兩個月前有一日我病到七彩，仲好記得係星期日晚，因為病到連老母餐生日飯都食唔掂，去診所睇完醫生已經冇晒力，攤喺梳化連沖涼上床都冇力，要勞煩老母煲埋粥畀我先出去同阿哥阿嫂慶祝。
我覺得醫生開嗰隻藥勁得滯，食完100%昏迷，結果我食咗粥喺梳化瞓完，紮醒沖個涼再食多次先上床，太病冇較鬧鐘，當時又預計唔到第二日會唔會好啲，所以冇請定病假，跟手就瞓死咗喇！矇矇矓矓又再起身，咦喂，3:30個天咁光既？哦，應該係晏晝3:30，咪住先，今日星期幾呀？星期一喎！公眾假期咩？唔係喎！仆街喇呢次，我點解冇返工呀？咁我有冇請假呀？點解手提電話一個call都冇miss嘅？
公司條team有WhatsApp group，同事有講工作但完全冇提起我，其實我係咪死咗㗎喇？還是好似經典西片《鬼眼 The Sixth Sense》咁樣，自己唔知自己過咗身呀？
其實當時都未係好精神，考慮緊好唔好打返公司或者WhatsApp請病假嘅時候，我老母又放工返屋企喇，因為佢做清潔，一大清早出門口，下午放工仲特登買咗粥畀我食，好似預咗我一定冇返工咁，唔理咁多喇，病到冇咗半條人命，三點幾先請病假又唔知點開口，結果我食完粥又再瞓。
第二日返到公司一切如常，冇人問我做咩唔返工，冇人追究，亦冇人問我攞病假紙，其實呢個Office啲人係好冷漠，特別係我個營業部，十幾個Sales當中有個別係係經理嘅愛將，因為佢哋跑到數吖嘛，另外一班Sales就可有可無，長時間投閒置散，但又唔會炒你，我就係其中一位喇，只要keep到手上班舊客落一啲regular order就得，冇人會期望我BD到新客，當然我亦唔會去BD，加上Sales成日要出街做嘢，Lunch係各自食，行開行埋唔會有人理，平時嘅氣氛已經係咁上下。
我有問過另一位同我一樣廢嘅同事：「噚日食咗藥瞓到過晒鐘冇返工，你覺得同經理講好啲，定係同HR講好啲？」
同事：「你噚日冇返工咩？點解我唔覺既？算啦，都冇人發現。」
其實我唔係有心隱瞞自己冇返工，因為唔請病假其實都算曠工，不過隔咗日先講又真係好難開口，月尾出糧證實冇事，完全冇扣我人工，好正好爽，但又覺得好似透明人間咁。
有朋友問過我，喺公司冇存在感會唔會唔開心，講真點會冇吖，不過呢度做又三十六 ，唔做又三十六，大客冇你份，升職唔使諗，每個月底薪連佣金徘徊喺$18,000至$20,000咁上下，做住先囉，或者呢啲就係成日講嘅comfort zone，我都認自己好廢，做廢人係會上癮㗎！
透明人間有好有唔好，冇乜壓力係輕鬆既，不過公司同事真係好冷漠，下年我30歲喇，男人唔可以就咁一世，雖然係準時出糧啫，但份糧連續3年冇加過，可能呢啲就係有雞先定蛋先嘅問題，我做嘢頹，份糧咪頹囉，份糧咁頹，個人就冇乜原動力，根本係一個循環，難得我喺公司嘅存在感咁低，冇返工都冇人發現，咁我應該把握呢個優勢搵下工，拎埋1月份嘅雙糧就行動啦！
投稿讀者：Mark