatsApp，佢哋係咪改晒號碼？」
我：「其實我轉咗工之後都冇聯絡佢哋，唔知係咪轉晒number，可以幫你搵搵。」
「原來你轉埋工，而家邊頭返工呀？」
我：「灣仔。」
「我又係喎，畀個機會我請你食餐飯吖，當係道歉，放心啦，錢還晒畀你，我唔會再問你借錢，都唔係做Sales，唔使驚我出嚟會sell嘢，如果你搵到佢哋，我順便一次過還埋吖。」
一場舊同事咁耐冇見，嗰陣時大家都friend過，算啦，見面食餐飯唔會死人，結果我嘗試聯絡Leo、家駿、Barry，其中兩個應該改晒號碼，我淨係contact到家駿一個。
家駿話冇興趣聽呢位債仔電話，唔會原諒，亦唔想再接觸，如果真係冇古惑咁順攤還錢，就叫我代為保管先，畢竟家駿條數比較細，只係$2,000，唔想為$2,000畀個銀行戶口號碼佢，明嘅，家駿同我一樣，已經對呢位舊同事失去咗最基本嘅信任。
出嚟食飯見面，一切正常，佢都真係畀返$2,000叫我轉交家駿，仲多次講對唔住，希望大家可以做返friend，得閒食個飯。佢透露自己近年叫做搵到錢，生活已經撥亂返正，但就感慨人愈大愈難搵真心朋友。
「講真，如果而家我問人借幾萬蚊，應該冇人會借畀我，所以諗返當年大家只係同事，而你哋都肯相信我，真係好難得，我亦都好慚愧，希望你唔好抗拒我，得閒一齊食下飯啦！」
聽完之後有少少心酸，我相信每個人大咗都係咁，人愈大愈難搵到真心對自己嘅人，我冇透露家駿話唔想見到佢，我亦冇講到自己已經完全唔信佢，感激消失九年咁耐仍然記得還錢，不過做返friend真係唔得，易地而處，換轉係你會唔會原諒佢？